Read Kambera 2 KORINITU 8 Bible Online

2 KORINITU 8 - Kambera bible

2 KORINITU 8

¹Angu dedi, nyuma ma-mbuhangu kai pimbunya na rukuna jàka nggiki hama hàmuna i Ala la kabunggu - kabungguru la Makandonia.

²Nyuda pambàda kamangu-mahaka la handuka - handuka mambotu. Ba tuna nyuda la padua handuka - handuka nuda, nggaüru bia-danya dàngu lalu màjangu etiha la pa-wuangu ba ndulaya na tau hawiangu, jiapa-kadu ka dira milaha.

³Kupi hàmu-manya ba ràka pamàka-mada ba da-wuangu, talànga wanguna narihi-mbuipa. Dàngu nda ningu ma-paràha-nja,

⁴da-pambanangu nyuda pakarai-kama, ka ma-pandulangu-mbui duma nyuma pawua-nja hunggu da banjaru-na i Ala la Yundia, wàda.

⁵Ba da-wuangu nyuda na-làpahu halawàla-manyapa welingu la pamonu-ma làti. La kawunga-na da-pajàmangu wikida nyuda lai Miri, hi mangupa lai nyumambu, pa-jàngapu-nya na pambuha-na i Ala.

⁶Nunaya na pakiri-na hi matika pa-pandudu-ya i Titu — na mambàda pakiri-nya yiana na pa-paloku — ka peku pangala-nanya na pa-paloku mahàmu yiana la hongami nyimimbu.

⁷Mi-manyori-ma nyimi la mbuu ndàba biana: Mi-manyori la ngera pawai, la ngera pa-paluhu kanandingu, la ngera pingu, la ngera ma - màtu pa-paloku, dàngu la mbuhami-nggama nyuma.[5] Jiaya nu, màta kai manyori-mbu la pa-paloku-ya yiana na mahàmu.

⁸Ba kutunggai-nya yiana la hangga nda pareta-aya. Tàka ba kuwàngu pa-jàkaru-nya jàka nggiki maràna-na na tau hawiangu la pandula-ya na anguna patau, rinjungu-mbunggunya la papinya jàka nggi natàka ningu na mbuhangu-mi.

⁹Nadu ba pi hàmu-diminya, ba kanjupu mbuha-nanda nyuta i Yehu Karitu, na Mirinda. Nyuna nawulu, tàka na-panjadi wikina la pamila lumumi nyimi, ka màtawa ba namila Nyuna, kai wulu nyimi.

¹⁰Tundunya na pa-kanandi-nggu nyungga, ràka-manaka bai palundu-nya na pambàda pakiri-mi la ndaungu na ma-làpahu. Ba nyimidu ma-kawungangu pa-kanandi-nya dàngu pa-pakiri-nya na pa-paloku nuna.

¹¹Màtawa nàhu kai pangala-nya tundunya na pamàka-mi. Màtawa kai pa-ringgitungu la pa-panjàpu-ya nuna na pa-paloku, hama tuna àmangu bai pa-ringgitungu la pa-pakaka-nya nuna.

¹²Jàkai wàngu etimi nyimi la pa-wuangu, na-kataku-maha duna da pawua-mi paraïna i Ala, palata-nja jàka nggàraha da maninja lai nyimi, nda pa-palata-anja jàka nggàraha da manda ninja lai nyimi.

¹³Nda nianya duku nyungga na pawuku-nggu ka pamara-ya hawiangu welingu la wai ngerana, tàka hi pambotu-kai nyimi. Tàka nàhu ba na-patoma ndàba-duka lai nyimi, ràka-manaka nyimi kai patoma-ya na manjaka-nja nyuda. Napa jàka ningu manjaka-nggai dimi nyimi, tàka hi na-patoma ndabai lai nyuda jiangu-ma napa dandula-kai nyimi. Nu ba timi nu jiaya hi mi-kawàra ngalangu ba lumunggai.

¹⁵Daa la Huratu Matua ninya na pa-tulihu: “Na tau na ma-ngalangu padangu, nda narihi-a, tàka na tau na ma-ngalangu hawutu, nda najapu-anya,” na mawàna.

¹⁶Ma-pamalangu langatàka-nya i Miri ba tunanya nu i Titu, hi hama karàhaku-mama la pandula-kai nyimi!

¹⁷Nadu ba nda mbulungu biana ba nawàngu etina i Titu la pa-pajàngapu-nya na pakarai-ma nyuma, tàka nyuna wikimbu wàngu eti wiki-mana la pandula-kai nyimi, hi lupa bota wiki-mananya duna la palaku lai nyimi.

¹⁸Anguna nyuna ma-pakaria-mbunya na haàtu angu dedi na pambana tembida da kabungguru mbuu ndàbada rukuna na paràma-na la pa-bobaru-ya na Lii Mànangu welingu lai Ala.

¹⁹Hinggilu-nai, na tau nuna mbàda papindi-mayaka dàngu patiki-da da kabungguru-mayaka la pa-karaha-kama nyuma la ngia palaku-ma. Nadu nyuma napa ba laku-manyaka la pa-patàka-nja da hunggu, ka peku pa-mangara-nya i Miri, dàngu ka peku ita-minya ba wàngu-manya eti-mama duma la pa-pandulangu.

²⁰Nda uku pa-nanjarungu-kama ka àmbu ningu tau ma-panjala-kama nyuma la ngera patàka-manja nuda da hunggu bokulu tungu nu.

²¹Màta ka taràma pa-tànjingu wàma nyuma, nda mbulungu biana la hanggana i Miri tàka la hangga angunda pataumbu.

²²Da karia-na i Titu dàngu nuna na angu dedi ba wànda, nimanyai-pa na haàtu na angu dedi. Mbàda kama mànu-mama-nyaka dàngu mapi-manyaka nyuna ba na-mbuhangu mànu pa-pandulangu. Tàka nàhu ri - rihi-maka ba na-mbuhangu pandula-kai nyimi, nadu ba na-bokulu na pamonu-na lai nyimi.

²³Na ngerana i Titu, nyuna angu lànggi-manggunya, na maràma dàngga nyungga la pandula-kai nyimi. Dàngu jàka jiaha nuda da angu dedi da madua, da ma-karia-nya nyuna, nyuda tau papalewa-da da kabunggu - kabungguru dàngu jia-mahaka da pa-hamemu wàngu lai Karitu.

²⁴Mamonu-manggai nyimi kai paita-nja bai mbuhanja nyuda, ka napi ndàbanya kabungguru bai mbuhanja nyuda, dàngu jàka nggàraya na pa-hamemu-ma na ngerami nyimi ba ma-deningu-ya.