Read Kambera 1 KORINITU 7 Bible Online

1 KORINITU 7 - Kambera bible

1 KORINITU 7

¹Nàhu ka kupanii-ya na habata lii na maninya la huratu-mi wànggu. Na haàtu na tau mini jàka nda nalalei, nuna mahàmu-ya.[5]

²Tàka ka àmbu ningu ma-patitiru la patuya na hangia - hangia na manda jiaya, nahàmu-mapa nimbihu-na na tau mini ka ningu papaha-na, tàka na tau kawini ka ningu leina.

³Na lei màta ka na-palundu-nya na wai ngerana ba leiya hanggangu la papaha-na, dàngu na papaha màta ka na-palundu-nya na wai ngerana ba papaha-ya hanggangu la leina; nimbihu-da màta ka da-kawàra pa-lundungu wai ngerada.

⁴Na papaha nda na-kuaha wiki-aya na tàda ihina; na ma-kuaha-ya na tàda ihina na leina. Hamanai na lei nda na-kuaha wiki-aya na tàda ihina; na ma-kuaha-ya na tàda ihina na papahana.

⁵Àmbi pa-maraungu-du dua wikimi la ngera mapalei papahangu. Pekuna jàka nda pirana na mandaina, mili nyuda ba dadua ka da-kawàra pa-hamangu. Ba timi nu jiaya hi maràngga hamayangu, hi nda ningu maparatahu-nggai. Tàka ba tunaka nu, mi-kawàra pa-belingu bàdi, kai kawàra palihi la ngera mapalei ma-papahangu. Jàka nda timi nu napa na-titiru-kai wàndi akatu, nadu ba ndai màka pa-roputu wikimi la pa-itirungu.

⁶Ba kupanii-ya yiana nda hama tuna pareta-aya, tàka hama tuna panaungu-ya.

⁷Làti na parihi mbuhanggu mbuu ndàbana na tau ka natundu-ngga nyungga. Ba tuna haàtu - haàtu mbàda ningu-maka kanyuru mehana welingu lai Ala. Na haàtu ningu kanyuru tuna ni, tàka na haàtui ningu kanyuru tuna nu.

⁸Da tau da mandedi lalei mangoma dàngu da kawini da mambàda kawini meti lei, yiana-yaka na panaungu-nggu lai nyuda: Nahàmu-pa jàka jiapa-hapa ba daluri meha hama tuna nyungga.

⁹Na nyuna angu dedi jàka ndai màka pa-roputu wikimi, nahàmu-pa kai lalei kai mangoma. Nadu ba nahàmu-pa bai lalei bai mangoma, welingu ba na-ruwatu-kai itirungu-mi.

¹⁰Kulanja nyuda da mambàda lalei mangoma yiana-ya na paretanggu: (Làti nda nyungga-a ma-wuangu pareta, tàka i Miri duna.) Na haàtu na kawini na mambàda mangoma màtangu àmbu na-dunjaku-dunya na leina.

¹¹Tàka jàka mbàda dunjaku-nanyaka, na-padaingu bàdi ba nda nahili mangoma, jàka ndia màta ka nabeli la leina. Dàngu na haàtu na mini lei àmbu na-pahewa-dunya na papaha-na.

¹²La hawia - hawiangu yiana-ya na panaungu-nggu — tàka panaungu-nggu nyungga-aya ndia i Miri-a — na tau Karitu na maningu papahangu kawini manda waiya i Karitu, tàka na papaha-na na-mbuhangu paluri dànya nyuna, na tau nuna àmbu na-pahewa dadunya na papaha-na.

¹³Dàngu na haàtu kawini Karitu na maleingu tau manda waiya i Karitu, tàka na leina na-mbuhangu paluri dànya nyuna, na papaha nuna àmbu na-pahewa dadunya na leina.

