Read Kambera 2 KORINITU 1 Bible Online

2 KORINITU 1 - Kambera bible

2 KORINITU 1

¹Angu dedi kabungguru-na i Ala la Korinitu dàngu mbuu ndàbana na banjaru-na i Ala la nggubulu Akaya. Nyungga, Paulu, pa-pahurungu-na i Karitu Yehu, na pawotu ruku pawuku-na i Ala, anguma i Timutiu na angu dedinda,

²ma-monungu màla àru i Ala Amanda dàngu i Miri Yehu Karitu, ka na-wuangu-ya na kanyuru dàngu mànjaku lai nyimi.

³Pa-wotungu-ya i Ala, na Amana na Mirinda i Yehu Karitu. Nyuna Ama malalu hàmu etiya, dàngu Nyuna na Ala na mawua-nya pa-màndungu wàngu eti na tauka.

⁴Nyuna ma-pamàndu-nja da etima la nggàra handuka bia na pahunggu-ma, ka pekuna ba da-màndungu tuda nu da etima na pawua-nanggama i Ala, ma-ngalangu-mbu nyuma pa-pamàndu-nja da etida mbuu ndàbada da tau la dalu handuka-da.

⁵Da mayila - mayila da pahunggu-na i Karitu mbàda dangu-madaika duma da pahunggu-ma. Dàngu rukuna i Karitu da etima nyuma màndungu langatàka-madanya-ka.

⁶Era hungguma ma-handuka, nuna jia-mayaka na pa-màndungu wàda da etimi lumuna na pa-mànangu wàmi. Jàka pamàndu-njaka da etima nyuma, nyimii dimi da-màndungu wàngumbu da etimi, hi peku màkami la pa-pajàrungu la handuka - handuka-mi, hama tuna na pahunggu-ma nyuma.

⁷Na kawàndi mànuma na pimanya nyuma ba nda ana nggidiku-da da etima rukuna na ngerami nyimi, nadu ba pi-mamanggai nyimi bai mayila dànggama nyuma. Dàngu jiambu-duyaka ba tuna nu nyimi hi pamàndu karia-nggama dàngu nyuma.

⁸Angu dedi! Màta ka dapinya wàmanggai rukuna na handuka na pahunggu-ma la ngabana la Ahia. Na mayila na pa-hambeta-ma lalu mbotuya ba mapàda-nya, hi lupa nda ningu-mapa monungu-ma la paluri;

⁹ba mapàda-nya hama tu-ma-anaka na hukungu meti. Tàka hi natumbu na matuna nu, màta ka àmbu ma-monungu màka wikima, ka mbulungu mamonu-nya i Ala-a na ma-paluri tau meti.

¹⁰Nyuna-maka na ma-pamara-kama welingu la hanggàri bokulu pameti wàngu.[1] Dàngu nyuna-mbuka napa na ma-pamara-kama la lodu - lodu malamiri, nadu ba lai Nyunadu na ngia pa-monungu-ma.

¹¹Mapi-manya paraï ruku da hamayangu-mi ndumama nyuma, i Ala napa nahili pamara-kama welingu la ma-hanggàri. I Ala na-orangu la pa-kanyuru-nggama ba hema-nanja da hamayangu-mi da madangu ndumama nyuma, dàngu jia-duyaka napa hi nadangu na tau na ma-pamalangu-nya i Ala.

¹²Nyuma ma-hamemu, nadu daa la eti daluma ba pi-kawàndi-mama-nyaka na lurima la pinu tana yiana — ri - rihi na papuingu-ma dàngu nyimi — ba mbàda palaku-manyaka wàngu eti tànji[2] eti yahangu-mamaka. Nu ba malaku-nya, nda wàngu-manya manggàna taua, tàka wàngu-manya na kapàru na pawua-nanggama i Ala.

¹³Da pa-tulihu-ma lai nyimi jia-aha da hangia - hangia da paràka pambaha-mi dàngu da paràka pa-jàngapu-mi. Nàhu ndai jàngapu hàmu-a-kama, tàka ku-monungu napa mi-jàngapu paha - hàmu-nggama. Jia ba tuna nu, napa la rehi tàkana i Miri Yehu, hamemu wàmi-nggamaka nyuma, hama tuna nyumambu ba ma-hamemu wànggai nyimi.

¹⁵Ruku pimanya nunadu-ka làti nyungga la wungana hi ku-pakakangu la pa-tadalu-kai, ka peku ngalangu-mi kanyuru pandua wundangu.

¹⁶Nyungga ku-patikingu pa-tadalu-kai, nàhu ba talànga lakunggu la Makandonia dàngu hi kuhili laku li lai nyimi jàka kubeli, ka peku ndula-mingga la àndanggu ba ku-pangalangu la Yundia wànggu.

¹⁷Tàka ku-panjilu-nyaka na pa-pakaka-nggu, màla, tanda-nanyaka nu ba nda na-màndungu na wininggu? Ba jiaya na patikingu-nggu la pa-pakaka-nya nuna, wàngu-nggunya eti wiki-ma-angguka, tiangu “wua” hi wànggu, tàka hili tiangui “ndia” hi wànggu?

¹⁸Lumuna i Ala na ràka pawai, ba kuràndi-kai, nda “wua” dàngu nda “ndia”-aya.

¹⁹Nadu i Yehu Karitu, na pa-bobaru-danggai nyimi paraï da i Hila dàngu i Timutiu dàngu lupa nyungga wiki nda tau “wua” dàngu “ndia”-aya. Tàka làti duna Nyuna jia-mayaka na pahema wàna “wua” ba wàna i Ala.

²⁰Nadu ba lai Nyuna-maka i Ala, “wua” ba wàna rukuda mbuu ndàbada da paràndi-na. Palata-nya nuna-maka nyuta “Amingu” hi wànda lai Ala lumuna i Yehu Karitu. Hi kiri tuma nu ka pekuna ba maraku-nya i Ala.

²¹I Ala wikima duna mangu rukungu nyuta hi ta-màndungu la pa-pambulungu dàngu i Karitu; Nyunama duna na mapindi pawingu-nda nduma wikina.

²²Ndumana nuna-maka i Ala hi na-pakaràngi-ya ba mangu-nanda nyuta, hi nawua-ndanya na Ngahuna daa la etinda, ba kawuku-ya rukuna nawua hàla-nandaha napa da paràndi-naka.

²³I Alama duku na hakahii-nggu — nadu ba napinya na ihi etinggu — hi nda kutoma palua la Korinitu, nadu ka àmbu da-kahàdiku da etida wànggunggai.

²⁴Nyungga nda ku-pambana-akai jàka nggàraya bàdi na pawaimi, nadu ba mbàda pawai langatàka-madu-mika lai Karitu. Nyungga duku ràma dà-anggunggai ka peku parukangu-mi bai pa-ohangu.