Read Kambera 1 KORINITU 15 Bible Online

1 KORINITU 15 - Kambera bible

1 KORINITU 15

¹Tàka nàhu angu dedi, màta kai namu beliya wànggu na Lii Mànangu welingu lai Ala, na pa-bobaru-nggunggai nyimi àmangu. Mi-kataku-yaka dàngu miwai-yaka i Karitu rukuna nuna na Lii Mànangu.

²Jàka mikata pamàndu-nya jàka nggàraya na pambàda bobaru-nggunggai, na Lii Mànangu nuna na-pamàna-manggai duna; hinggilu-na jàkai pawai dàngu nda piminya.

³Nggàraya na pa-patàka-nggunggai angu dedi, jia-mayai-ka duku na pambàda kataku-nggu. Na ma-paihikungu, hama tuna na pa-tulihu la Huratu Matua, ku-patàka-nggai nu i Karitu nameti lumuda da njalanda;

⁴ba pa-taningu-ya, hàla hi paluri beliya la lodu patailu wàna. Nunambu pa-tulihu-ya la Huratu Matua.

⁵Nyungga ku-bobaru-mbunggainya, i Karitu na-papaluri beli na-paitangu-maka wikina lai Peturu, hàla hi na-paitangu wikina la hakambulu madua pa-pahurungu.

⁶Hàla patuna nu na-handàka pa-itangu wikina la tau lima ngahu rihi makiku-nya. Dangu-mapa welingu lai nyuda da tau nuda luri-madanya-pa nàhu, tau mapira-aha da mambàda meti.

⁷Hàlaika nu i Karitu napaitangumbu wikina lai Yakombu tàka la malamiri la pa-pahurungu mbuu ndàbada.

⁸Tàka la malamiri dehi na-paitangu wikina lai nyunggambu — nyungga ba beringu anarara madedi ndedi rehina![14]

⁹Nyungga pa-pahuru-na i Miri marihi ngia wawaka. Nyungga duku nda ràka-ana pa-pahurungu ka wànangga tau, nadu nyungga ba mbàda pa-mayila-nggunyaka na kabungguru-na i Ala.

¹⁰Tàka paraï ruku mila etina i Ala lupa tunggu yia-duka nàhu. Dàngu nda kahewa-ana i Ala ba najàma-ngga. Màlai jiaka nyungga-maka marihi mbangatu paràma welingu la mbuu ndàbada da pa-pahurungu hawiangu. Na nyuna làti duna nda rukunggu nyungga-aya; tàka rukuna i Ala-maya duna na mambuha-ngga dàngu na maràma dàngga.

¹¹Ba tuna, welingu lai nggamu biaya bai ngalanya na Lii Mànangu — ka welingu lai nyunggakai jàka ndia ka welingu la pa-pahurungu hawiangu-kai — nda pabata wàngu-aya. Na ma-papingi jiaya ba ma-bobaru-nggainya na Lii Mànangu tàka nyimi hi mipawai.

¹²Jàka jiaya i Karitu na pa-bobaru-ma ba mbàda pa-paluri beli-yaka welingu la meti, nggikina hi ningu la hongami nyimi mapanii, na tau meti napa nda pahilu paluri beli-ayapa hi wàda?

¹³Jàka tuba-manaka napa da tau meti ba nda pahilu paluri beli-ahapa, nu na àndana, i Karitu-mbu nda pa-paluri-aya welingu la meti.

¹⁴Dàngu jàka era nda pa-paluri beliya i Karitu welingu la meti, ka nda ningu-apa linguna nyuma ba mabobaru-nggai ngga - nggàra dàngu nda ningumbu linguna nyimi bai pawai, nadu na pawaimi nyimi ba nda ningu ndoku latana ngga - nggàra.

¹⁵Ri - rihi na rukuna nuna, wuwa-nanyaka ba panii ànga-manya nyuma na rukuna i Ala, nadu ba mabobaruya ba mbàda paluri beli-nanyaka i Karitu welingu la meti, bundu nda paluri beli-nanya padua duna paraïna i Ala — jàka tuba duna ba nda pa-paluri beliha da tau meti!

¹⁶Nadu jàka nda pa-paluri beli-mahapa da tau meti, i Karitu-mbu nda pa-paluri beli-aya welingu la meti.

¹⁷Tàka jàka nda pa-paluri beliya i Karitu, na pawaimi ka mbulungu manggadipangu-madua-yaka; nuna na àndana nyimi jiapa-kaipa ba dàngu njalami dàngu ba nda hili ningu ndokupa pa-monungu.

¹⁸Nuna na àndana da tau Karitu da mambàda metimbu nda ana nggàra-apa pamonu-da.

¹⁹Na monungu-nda nyuta lai Karitu jàka padirangu-ma-ana-nyaka la lurinda nàhu la pinu tana,[15] tau marihi dimangu-madua-taka nyuta welingu la mbuu ndàba tau la pinu tana yiana!

