Read Kambera 1 KORINITU 1 Bible Online

1 KORINITU 1 - Kambera bible

1 KORINITU 1

¹Ngara angu dedi kabungguru-na i Ala la Korinitu! Nyimi na-paaunggai-ka paraïna i Ala hi na banjaru-nggai, nadu nyimi ba manguna i Karitu Yehukai pa-kariangu mbuu hàlada da tau la nggi - nggiyakai da malumu-nya i Yehu Karitu na Mirinda, nu na Mirida dàngu na Mirinda nyutambu. Nyungga Paulu dàngu na angu dedinda i Hohuteni, mamonungu i Ala Amanda dàngu i Miri Yehu Karitu ka nawua àrunggai kanyuru dàngu mànjaku. Nyungga kutulihu-ya na huratu yiana ba pa-pahurungu-na i Karitu Yehu, na pawotu wikina i Ala dàngu paraï ruku pawuku-mbuna.

⁴Nyungga ku-pamalangu mànungu lai Ala ngerami nyimi, nadu nyimi ba mbàda ngala-minyaka na hàmuna i Ala linya i Karitu Yehu.

⁵Nadu nyimi ba mbàda manguna i Karitu-kaika, ka luri wulu-minyaka dimi la hangia - hangia-ka. Na pingumi la hangia - hangia lalu tanjiku-yaka, dàngu bai pingumbu pa-ajaru wànya nuna na papingu wàngu.

⁶Nu ba tuna nu wuwa-nanyaka na lii rukuna i Karitu ba tama hàmu-mana-nyaka la etimi,

⁷hi lupa nda na-yàmihu ndokunggai ana hau kanyuru-mbu, ba talànga nedi-minya na tàkana na Mirinda i Yehu Karitu hi naita-ya paraï tau mbuu ndàbana.

⁸I Karitu wiki napa na-anggaraa-makai lundu la hupu njàpuna; ka pekuna ba namai beli hi natoma-nggai nyimi dàngu nda nggàra nyurami.

⁹I Ala pa-monungu ailulu-maya duna. Nyuna jiaya na Ala na mambàda paaunggai la pa-pambulu dànya na Anana, nu i Yehu Karitu, na Mirinda.

¹⁰Angu dedi mbuu ndàbami! Wànya na tamuna na Mirinda i Yehu Karitu, kukarai-kai ka pekuna nyimi mbuu ndàbami ka hau ngaru-akai, ka àmbu ninya na paihangu la padua-mi nyimi. Màta nyimi kai mbulungu, ka hau eti dàngu ka hau kanandingu-akai.

¹¹Nadu da tau welingu la kuru umana i Kalowi ba da-patàka-dunggaka ba ningu papalumungu la padua-mi nyimi wàda.

¹²Na palanggu jiaya ba ninya la hongami nyimi na mapanii, “Nyungga kutundu-nya i Paulu,” wàna, nimbunyai na mapanii, “Nyungga kutundu-nya i Apolu,” na mawàna, ninya hawiangu, “Nyungga kutundu-nya i Peturu,” wàna; tàka hili ninyai, “Nyungga kutundu-nya i Karitu,” na mawàna.

¹³Nggiki peku pa-ihangu-naka i Karitu![1] I Paulu nda nameti-a la harikangu lumumi nyimi! Nyimi nda pa-parunungu-akai pakiku-nya i Paulu, wàngguka?

¹⁴Malangu-manaka ba nda ningu haàtu welingu lai nyimi pa-parunu-nggu, ba mbulungu i Karipu dàngu i Nggayu duda.

¹⁵Napa ningudu tau mapanii, ba nyungga ma-parunu-nya la pakiku-ngga nyungga. (

¹⁶Wua, i Hitipanu dàngu kuru umana tubana ba nyungga ma-parunu-nja. Tàka hinggilu-da nyuda, ba kukaka-ya nda hili ningu-apa haàtu pa-parunungu.)

¹⁷I Karitu na ma-palewa-ka nda jia-aya ka ku-parunungu tau, tàka mbulungu-ana la pabobaruya na Lii Mànangu welingu lai Ala; nuna kulaku-manya bàdi, dàngu nda wàngunggunya màhinggu papanii-a hama tuna na huri tau, màta na kuaha ruku metina i Karitu la harikangu ka àmbu kahewa-ma-ana.

