Read Kambera 1 KORINITU 16 Bible Online

1 KORINITU 16 - Kambera bible

1 KORINITU 16

¹Nàhu na ngerada da àmahu da pahungguminja da angunda patau Karitu, kupanau-nggai màta kai wànya na panaungu na pawua-nggunja da kabungguru la Nggalatia.

²La kawunga lodu hau minggu - hau minggu, màta mbuu ndàbami angu dedi kai pa-hinggilu hawutu àmahu, kawàra pajàngapunya na pangala-na haàtu - haàtu. Pahàmu-maha da àmahu nuda ka lupa kutàka, la rehi nuna ka àmbu hilu pa-uhingu-dupa.

³Napa jàka kutàka, ka ku-palewa-ha da tau da pambàda ora etimi nyimi. Napa nyungga kuwuanja huratu ma-karia-nja, ka pekuna ka dangàndi-ha nuda da àmahu hunggu la Yeruhali.

⁴Tàka jàka hada nahàmu-madu jàka kulaku karia-nja nyuda, jiangu-ma napa ba kulaku karia-nja.

⁵Napa nyungga kulua pa-tadalu-kai jàka kuli ningu la Makandonia, nadu ba patikingu-nggunyaka pali ningu lai nu.

⁶Talànga wanguna ku-harangu mandaipa ihu pa-ndàdiku dànggai, lupa ku-panjàpu-mbuya ihu na rehi maringu. Hàlaka nu kai lua pa-kareni-ngga ba ku-pangala-nya na àndanggu la hau pa-ngiangu ma-pandàkingu.

⁷Nda ku-mbuhangu-ma la pali hàmbua ba ku-tadalu-kai nyimi. Jàka na-pahiangu i Miri, ka ku-ndàdiku mandaiki lai nyimi wànggu.

⁸La manggawa-na nu napa ku-ndàdiku la paraingu yiana, la Epihu lundu tomaya na lodu Petakota.

⁹Dangu ngia papeku-na lai yiahu la paràma-ha da paràma maningu lingungu, jiapa ka nadangu kadu na tau na ma-pandubaku.

¹⁰Jàka natàka i Timutiu, nggepi dàngu hàmunya, ka peku hàmuna na etina ba ninya la hongami nyimi, nadu nyuna hama tuna nyungga-mbu maràma ndumana i Miri.

¹¹Àmbu ningudu napa manda kawela-nya nyuna. Ndula-maya ka peku pangala-nanya na àndana ba nabeli dàngu hàmungu lai nyungga, nadu ba nedi-manggunya na tàkana dàngu da angu dedi hawiangu-mbu.

¹²Jàka jiaya na angu dedinda i Apolu, mbàda pambira wundangu-mangguka papekanya nyuna ka na-karia-nja da angu dedi hawiangu palua patadalu-kai nyimi. Ba tuna ndedi na-màndungu-mapa la etina[17] la palua nàhu lai nyimi. Ba tuna napa jàka ningu kalongga-na jiangu-madu ba namai lai nyimi.

¹³Màtawa kai rimangu dàngu kai pa-màndungu la lurimi hama tuna na tau Karitu. Pajàrungu-ma kai toru mbeni dàngu kai kapànduku.

¹⁴Mbuu ndàbana na paraï rukumi, màta kai wànya na mbuhangu-mi.

¹⁵Angu dedi mitanda-mayaka i Hitipanu dàngu da ihi kuru umana; nyuda da makawunga dedi tau Karitu la Akaya. Nyuda weli eti-mada paràma ri - rihi la palumu-nya na banjaru-na i Ala.

¹⁶Ku-kamahi weli etinggai màta nyimi kai tundunja da pairu ngàndinguda da tau tungu nu, hamanai da tau hawiangu da angu ràmada dàngu da angu lumungu-da.

¹⁷Nahàmu na etinggu na tàkada i Hitipanu, i Potunatu dàngu i Akahaiku. Nyuda beringu jia-makaika nyimi lai nyungga.

¹⁸Nyuda da-panggaüru-ya na etinggu hama tuna ba da-panggaüru-ha da etimi nyimi. Da tau tungu nu tatembi-maha bàdi.

¹⁹Da kabunggu - kabungguru dapangàndingu tambida lai i Àkuwila dàngu i Perikila hamanai na kabungguru da ma-pauhi la umada jiamayai ba da-pangàndinggai tambi pambanangu la huri Karitu.

²⁰Mbuu ndàbada da angu dedi lai yiahu da-pangàndi-nggai tambida. Mi-kawàra patambi hàmu etingu-wa la huri Karitu ma-paangu dedingu.

²¹Kubonja-ya nyungga lai yia na tambi pa-tulihu wikinggu: Tambi welingu lai nyungga yia Paulu.

²²Na tau na manda mbuhanya i Miri màta ka nanggàna-ya ràtungu! Maranata — dou Mirima, mainguwa!

²³Màla àruki i Miri Yehu ka napakanyuru-nggai nyimi angu dedi.

²⁴Ku-pandutu-nya na mbuha-nggunggai nyimi mbuu ndàbami ma-pambulungu lai Karitu Yehu. Yemaya na tembi, Paulu