Read Kambera 2 KORINITU 5 Bible Online

2 KORINITU 5 - Kambera bible

2 KORINITU 5

¹Nadu ba mapi-manya, jàka nyànggaru-ya na uma — ni na taunda — na ngia pandaunda yia la pinu tana, napa i Ala na-payema-nda hau uma la awangu, na pawulu wikina i Ala na ma-torungu lundu nu - nu.

²La umanda yiana nàhu, nyuta ta-kaingu, ba lalu rinjungu-nda pangia-nya na umanda la awangu.

³Na uma nuna jia-duyaka na taunda na mabidi.

⁴La ngala ngia-ndanyapa na uma na ma-welingu la pinu tana yiana, i - ingunda padua ba lalu mbotuna na bukunda. Nda jia-aya ba rinjungu-ndanya pa-pahàlangu welingu la taunda na ma-welingu la pinu tana yiana, tàka ba rinjungu-ndanya pa-pandàni wànya na taunda na ma-welingu la awangu, ka peku kuaha-nanya na taunda na malua-ya la meti paraïna maluri.

⁵Na ma-payema-ndanya nuna, Nyuna wikima duna i Ala, tàka hi nawua-ndanya na Ngahuna ka jiaya na kawuku.

⁶Jia-duyaka ba tuna nu da etima hi da-kapànduku mànu. Mapi-manya ba talànga ngiangu-mapa la tauma yiana, mamarau-nyapa na uma ngia pa-ngiangu-ma napa dàngu i Miri.

⁷Nadu ba maluri palata-manya na pawaima lai Karitu, nda ma-palata-anya la ngga - nggàra paita wàngu mata,

⁸nunaya na kirina hi da-torungu da etima. Ma-mbuhangu-mapa duma la pa-pahàlangu welingu la tauma yiana, ka peku ngiangu-ma anguma i Miri.

⁹Jia-duyaka nu hi ma-pamukarungu langatàka keha ka nahàmu na etina Nyuna, nu ba ninggama la umama lai yiahu, jàka ndia ka lai nàhukai.

¹⁰Nadu ba jiangu-maka duna nyuta mbuu ndàbanda ba bindata la rapatu-na i Karitu, dàngu napa haàtu - haàtu na-ngalangu himbalu-na tudana na paraï paruku-na la pinu tana yiana — na paruku-na na mahàmu jàka ndia na ma-akatu-kai.

¹¹Nyuma mapinya àndana na mangàdatu-nya i Miri; nuna-duya na pakiri-na hi ma-pamukarungu ka napi hàmunya tau na ngera wikima nyuma. I Ala natanda pa-ihiku-manggama duma, dàngu kumonu-mbunggai nyimi kai tanda pa-ihiku-nggama la etimi.

¹²Keha ka dawotu-nggama nda wàma-anggai hi kiri panii tuma nu. Wua-manggai lata mahàmu-a duma kai hamemu wànggama, ka peku pingumi jàka nggiki wàmika bàdi bai hemaya na tau na ma-tàngaru ningu kaba mata taua, tàka nda na-tàngaru niaya na hurina.

¹³Jàka jia-kama nyuma, tubangu-ma ba ita-kama ba hama tuna ma-katoba-kama, lumuna i Alaya. Dàngu jàka ita-kama ba nda nggàra ehima, lumumi nyimiya.

¹⁴Na mbuhangu-na i Karitu-maka na ma-kuaha-kama nyuma, dàngu mapàda-manya duma, jàka haàtu-na na tau na mameti ndumana na tau mbuu ndàbana, nuna tandana mbuu ndàbana na tau ba mbàda meti-naka.

¹⁵I Karitu nameti ndumana na tau mbuu ndàbana, ka pekuna da tau da maluri, ka àmbu dahilu luri-dupa nduma wikida, tàka ndumana i Karitu, na mambàda meti dàngu na pa-paluri beli lumuda nyuda.

¹⁶Jia-duyaka nu, nyuma nda ma-pabila-anyapa na tau tundunya na hukutu tau. Tubana la wungana nyuma ma-pabila-nya i Karitu la ngera tau, tàka nàhu duma ndia-apa.

¹⁷Na tau na mambàda pambulu dànya i Karitu, tau bidi ailulu-yaka. Na ma-memangu nda hili ni-anyapa — mbuu ndàbana mabidi-yaka.

¹⁸Nuna mbuu ndàbana paraï rukuna i Alaya. I Ala la ngaruna i Karitu, na-paloku-ya ka tahàmu beli dàngu Nyuna, hi na-patanggu-nda la pairu ngàndiya na tau hawiangu ka pekuna ba nahàmu dàngu i Ala.

¹⁹Nyuma ma-bobaru-ya ba ruku li padua-na i Karitu, i Ala na paloku-ya na tau hi da-pahàmungu beli dàngu wikina Nyuna.[4] I Ala ba nawunda-ya nuna, dàngu nda karuhi-nanja da njala pawunda-na na tau hangganya na wikina Nyuna. Tàka mbàda patanggu-na-nggamaka nyuma i Ala la pa-bobaru-ya na lii nuna.

²⁰Jia-duya nyuma yia papalewa-na i Karitu-kama. La ngaruma nyuma i Ala wikima duna na ma-patàka-nya na lii languna. Wànya na tamuna i Karitu, nyuma ma-kamahi langatàka-nggai, nggepi-yawa na-pajolangu-na lima i Ala, na ngia papeku-na bai pahàmu dànya Nyuna.

²¹I Karitu nda nanjàla-a, ba tuna i Ala natuya la patanggu-nja da njalanda nyuta, ka peku pahàmu dàndanya i Ala ruku pa-mbulungu-nda dàngu i Karitu.