Read Kambera 1 KORINITU 14 Bible Online

1 KORINITU 14 - Kambera bible

1 KORINITU 14

¹Màtawa nu kai pa-mukarungu la pambuha-nya na tau hawiangu. Dàngumbu kai pa-mukarungu-ma la pa-kataku-ha da kanyuru - kanyuru pawua-na na Ngahuna i Ala, ri - rihi na nggàhungu la pa-patàka-nja da pa-pakaka-na i Ala la tau.

²Na tau na ma-kareuku wàngu hilu pa-hangàtarungu, na tau nuna nda panii dàngu-nanya taua; panii dànanya i Ala. Nda ningua tau mapinya jàka nggàraya na papeka-na, nadu ba na Ngahuna i Ala hi kiri pekana hangia - hangia hi mbulungu i Ala-a duna na mapinya.

³Tàka hauya duna na tau na ma-patàka-nya na lii welingu lai Ala, patàka-nanya la tau; la pa-paundu-nja, la pa-pahayandalu-ha dàngu la pa-pangaüru-ha.

⁴Na tau na ma-kareuku wàngu hilu pa-hangàtarungu pa-undungu-nanya wiki-ana; tàka na tau na ma-patàka-nya na lii welingu lai Ala, ndula-nanya na kabungguru ka na-parukangu pa-pabonjangu.

⁵Lalu mbana hàmu-aya làti angu dedi mbuu ndàbami jàka ipingu pa-kareuku wàngu hilu pa-hangàtarungu. Tàka na marihi hàmu angu dedi jàkai màka pa-bobaru-ha da pa-pakaka-na i Ala. Nadu na tau na ma-patàka-nya na lii welingu lai Ala, ba na-bokulu ningupa welingu la tau na makareuku wàngu hilu pa-hangàtarungu; hauya duna na tau ma-kareuku wàngu hilu pa-hangàtarungu jàka napingu pa-kaloka-nya nuna na pa-kareuku wàna, ka peku ningu linguna la mbuu ndàbana na kabungguru.

⁶Jàka era mainggu lai nyimi, tàka hi ku-kareuku wàngu ma - màtu hilu pa-hangàtarungu lai nyimi, nggàra lingu-naka nu lai nyimi? Nda nggàra ndoku linguna! Hauyai duna, jàka ku-wàlahu-nggainya na palara liina i Ala, jàka ndia ku-pakaloka-nya na rukuna i Ala, jàka ndia ku-patàkanggai-nya na lii welingu lai Ala, jàka ndia ku-ajaru-kai.

⁷Da malingu pa-parànjangu wàngu ludu da manda ningu luringu hawutu, hama tuna da taleli dàngu da jungga, jàka nda pa-kàritu paloha-nja, nggiki hama pi-nanyaka tau jàka nggàra wiliku-ya na pawotu?

⁸Na hili hau ngerangui: Jàka àtalu palingu biaha da taropitu, nggamu-yaka napa na ma-hawanjiru palaku pa-pabera?

⁹Tuna numbu na nggàhungumu la pa-kareuku wàngu hilu hangia - hangia pa-hangàtarungu. La nggàhungu-mu nu bau tikiha da kareuku da manda lohangu, nda haàtu-a mapinya jàka nggàra wàmu bau panii. Da kareuku-mu nuda napa dambulangu nda pahilu pinja.

¹⁰La pinu tana yiana dangu hilu, tàka nda ningu hau welingu nuda da hilu da manda ningu àndangu.

¹¹Tàka jàka nda kupinya na hilu na patiki-na na tau, na tau na matiki-ya na hilu nuna ka tau hangàdangu-duyaka hanggangu lai nyungga; hamanai duku nyungga hanggangu lai nyuna.

¹²Na ngerami nyimi wiki, kupimanggai bai rinjungu-mai dimi pa-ngalangu kanyuru welingu la Ngahuna i Ala. Tàka na ma-paihikungu, màtawa kai pa-mukarungu la pawànya na nggàhungu-mu pandula-ya na kabungguru ka na-bonjangu.