¹⁴Nadu na lei na manda pawai ràkana wàna-nyaka la paangu-nya na banjaru-na i Ala rukuna ba naleinya paraï papaha pambàda manguna i Ala. Tumbuna na papaha na manda pawai ràkana wàna-nyaka la paangu-nya na banjaru-na i Ala, rukuna ba na-papaha-nya paraï lei pambàda manguna i Ala. Jàka nda tuna nu, da anada hama tuna ana tau kapiru-duhaka, tàka pambàda reki-haka duda nu da anada ba angu banjaru-na i Alaha.

¹⁵Tàka nuna na tau na manda waiya i Ala ka na-dunjaku-nya na papaha-na jàka ndia na leina na ma-karitu, àmbu pamàndu-dunya. Na ngerana yiana na angu dedi kawini jàka ndia mini pa-hàlangu-nanyaka, nadu na pambuhana i Ala, nyimi kai luri papeku.

¹⁶Nadu nyumu angu dedi kawini, ba papaha-kau — na mambàda waiya i Miri — nggiki hama pi langatàka-munya nyumu ba nda peku pamàna-munya[6] na leimu? Hamanai nyumu angu dedi mini ba lei mambàda Karitu-kau, nggiki hama pi langatàka-munya nyumu ba nda peku pamàna-munya na papaha-mu?

¹⁷Màtawa haàtu - haàtu ka na-palànyapu-ya na lurina tundunya ba na-kapipi-ya paraïna i Miri, hama tuna na pambàda kawukuna i Ala ba napaau-nya la papawai lai Nyuna. Nunaya duku na kalaratu na pa-ajarunggu la hau kabunggu - hau kabungguru.

¹⁸Ngera hama tuna na tau na pambàda kàri ba na kataku-ya na paaungu-na i Ala, àmbu na-pakakangu-du la paàli-nya na tanda kàrina. Hama-mbunai na haàtu na pandedi kàri ba napaau-nya paraïna i Ala, na tau nuna àmbu nakarai-du la pakàri-ya.

¹⁹Nadu ba tundunya na kalaratu kàri jàka ndia ba nda patundu-nya, hamama-ada ba nda nggàra linguda. Na malingu duna jia-maaya ba katundu-nja da pareta-na i Ala.

²⁰Màtawa haàtu - haàtu ka na-padaingu ba naluri hama tuna na hadana ba na-kataku-ya na paaungu-na i Ala.

²¹Ba napaau-nggau, nyumu ka atakau, àmbu handuka wadunya bau patandanya na rukuna nuna. Tàka napa jàka ningu pekuna bau pahàlangu, ka jiayaka hiu pahàlangu.[7]

²²Nadu na ata na mambàda pawai lai Miri, tauna i Miri-yaka na ma-pahàlangu. Dàngu na tau pahàlangu na mambàda pawai lai Miri, nyuna atana i Karitu-yaka.

²³Mbàda palundu-mana-nggaika wilimi ba nakeikai paraïna i Ala. Jia-duya nu, àmbi pahiangu-du wikimi la paata-nggai tau.

²⁴Ba tuna, angu dedi, jiapa nda nggikina na hadami ba paaunggai, màtawa ka na-padaingu na lurimi angu i Ala.

²⁵Nàhu na ngerada da tau da mandedi lalei mangoma. Na ngerana nuna nyungga ndedi ku-ngalangu ndokua pareta ngga - nggàra welingu lai Miri. Na nyuna ruku pa-namungu-na i Miri, nyungga ba tau ràka parongu-ka, màta ka kuwua-nja panaungu wànggunggai.

²⁶Ba tapinya mbuu ndàbana na pahanduka wàngu na maora-nda la rehi nàhu, ba kureki-ya nahàmu-mapa na tau ka napadaingu paluri wànya na hada lurina nàhu.

²⁷Jàka mbàda ninguka papaha-mu àmbu kehangudu pa-pahàlangu welingu la papaha-mu. Jàka ndedi ningu papaha-mu àmbu himbudu papaha-mu.

