Read Kambera 2 KORINITU 3 Bible Online

2 KORINITU 3 - Kambera bible

2 KORINITU 3

¹Màla nu la paita wàngu mata beri hama tuna wotungu-manya wikima? Jàka ndia ma-ngalangu-maka bàdi huratu wotungu ndumami nyimi, jàka ndia welingu lai nyimi, hama tuna na pa-karuhi-da tau hawiangu?

²Nyimi wiki jia-makaika huratu wotungu-ma nyuma, na pa-tulihu daa la etima nyuma, dàngu na papina dàngu na pambaha-na nimbihu-na na tauka.

³Nyuda wiki daita-maya, nyimi ba beringu huratu pa-tulihu-na i Karitu-kai na pa-pangàndingu la ruku lumungu-ma nyuma. Na huratu nuna na pa-tulihu, na panda wàngu wai mitingu, tàka wàngu Ngahuna i Ala na maluri; dàngu nda pa-tulihu la watu tulihu-aya, tàka la eti tau.

⁴Hi mapanii tuma nu, ka ba mapi hàmu-dunya i Ala rukuna i Karitu.

⁵Nda nggàra-a latana duma ka mapanii wàngu ba àtalu-ma nyuma-maya la pa-palaku-ya na paràma yiana, tàka i Alama duna na mawua-nggama pa-duluku wàngu.

⁶Nyuna na ma-paduluku-kama la pa-lumungu ndumana na hau pa-ràndingu bidi; na pa-ràndingu na ma-kanderungu la Ngahuna i Ala, nda la uku pa-tulihu-a. Nadu na pa-tulihu ba mangàndi pameti wànguya, tàka na Ngahuna i Ala ba ma-wuangu luriya.

⁷Ba pandoi-ya dàngu ba huratu-ya la watu nu na pa-ràndingu mangàndi meti, na handaraku-na i Ala na-hanggilangu turuku-ya na matana i Muha. Na handaraku-na nu kanjupu hanggilangu-ya hi lupa nda da-duluku pa-tàngaru-ya na matana i Muha paraï banjaru Ihirailu, jiapakai ka mbàda ngeri màlina la rehi nu na hanggilangu la matana. Ba tuna, jàka pa-karàngi wànya hanggilangu ma-bokulu tungu nu ba pandoi-ya na pa-ràndingu mangàndi meti,

⁸ka narihi-aipa duna pa-hanggilangu ba pa-karàngi-ya nu na pa-ràndingu pawua-na na Ngahuna i Ala.

⁹Jàka tuna nu na-hanggilangu-na na pa-ràndingu na mahuku-nya na tau, ka narihi-maka duna pa-hanggilangu na pa-ràndingu na ma-pakalongga-ya na tau la pa-papeku dàngu i Ala.

¹⁰Peku-mbuna papanii, na ma-hanggilangu la wungana, nda na-hanggilangu-apa ba na-pahipungu ka na hanggilangu la rehi nàhu.

¹¹Jàka tuna numaka na hanggilangu-na na hangia na ma-torungu hawutu, ka narihi-aipa duna pa-hanggilangu nu na hangia na ma-palupangu.

¹²Paraï ruku ba ninya na monungu-ma la matungu nu, jia-duyaka hi matoru mbeni papanii tuma nu.

¹³Nyuma duma nda hama tuana i Muha ba na-palumburu-nya na matana ka àmbu naita-ya paraï banjaru Ihirailu nu na-kamàda dàngu na munangu-na la matana i Muha na handaraku-na i Miri.

¹⁴Na kanandingu-da nyuda na-palumburungu-ka. Dàngu lupa toma la lodu nàhu na kanandingu-da na-palumburu-nya tamalingu ba dambaha-ha da mbuku rukuna na pa-ràndingu ndai. Hi na-ngalangu pa-tawainggahu nuna na tamalingu, mbulungu-ana jàka pambulu dànya i Karitu.

¹⁵Nàhumbu, jàka mbaha-danja da mbukuna i Muha, na-palumburu-manjapa tamalingu na kanandingu-da.

¹⁶Na nyuna na haàtu na tau jàka na-hurungu lai Miri, na tamalingu nuna pa-wainggahu-ya welingu la matana.[3]

¹⁷Na, na Miri ba wànda ni kawai, jiaya i Ngahu-duka. Dàngu jàka ngginiya na Ngahuna i Miri, lai nu nimbunya na marandeka.

¹⁸Nàhu nyuta duta mbuu ndàbanda, nda na-palumburu-anjapa tamalingu da matanda, tàka nyuta paninu-ndanyaka na hanggilangu-na i Miri Yehu. Dàngu jia-duyaka tapanga - ngalangu pa-panjilungu la pahama-nya Nyuna; parukangu pamandai parukangu-ndanyaka pa-hanggilangu. Na hanggilangu nuna ma-pawelingu lai Ngahuya, tàka na Ngahu nuna jiaya i Miri.