¹⁸Nadu da ngerada da tau da makangehanya la pa-làjaru, na ruku metina i Karitu la ai harikangu beri kareuku juaya. Tàka na ngeranda nyuta duta pa-pamàna-na i Ala na lii nuna pawuku-na i Alaya ba na-pawuwa-ya na mbihana.

¹⁹Nadu la Huratu Matua, i Ala napanii, “Na màhina na tau manggàna napa ku-kubaru-ya, dàngu na papina na tau pingu napa ku-pamolu-nya,” wàna.

²⁰Na, nggàra lingu-daipa da tau manggàna? Nggàra lingu-daipa da tau pingu? Nggàra lingu-daipa da ngara ma-tanjiku la pakanandingu la pinu tana yiana? I Ala mbàda pawuwa-mana-nyaka na manggàna pinu tana yiana ba ma-kakòlulu jua-maaya!

²¹Nadu jiapa ka nda nggiki pinguna na tau, nyuna nda natanda-aya i Ala wànya na pingu wikina. Tàka paraï ruku manggàna-manaka i Ala, hi na-orangu pa-pamàna-nja da tau da mapawai lai Nyuna liya na lii na pa-wewaru-ma nyuma, ma-kakòlulu-ya ba wàdanya paraï tau pinu tana.

²²Da tau Yahundi karuhi-danya pa-hangàtarungu ka nanjadi mbuti, tàka da tau Yunani paihiku pàku-danya na manggàna pinu tana yiana.

²³Tàka nyuta duta jia-maaya la pabobaru-ya i Karitu na mameti la harikangu. Na lii nuna na-kumbalu-ya na papàda eti tau Yahundi, dàngu kareuku àngaya wàna ba nakaka-ya tau nda Yahundi. Dàngu da tau nda Yahundi ba dakaka-ya na lii nuna panduba wànguya.

²⁴Tàka na ngerada da tau da pambàda paauna i Ala — ka tau Yahundi-ya ka nda tau Yahundi-ya — na lii nuna pawuku-na i Alaya ba na-pawuwa-ya na mbihana dàngu na manggàna-na.

²⁵Nadu ba itaya ba hama mandubaya lai Ala, na rihi manggàna-mapa welingu la manggàna tau; dàngu ba itaya ba hama ma-malijangu-ya lai Ala, na rihi kapàru-mapa welingu la kapàru tau.

²⁶Ngara angu dedi! Kamangu papangàdanya na hadami ba jiaya napaau-nanggai paraïna i Ala. Ba hawutu pàkumi lai nyimi ma-manggàna jàka ndia ma-kuaha, jàka ndia ma-mandapu la majangga tundunya na patandangu tau.

²⁷Nadu ba tuba harawuku-mana i Ala la papindi-ya na manduba ba wàna na pinu tana, ka peku makia-da da tau mapingu ba wàda. Dàngu i Ala napindiya na tau na ma-mangonangu ba wàna na tau pinu tana, ka peku makia-da da mini kapàru kaborangu.

²⁸I Ala napindi-ya na tau ngia wawa, na tau ànga, na manda palingu ba wàna na tau pinu tana yiana, ka peku palàjaru-nanya paraïna i Ala na tau na mangia dita ba wànanya tau pinu tana.

²⁹Ruku tuna nu nda ningu-apa haàtu tau mapahamemu wikina la hanggana i Ala.

³⁰I Ala wikima duna na mawuku-kai hi peku pambulungu-mi dàngu i Karitu Yehu. Linya i Karitu hi natuta ma-manggàna. Dàngu li lai Nyunambu i Ala hi na-papeku belita dàngu Nyuna wiki, hi natuta banjaru mehana, dàngu hi na-pahàla-ta.

³¹Jiaya, hama tuna na pa-tulihu daa la Huratu Matua, “Na tau na ma-mbuhangu pa-hamemu, màta ka na-hamemu wànya na pa-paloku-na i Miri bàdi,” ba wàna.