²⁰Tàka na ma-langatàka duna i Karitu mbàda pa-pahada belingu-yaka welingu la meti. Jia-yaka yiana na ma-pakaràngi-ya da tau da mambàda meti napa ba pa-paluri beliha.

²¹Nadu na pameti wàngu hi natama la pinu tana paraï ruku haàtu tau, tuna numbu na luri beli welingu la meti pa-wuangu-ya na tau paraï ruku haàtu taumai.

²²Hama tuna na nggubulu-na na tau hi nameti ba napapohungu-duka dàngu i Andamu, tuna numbu napa mbuu ndàbana ba paluri-ya nadu ba na-papohungu-duka dàngu i Karitu.

²³Tàka haàtu - haàtu napa pa-paluri-ya nunjuya na pandàki - pandàkingu-na: la kawungana i Karitu, hàlaka napa tomaya na rapa tàka belina, hi da-pandàkingu da tau da pamangu-na i Karitu.

²⁴Hàlaka nu tàka-nanyaka na mulungu. La rehi nu i Karitu hi na-panyàku hàlaha da pareta, da kuaha dàngu da kapàru mbuu ndàbada; hi namangu pa-pakata belinya napa na kuaha-na ba hanganjiya, lai Ala, na Amanda.

²⁵Na pareta pangalangu-ma bàdi i Karitu, lundu na-panyàku hàlaha lai Karitu paraïna i Ala mbuu ndàbada da muhuna i Karitu.

²⁶Na muhu malamiri dehi na pa-panyàku napa jiaya na meti-duka.

²⁷La Huratu Matua tuna yia na pa-tulihu, “I Ala mbàda panyàku hàla-nanyaka ngara mbutana lai Nyuna,” na mawàna. Lohangu-mananya, “ngara mbutana” ba wàna nda na-awahu-aya i Ala, na ma-panyàku-ya ngara mbutana lai Karitu.

²⁸Tàka ba na-panyàku-yaka nggubulu-na la lumbu pareta-na i Karitu, Nyuna wiki nu, na Ana Ala, napa na-panyàku wikina lai Ala, na mambàda panyàku-ya ngara mbutana lai Nyuna. Tàka i Ala wiki-maka duna napa na ma-pareta ndàbaya nggubulu-na.

²⁹Jàka nda pa-paluri beli-maduha da tau meti, nggikina hi ningu tau pa-parunungu lumuda da tau meti? Nggàra lingu-naka hi da-paloku-ya nuna? Jàka tuba langatàka-maduna napa ba nda pahili paluri beli-ahapa da tau meti, nggàra lingu-naipa hi da-paloku-ya nuna?

³⁰Dàngu nggàra lingu-naka hi ma-mbuhangu nyuma pahangga mànunya na maharui hau lodu - hau lodu?

³¹Angu dedi! Nimbihu lodu nyungga ba ku-patoru-nya na mayila karia-na ba na-bokulu na etinggu rukuna na lurimi bai pawai lai Karitu Mirinda.

³²Jàka tàngaru-ya welingu la ngaba tanggunda pataua, nggàra lingunaka duku ba ku-pajàrungu ba beri hama tuna ma-paràkapu dàngu banda bohuka la paraingu yiana, la Epihu? Jàka ma-tubangu-ya ba nda pa-paluri beliha da tau meti, narihi hàmu-mapa ka tawànya na palara lii tau, “Màlawa ka tangangu ka ta-ngunungu, ka ta-hanggela hawola, nadu haromu ba meti-madu-ndanyaka,” ba wàna.

³³Àmbu na-panyonga-kai! Na panggolu manda hàmu na-paruha-ya na huri na mahàmu.

³⁴Ipàdanya-wa nàhu, dàngu àmbi hilu njala-dupa. Ràka-manaka jàka mimakia, nadu la hongami ba ningupa tau mandedi tandaya i Ala.

³⁵Talànga wanguna ningu ma-paàrangu, “Nggiki-naka na tau meti ba paluri beliya? Nggiki-naka na tauda na pa-wuangu-ha ba hàla pa-paluri beliha?” wàda.

³⁶Nduba langatàka! Na wini na patondu-mi la tana, nda jia ailulu tumbu-ana, jàka ndedi-madu nameti nuna na wini.

³⁷Dàngu na wini na patondumu nu la tana — ka wini uhu nggàndumuya jàka ndia wini hauyakai — jiaya na karohu wini nuna-aka duna na-patondu-mu, ndau tondu mangu hada-anya nu na matumbu napa.

³⁸I Ala wikima duna napa na mawua-nya hadana na wini nuna nunjuya na pa-pakaka-na na pahàmu wàna na wini nuna. Hau mata - hau matangu wini, i Ala na mawua-nya hada wikina na matumbu - matumbu-ka.