¹³Nuya na pakiri-na, na tau na makareuku wàngu hilu pa-hangàtarungu, màta ka na-kamahingu lai Ala ka peku wua-mbunanya pa-nggàhungu wàngu la pa-kaloka-nya jàka nggàraya na papanii-na.

¹⁴Nadu nyungga jàka ku-hamayangu wàngu hilu pa-hangàtarungu, na ndewanggu hamayangu-madu-nanya, tàka na kanandingu nda na paruku-a.

¹⁵Jia ba tuna, nggàra wànggu-aka bàdi? Yianaya napa na pawunda-nggu: Napa ku-hamayangu wàngu ndewanggu, tàka napa ku-hamayangu wàngu-madui kanandingu-nggu. Napa kuludu wàngu ngahunggu, tàka na nyuna, ka kuludu wàngu kanandingu-mbunggu wànggu-madui.

¹⁶Nadu angu dedi jàka mi-pamalangu-nya i Ala ka wàngu ndewa-ami, tàka hi ningu tau hawiangu na manda pinya na hilu pa-hangàtarungu welingu la Ngahuna i Ala, na tau nuna nda peku panii-anapa, “Jia-maduya!” ka wànanya na hamaya pamalangungu-mu; ka ba nda napinya jàka nggàra wàmu.

¹⁷Jiapa ka nahàmu ailulu-kadu nuna na hamaya pamalangungu-mu, ba tuna na hamayangu nuna nda ningu ndoku linguna la tau hawiangu.

¹⁸Nyungga ku-pamalangu-nya i Ala, nadu nyungga wiki ba kupingu pa-kareuku wàngu hilu hangia - hangia pa-hangàtarungu marihi-nggai nyimi mbuu ndàbami.

¹⁹Ba tuna, la pauhi - pauhi ba lumunya i Miri, kurihi mbuhangu-mapa ka kuwunda ana lima mbua kareuku papi tau welingu la pawunda riu rata pulungu la hilu pa-hangàtarungu. Hi kurihi mbuhanya na matungu nu, ka peku ajaru-nggu tau wànggu.

²⁰Angu dedi! Àmbi pa-tandangu hama tuna anakeda. La ngera ma-akatu, màtawa kai pa-daingu hama tuna na anakeda. Tàka la pa-kanandingu màtawa ka hama mambàda matua-kai.

²¹Daa la Huratu Matua ninya yiana na pa-tulihu, “Napanii i Miri, ‘Wàngu pa-palua-nya la tau da ma-kareuku wàngu hilu ngganangu, ba kupanii dànya napa na kabungguru yiana. Jiapa, wàngu pa-palua-nya la tau hangàdangu napa kupanii dànya na kabungguru-nggu; jiapakai ba tuna, nyuda nda darongu-maya duku na paniinggu,’ ” na mawàna.

²²Ba tuna, na pa-wuangu la pa-kareuku wàngu hilu pa-hangàtarungu hau tandaya nduma la tau manda pawai, nda nduma tau mapawai-a. Dàngu na pa-wuangu la pabobaruya na pa-pakaka-na i Ala la tau, jiaya na tanda nduma tau mapawai, nda nduma tau manda pawaia.

²³Jia ba tuna, jàka era pauhi-na na kabungguru, nggubulu-na na kabungguru ka na-kareuku wàngu hilu pa-hangàtarungu, hàla hi nàmunjai duda ba mapira-ha da tau welingu la hambeli, jàka ndia tau manda Karitu, da tau nuda napa ba dakaka-kai bai tau katoba ndàbaha wàda-dunggaika.

²⁴Tàka nyimi angu dedi mbuu ndàbami jàkai patàka-nya na lii welingu lai Ala, hàla hi natàka na haàtu na tau nda Karitu jàka ndia tau la hambeli, hangia - hangia da pa-bobaru-mi napa mbuu ndàbada pawuwa-danja da njalada da tau nuda, hi da-patanda wànja da njalada.

