Read Kambera 1 KORINITU 6 Bible Online

1 KORINITU 6 - Kambera bible

1 KORINITU 6

¹Nggikina hi ningu la hongami nyimi na matoru mbeni palua la hakimu na manda tandaya i Ala, la pakàla-ya na angu dedi angu pawaina, jàka era ningu pa-palumu-da dàngu nuna na angu dedina? Nggikina nyuna hi nda nakarai la kabungguru-na i Ala ka na-panjàpu-ya na palakara nuna?

²Ka ndai pinya dimi ba na banjaru-na i Ala napa na matanggu rapatu-ya na pinu tana yiana? Jia, jàka tuba nyimi-madui ma-rapatu-ya na pinu tana yiana, ka nda làda-mami nu la pa-panjàpu-ha da palakara pa-rapatu da manda lalu paihikunguda?

³Màla ka ndai pinya dimi ba nyutaka napa ma-rapatu-ha da palakara-da da papalewa awangu? Rihi-aipa duna da palakara la luri hau lodu - hau lodu!

⁴Jàka datumbu da palakara tungu nu, màla nyimi mi-patàka-manjaka nuda la tau na manda ningu ndoku wai ngerangu la kabungguru?

⁵Langatàka pamakia wànguya! Jiangu-maka duna ba ningu la hongami na ràka ma-manggàna la pakalonggaya na ma-kalutu la honga angu dedi maràngga tau Karitu!

⁶Tàka na belingu-na, na haàtu na tau Karitu lua bia-nanya la tau nda Karitu la pa-pakàla wànya na palakara-na la anguna pa-karitu!

⁷Màtangu pàku la pangàndi palakara la tau nda Karitu; ba ninja da pa-palumungu la honga jua-ami beri tanda kàku-maminya-ka. Rihingu hàmupa ka wàngu paningu malapi-kai jàka ndia ma-parunggi-kai!

⁸Tàka hi nyimi wiki-maai malapi-ya na angumi. Nyimi wiki-maai ma-parunggi-ya na angumi. Dàngu bai lakunya na matuna nu, jia-maahai da angu dedi angu pawaimi!

⁹Mipinya dimi, da tau da manda patundu-nya na pambuha-na i Ala, napa ba nda angu kabungguru-na i Ala-aha? Àmbu na-panyonga-kai! Da tau da matuu ma-kajari, da ma-lumungu marapu, da ma-njuraku, da ma-payorangu la hamada,

¹⁰da ma-manganga, da mamanganga eti, da ma-maüku, na ma-mbuhangu papulu pa-marihaku-ya na anguna, dàngu na ma-kapidihu-ya na anguna — mbuu ndàbada da tau tungu nu napa nda peku-ana la paangunya na kabungguru-na i Ala.

¹¹Ba tau mapira-ha da angumi nyimi àmangu tuna numaka na hurida. Tàka nàhu nyuna, miwuwaka la pa-yahangu welingu la njala. Nyimi mangu mehana i Ala-kaika. Nyimi papeku beli-minyaka dàngu i Ala, nadu nyimi bai waiyaka i Miri Yehu Karitu dàngu paraï rukuna i Ngahu welingu la Alanda.

¹²Ningu mapanii nimbihu-na na tau pekuna la pawunda hàlaya jàka nggàraya, wàna. Tàka nyungga duku nda ningu hàla-a linguna wànggu. Jia jiapa ka napeku ndàba-kadu ba kuwunda-ya jàka nggàraya, tàka nyungga nda ku-pahiangu-a wikinggu ka na-kuaha-ka paraï ngga - nggàra.

¹³Ningumbui mapanii, da pangangu ndumana na kambuha, dàngu na kambu jiaya na manapa pangangu. Tàka nuda da dua matangu napa na-pamolu-nja paraïna i Ala. Na tàda ihina na tau àmbu nawa-dunya la patuu ma-kajari, tàka mbulungu la palumu wànya i Miri. Tàka i Miri napa narada-manya duna na tàda ihi.

¹⁴I Ala na-paluri-yaka i Miri Yehu welingu la meti, tumbuna napa ba napalurita nyuta paraï kuaha-na.

¹⁵Àngu dedi mipinya na tàda ihimi ba nua tauna i Karitu-ya. Jia, peku-naka nu nyungga ba kupiti-ya na hangia na nua tauna i Karitu la patuya nua tauna na kawini kajari? Nda hidama!

¹⁶Jàka ndia, talànga wanguna nyimi ndai pinya ihu na tau na ma-papohungu dàngu tau kajari, ba pambulu dàna-nyaka nuna na tau kajari! Nadu la Huratu Matua ninya na pa-tulihu, “Nyuda ba dadua mbulungu-maada-nyaka,” ba wàna.

¹⁷Tàka na tau na ma-papohungu wikina lai Miri, na Ngahuna i Miri dàngu na ngahuna na tau nuna mbulungu-maada-nyaka.

¹⁸Maraunja da pawunda - pawunda da ma-kajari. Nadu mbuu ndàbada da njala hawiangu-ka pawunda la hambeli tàda ihinanya. Tàka na tau na matu ma-kajari, tungu-nanya manjala la tàda ihi wikina.

¹⁹Nyimi mipinya bàdi na tàda ihimi ba ngia pa-ngiangu-na na Ngahuna i Alaya. Na Ngahu ma-ngiangu daa lai nyimi. Dàngu i Ala wikimaka na ma-wuangu-ya na Ngahu nuna lai nyimi. Na wikimi nyimi nda mangu wiki-aminya, nuna manguna i Alaya duna.

²⁰I Ala nakei-makaika nyimi dàngu mbàda mbayaru panjàpu-mana-nyaka. Jiaduya nu, wànyawa na taumi ka peku wotu wànya i Ala.