³⁹Na tauda da hau dika - hau dika da maningu luringu nda da-pahama ndàba-a. Na tau ninguma duna hadana na tauda, da banda hau-mayai na hadana na tauda; da ma-hawurungu haumbuyai duda na hadana na tauda, dàngu da iyangu hili haumayai duda na hadana na tauda.

⁴⁰Tuda numbu da maninja la awangu dàngu da maninja la pinu tana. Da maninja la awangu ni - ningu mehama duda manandanguda, dàngu tuda numbu da maninja la pinu tana.

⁴¹Na manandangu-na na matalodu hau-mayai duna welingu la manandangu-na na wulangu. Da kandunu-mbu ni - ningumai duda manandangu mehada. Malai da kandunu nimbihu-da ha - haumahai duda na manandangu-da.

⁴²Tuda numbu napa da tau meti da papaluri beli. Da taunda da maninja la reti, jiahaka duda da ma-làjaru, tàka da taunda da pa-paluri beli jiahaka duda da manda hilu làjaru.

⁴³Ba jiaya natani-nya na taunda, na taunda nuna na-kambànga na-maluputu; tàka ba jia-yaka na-paluri beliya, na taunda nuna nahàmu na-kapàru.

⁴⁴Ba jiaya natani-nya na taunda, na taunda nuna ma-pawelingu la pinu tanaya; tàka ba paluri beli-yaka, na taunda nuna tau pawua-na na Ngahuna i Ala-yaka. Ningu tauna na tau ma-pawelingu la pinu tana, tàka ningumai tauna na tau ma-pawelingu lai Ala.

⁴⁵La Huratu Matua ninya na pa-tulihu, “Na kawunga tau, nu i Andamu dika maluri-ya,” tàka i Andamu malamiri Ngahu ma-paluri-ya.

⁴⁶Na mamai mangilu jiaya na ma-pahada taungu, nda ma-pangahu-aya. Na ma-pangahu jiaya na matàka malamiri.

⁴⁷I Andamu na ma-wungangu, pa-padedi welingu la tanaya, tàka i Andamu padua wàna ma-pawelingu la awangu-ya.

⁴⁸Da tau la pinu tana yiana hamada i Andamu na ma-wungangu, na pa-padedi welingu la tana, tàka da tau awangu hama jiangu-maka Nyuna na mamai welingu la awangu.

⁴⁹Hama tuna nyuta nàhu ba jiangu-mata hama tuna i Andamu na pa-padedi welingu la tana, napa nyuta dedi-ndanyaka[16] hama tuna Nyuna na mamai welingu la awangu.

⁵⁰Na pawuku-nggu, angu dedi, jiaya: da taunda da pa-padedi welingu la la ria dàngu tolu, nda peku tama-ada la Pinu Tana Bidina i Ala; dàngu da taunda tiangu da mapeku la pameti nda peku njadi-ada pa-palupangu.

⁵¹Panau-maya yiana na pa-winingu: Nda jia meti ndàba-anda nyuta napa, tàka mbuu ndàbanda nyuta napa ta-panjilungu.

⁵²Na ngerana nuna napa jia njadi harabàndangu biana la ha-kambàdiku wua mata, la rehi palingu-ya na taropitu na pajiaka wàna. Nadu ba rongu-yaka na lingu taropitu, da tau meti napa pa-paluri beliha wàngu tauda na ma-palupangu, tàka nyuta mbuu ndàbanda napa pa-panjilungu-ta.

⁵³Da taunda yiada da mapeku la pameti, pahilu-manja bàdi wàngu taunda da manda peku la pameti, dàngu da taunda welingu la pinu tana pa-pahilu wànja bàdi wàngu taunda welingu la awangu.

⁵⁴Jàka pahilu-njaka da taunda da mapeku la pameti wàngu taunda manda peku la pameti, dàngu da taunda welingu la pinu tana pahilu wànjaka wàngu taunda welingu la awangu, la rehi nu hinaka hi na-pajàngapungu na pa-tulihu la Huratu Matua, “Na meti papamau-yaka; na talu hàrangu-nanyaka!”

⁵⁵“Ha meti nggiyaka na talumu? Ha meti nggiyaka na upahu-mu?” na mawàna.

⁵⁶Na upahu-na na meti jia-duyaka na njala, tàka na njala hi na-pambangatu-ya na rukuna la uku anggama.

⁵⁷Tàka malangu-na i Ala; na mawua-nda talu lumuna i Yehu Karitu na Mirinda!

⁵⁸Jia-duya nu, angu dedi pa-mbuhangu, màtawa kai àtalu dàngu kai màndungu. Ràma pangalangu ndumana i Miri, kai weli eti pa-langatàkangu, nadu bai pi-madunya mbuu ndàbana na paràma-mi ndumana i Miri, napa nda kahewa-ana.