²⁵Hangia - hangia da ma-kawiningu la etina napa wuwa-danyaka, hi lupa na pa-wawangu wikina ba nalumu-nya i Ala. Nyuna napa na-mangaku i Ala langatàka ninya la padua-da nyuda, wàdanggai.

²⁶Ba tuna angu dedi, nggàraya na àndana yiana mbuu ndàbana? Jàka mi-pauhi la palumu-nya i Miri, ningu maludu, ningu ma-ajaru, ningu ma-bobarungu hangia welingu lai Ala, ningu ma-kareuku wàngu hilu pa-hangàtarungu, dàngu ningu ma-pakaloka-nya nuna na kareuku. Tàka nuna mbuu ndàbana lupangu-ma bàdi kai wànya la pa-ajaru dàngu la pahàmu wàna mbuu ndàbana.

²⁷Jàka ningu màta ka ku-kareuku wàngu hilu pa-hangàtarungu jàka wàna, mbulungu ka tau madua jàka ndia dangu-mada-nyaka ka madua haàtua bàdi ka dawàngu pa-pahilu - pahilungu. Dàngu ningumai bàdi mapingu pa-kaloka-nya na papanii-na nuna na tau na ma-kareuku.

²⁸Jàka nda ningu tau mapingu pa-kalokangu, da tau da ma-kareuku wàngu hilu pa-hangàtarungu da-kandii bàdi daa la pauhi. Màta bia ka dapanii dànya i Ala la etida.

²⁹Madua jàka ndia madua haàtu tau maningu lii welingu lai Ala lupangu-ma ka da-patàka-nya na lii nuna, tàka hawiangu la rehi nu ka datimba-nya nuna na papeka-da.

³⁰Tàka jàka era ningu lii welingu lai Ala na matàka-nya na haàtu na ma-mandapu nu la pauhi, na tau na ma-talànga panii, na-pànjangu bàdi.

³¹Ba wàngu patuna nu angu dedi mbuu ndàbami, peku màra haàtu - haàtungu-mi pa-patàka-nya na lii welingu lai Ala, ka peku ngalangu-na mbuu ndàbana lii pa-ajaru dàngu hi na-parukangu papawai.

³²Na pa-wuangu welingu lai Ngahu la pa-patàka-nya na lii welingu lai Ala pekuna ka nauli-nya paraï tau ma-patàka-nya na lii nuna.

³³I Ala, Ala ma-mbuhangu ma-lànyapu-ya; nda Ala ma-mbuhangu ma-kanyaüru-aya duna. Hama tuna na pawàngu la kabungguru-na i Ala mbuu ndàbada,

³⁴da kawini dakandii bàdi la rehi pauhi kabungguru. Nyuda nda pa-pahiangu-aha la pa-kareuku. Nyuda nda peku-ana la pa-pairungu, nuna pa-jàngapu-nya na uku anggama.

³⁵Jàka da-mbuhangu nyuda papinya jàka nggàraya, màta ka da-paàra bianja da leida la uma. Pa-makia wànguya era ningu kawini ma-kareuku la pauhi kabungguru.

³⁶Màla na puluna i Ala tàkana welingu lai nyimi? Jàka ndia mbulungu lai nyimi-aka na ngia pa-patàka-nya nuna na pulungu?

³⁷Jàka ningu tau ma-pàdangu wikina ba ningu pa-wuangu-ya la pa-patàka-nya na lii welingu lai Ala, jàka ndia ba ningu pa-wuangu-ya hangia welingu la Ngahuna i Ala, na tau nuna màta ka napàda-nya, ni jàka nggàraya na pa-tulihu-nggu ba pareta welingu lai Miriya.

³⁸Tàka jàka ningu manda kataku-ya yiana, àmbu eti wadunya.

³⁹Jia ba tuna angu dedi, pamukarungu-wa la pa-patàka-nya na lii welingu lai Ala, tàka àmbi hiri-dunya na tau na ma-mbuhangu pa-kareuku wàngu hilu hangia - hangia pa-hangàtarungu.

⁴⁰Na nyuna bai lakunya nuna nawàngu papakei pa-hàmungu-ma bàdi.