Read Kambera 2 KORINITU 6 Bible Online

2 KORINITU 6 - Kambera bible

2 KORINITU 6

¹Nadu nyuma ba ràma dàmanya i Ala, ma-kamahi langatàka-nggai ka àmbi padima-nya na hàmu etina i Ala.

²Daa la Huratu Matua napanii-ma i Ala: “La rehi pa-pamàjangu ku-patingi-manggauka, dàngu la lodu pa-mànangu, kundula-makauka,” wàna. Namu pahàmu-nya, nàhu jiayaka na rehi pa-pamàjangu. Nàhu jiayaka na lodu pa-mànangu!

³Nda mabihu-a duma ka panjala-ya na pa-paloku-ma. Jia-duyaka nu hi ma-pamukarungu ka àmbu haàtu-mbu pa-pawiti-ma la paningu latana pawunda-ya na ngerana nuna.

⁴Hinggilu-na, la ngga - nggàra bia mbuu ndàbana, ma-pawuwa-maya duma ba atana i Ala-kama. Nadu, la mbuu ndàbana na handuka hangia - hangia patoru-mamanya duma pa-hambeta-ya:

⁵ba pa-mayila-kama, ba patama-nggama la uma kapàtangu, dàngu ba kambukuru-kama; ràma dira matiki-kama, naingu nda katuda-ma, naingu nda nganguma.

⁶Mawàngu tànjima, wàngu manggàna-ma, wàngu torungu-ma dàngu wàngu hàmu etima, ba ma-pawuwa-ya ba atana i Ala-kama nyuma. Dàngumbu ba wàngu monungu-ma la pa-ndulangu-na na Ngahuna i Ala, dàngu wàngu mbuhangu ma-kunduhu;

⁷pa-kariangu na bobaru-manya na lii welingu lai Ala dàngu na kuaha-na i Ala, ba ma-pawuwa-ya ba atana i Ala-kama nyuma. Nyuma pamàndu-manya na pawuku-na i Ala beri madàka-manya la patungu dàngu la pa-kahiri wiki.

⁸Nyuma patembi-kama, tàka pa-paakangu-mbu-kamai; pa-wotungu-kama tàka pa-pulungu-mbu-kamai. Nyuma ma-patàrihungu, ba tuna da-kambàliku wàda-nggamai.

⁹Nda patanda-aha wàda-nggama nyuma, tàka natanda hàla-kama duma tau. Dakaka-ya ba meti-manyaka, tàka hi lurima-padua. Jiapa ka pa-mayila-kama, nda mameti-a.

¹⁰Jiapa ka pa-hawina-hakadu da etima, tàka nggaüru mànu-madanya duma da etima. Ba wàngu paita-kama mamila, tàka rukuma nyuma nadangu-maka na tau na mawulu. Ba wàngu paita-kama nda nggàra ndoku maningu-nggama, tàka na ma-langatàka mbuu ndàbana mangu hàla-mamanya.

¹¹Angu dedi pa-mbuhangu la Korinitu! Nyuma nu paloha ailulungu-mama-nyaka lai nyimi. Mbuu ndàbada da ihi etima wàlahu hàla-mama-njaka.

¹²Nda da-kabitangu-a duma da etima hanggangu lai nyimi, nyimia dimi ma-kabitangu etimi hanggangu lai nyuma.

¹³Nàhu màtawa ka kupeka-nggai hama tuna da ana wikinggu. Wàlahu-mbuyai dimi na etimi hanggangu lai nyuma.

¹⁴Àmbi pa-mbulungu-du dàngu da tau manda pawai lai Yehu; nuna nda na-jàngapu. Nggiki peku-naka na mahàmu ka na-papohungu dàngu na ma-akatu! Nda napeku-a na harii ka na-papohungu dàngu na kapàtangu.

¹⁵Nda napeku-a i Karitu ka na-pahamangu dàngu i Kambàliku. Nggàra-yaka na ngia pa-pahama-na na tau Karitu dàngu na tau nda Karitu?

¹⁶Nggàra-yaka na papuingu-na na Umana i Miri dàngu na uma marapu? Nyuta yia Umana i Mirita, nu i Ala na maluri. I Ala wiki-maka mapanii: “Napa Nyungga ku-ndàdiku la padua-da nyuda, dàngu kuluri angunja nyuda. Napa Nyungga Ala-danggaka, tàka nyuda banjaru-nggunja, wàna.

¹⁷Jiaduya nu, dunjaku-nja da tau da manda tandaya i Ala, dàngu kawàri wikimi welingu lai nyuda. Àmbi panua daa ndokunya na ma-iraku, jiaya hi ku-kataku-kai.

¹⁸Napa Nyungga Ama-mingga, tàka nyimi ananggu-nggai, nuya na paniina i Miri Mahupu Mbiha,” wàna.