²⁸Tàka jàka mulalei mu-mangoma, nuna nda njala-aya. Tumbuna na haàtu na bidi kawini jàka na-mangoma nda manjala-aya. Jia-aya, nyuda da malalei da ma-mangoma napa hangga-danya na handuka dangu. Nyungga duku màta ka peku hinggilu-da welingu la handuka nuda wànggu parinju-nggu.

²⁹Na pawuku-nggu nyungga tuna nu, angu dedi: Nyuta nda nadangu-apa na kalongganda. Piti welingu nàhu na tau na mambàda ningu papahangu, màta bia ka naluri hama tuna na manda ningu papahangu-ya;

³⁰na tau na mahii, màta bia ka naluri hama tuna tau manda handuka-ya; na tau na mariki, màta ka hama manda hawola-ya; na tau na mambàda kei, màta ka hama manda ningu ngga - nggàrangu-ya;

³¹dàngu na tau na maningu ulangu la ngera pinu tana, màta ka naluri hama tu biana ba nda nggàra ningu ulana. Nadu ba nda namandai-apa yiana na pinu tana, la dalu hadana na maninya nàhu, napa na-molungu!

³²Na parinju-nggu màta nyimi kai pahàlangu welingu la handuka. Na tau na manda ningu papahangu, na-pambulu-maanya na kanandingu-na la hangia - hangia na ngerana i Miri, nadu ka nahàmu wàngu na etina i Miri, ba wàna.

³³Tàka na tau na maningu papahangu, napa nadangu-mapa na kanandi-nanya na ngera pinu tana, nadu ka nahàmu wàngu na etina na papaha-nggu, ba wàna;

³⁴hupu hàla luana pa-biwangu-nanyaka na kanandingu-na. Na haàtu na kawini na manda mangoma, jàka ndia na haàtu na bidi kawini, nadangu ningu na kanandi-nanya na ngerana i Miri, nadu ba na-mbuhangu ka pekuna na tauna dàngu na hamangu-na ka manguna i Alaya. Tàka na kawini na mambàda ningu leingu, na-pambulu-nya na kanandingu-na la hangia - hangia ngera pinu tana, nadu ba na-mbuhangu ka nahàmu wàngu na etina na leinggu, ba wàna.

³⁵Hi ku-tulihu hàlaya na rukuna yiana ndumana na pahàmu wàna na wikimi nyimi, màta ka kuhiri-nja lai ni lai na nda wànggua. Na pambuha-nggu jia-aya màta ka daliya na ma-deningu dàngu na maràka-na wànggu-anggai, dàngu ka pekuna bai pambulu-nya kanandingu-mi lai Miri, wànggu.

³⁶Jàka ningu haàtu tau ba nakaka-ya ba nda ràka-ana ba tunanya nu na kawini tubana tàka nda peku roputu-na wikina, dàngu ka ku-kanoma-ya na bidi kawini nuna jàka wàna, puli bianya ka nawànya na mahàmu la etina.[8] Nyuna nda nanjala-a jàka dapakanoma nyuda.

³⁷Tàka jàka ningu haàtu na mambàda botaya la etina la panda kanoma-ya na tubana,[9] dàngu ba nabota-ya nu nda ningumbui ma-pambana-ya, nu ba tuna nu nahàmu, mili namàka nyuna pa-pajàngapu-nya.

³⁸Na kawàndi-na, na tau na mapaumangu[10] nahàmu, tàka na tau na manda pa-umangu[11] na-rihingu hàmuipa.

³⁹Na haàtu na kawini na mambàda mangoma, la nditaku-na na mini lei-nanyapa ba naluri-pa. Tàka ba nameti-ka na leina, peku wàngu etina pahili mangoma la pambuha-na; mili nu nyuna ka pa-umangu Karitu-ya.

⁴⁰Na nyuna rihi utungu-manapa jàka nda nahili mangoma. Nuya na wininggu nyungga, tàka ba ku-kanandi-nya hi kutiki-ya nuna ruku kuaha-na na Ngahuna i Ala-maya.