Read Kambera 2 KORINITU 12 Bible Online

2 KORINITU 12 - Kambera bible

2 KORINITU 12

¹Tubangu-ma ba nda ningu linguna la pa-hamemu. Na nyuna ba tuna na-patikingu-mapa na etinggu la pa-hamemu wànja da ngga - nggàra da pa-pabowa-na dàngu da pa-paita-nangga duku i Ala.

²Kutanda-ya nyungga na haàtu na tau Karitu la hakambulu patu mbua ndaungu na ma-làpahu, na pa-padita la pangia mahupu jangga la awangu. (Nda kupi-anya hi jiaya na tau langatàka-manaka na pa-padita, jàka ndia hi pa-pajilikungu-jua-aya — i Ala-a duna na mapinya.)

³Kuhili beli-kinya handàkangu: Kupinya na tau yiana pa-padita-ya patama la Pirundau. (Nda kupinya hi jiaya na tau langatàka-manaka na pa-padita, jàka ndia hi pa-pajilikungu jua-aya — i Ala-a duna na mapinya.) Lai nu na tau nuna narongu-ha da ngga - nggàra da manda peku la papeka-ha paraï tau dàngu ba nda pa-pahiangu-mbuya na tau la patiki-ha.

⁵Na rukuna na tau nuna ku-mbuhangu nyungga pa-hamemu, nda jia-aya na rukuna na tau wikinggu nyungga. Jàka jiaya na ngera wikinggu nyungga, jia-aha da ngga - nggàra da ma-pawuwa-ya na lamanga-nggu duku da pa-hamemu wàngu ba wànggu.

⁶Jàka era mbuhangu-nggu pa-hamemu wàngu ngga - nggàra, nda ku-mbuhangu-a duku pa-kakòlulu ànga; ma-tubangu-a duku na papanii-nggu. Na nyuna ku-roputu-ma wikinggu duku, ka àmbu ningu tau makaka parihi-ngga welingu la pambàda itana na pa-palaku-nggu, jàka ndia na pambàda ronguna na papanii-nggu.

⁷Tàka ka àmbu kutika pa-pajangga wikinggu rukuda da pai - itanggu nuda da manda ningu hamangu, nawua-ngga hangia panyaki la ihinggu ba beri madàka pawàna i Kambàliku-ya. Nuna na panyaki na pa-wuangu-ka jia-yaka na papalu wànguka ka àmbu ku-pajangga wikinggu.

⁸Mbàda pandailungu-ngguka pa-hamayangu lai Miri ka na-payila àrunya nuna na hidu welingu la ihinggu.

⁹Tàka nahema i Miri, “Nyungga ku-mbuhanggau nyumu, toma-mana-nyaka nu ndumamu nyumu; nadu na kuaha-nggu ba jia-mayaka na parihi màka wàna lai nyumu, ba talànga lamanga-mu,” wànangga. Nunaya na pakiri-na hi narihi hàmu na etinggu la pa-hamemu wànja da lamanga - lamanga-nggu, nadu la rapa lamanga-nggu, jia-maayai napàda-nggunya i Karitu ba naopa wàngga kapàru-na.

¹⁰Jiaya duku hi ku-hawola wànja da lamanga-nggu. Jia-mbuyai hi ku-hawola jàka lumuna i Karitu duku, nyungga ba napulu-ngga tau, ba kuhunggu ma-kaliutu, ba keha mànungga dàngu ba ku-ngalangu handuka. Nadu jàka ku-lamanga, ba jia-maya na rapa halangatu-nggu.

¹¹Langatàka, nyungga ku-pahuri tau ma-ndubangu — na nyuna nyimi dimi maruku-nya hi kiri tunggu nu. Làti duna nyimima bàdi mawotu-ngga. Nadu jiapa ka nda ningu ndokukai lingunggu, tàka nda ana ngia wawa-anggu welingu lai nyuda hiana da “pa-pahurungu” manda ningu hamangu!

¹²Da pahangàta - pahangàtarungu dàngu da ngga - nggàra da manda ningu hamangu, lupa da paràma - paràma da ma-bokulu mbàda pa-paita manjilungu-makaika ka danjadi mbuti ba pa-pahurungu-maka duku nyungga.

¹³Màla la nggi-kiaya-ka nu na ngia panda inga wàngukai nyimi, pamenja-nja da kabungguru hawiangu? Ka jia-kidua-yaka ihu: nyungga ba nda ku-pahanduka-kai la patanggu-ngga paluri wànggu. Màlangu-kimika dimi rukuna yiana na panjala-nggu!

¹⁴Nàhu mbàda pandailu wundangu wàngu-ngguka pamai pa-tadalu-kai. Tàka nda ku-mbuhangu-a duku pa-handuka-kai nyimi, nadu na pambuha-nggu ba nda jia-aha jàka nggàraha da mangumi, tàka jiakai nyimi wikimi duku. Nadu ba nda ana-a duna da mahimbu-nja paluri wàda da ina amada, tàka da ina amada bàdi da mahimbu-nja paluri wàda da anada.

¹⁵Jiaya nu nyungga hi dàngu hàmu eti-manggu ba kuwàngu etinggu la pa-maraku wa hàlanja mbuu ndàbada ndumami nyimi, jiapa-kadu na tàda ihi wikinggu nyunggambu. Jàka tuna nu pàkudu na namu-nggunggai nyimi, màla ràka-manaka nu ba ndai tika pa-mbuhangga nyungga?

¹⁶Ba tuna jiaya wàmi wàngguka ba nda ku-handàkangu paharui-kai nyimi. Na nyuna ba tuna ningu mapanii, ba lalu kabinggilu-ka nyungga yia; dàngu ba ku-ngalangu utungu nyungga lai nyimi ruku kahili-nggunggai.

¹⁷Nggiki peku-naka! Màla rukuda da tau papalewa-ngguka bàdi ba kunggari utungu welingu lai nyimi ai?

¹⁸Ku-palewa-ya nyungga i Titu pamai pa-tadalu-kai nyimi, dàngu ku-palewa-ha da angu dedi Karitu hawiangu malaku karia-nya nyuna. Màla i Titu ka nu na mapiti utungu welingu lai nyimi? Nyuma duma pa-kadua-ma hama-mana na pawuku-ma ba maràma, dàngu hama-manai na huri ràma na pawàma!

¹⁹Talànga wanguna bai kaka-kama pa-kinjangu pàku-manya nyuma lundu nàhu pa-kahiri wikima hanggangu lai nyimi? Hanjàliru ailulu-minya! Napinya i Ala mbuu ndàbana na papanii-ma ba nunju-manya na pawuku-na i Karitu. Dàngu mbuu ndàbana na pawunda-ma ka pahada-nya na luri pangahu-da wàmanggai.

²⁰Na-kadiku na etinggu napa la rehi tadalu-nggunggai, hi kutoma bianggai ba nda hama tuna na pamonu-nggu, dàngu nyimii dimi hi toma bia-mingga ba nda hama tuna na pamonu-mi. Napa hi ningu bia ma-pahànggangu, ma-kapihi, ma-karaü eti, ma-karuhi ngera wikina, maràngga pa-pulungu, maràngga parunda, mangamba dàngu ma-pariwatungu.

²¹Ku-mangàdatu napa la rehi tàkanggu, hi pawawa bia-nangga i Ala la hanggami nyimi dàngu napa hi hii bia-nggunyaka ba nadangu la hongami nyimi na manjala àmangu, ba nda na-panjilungu dàngu ba nda na-pànjangu pa-namatu-ya na paraï paruku-da na ma-kajari, na ma-iraku dàngu na manda ràkana.