Read Kambera 2 KORINITU 9 Bible Online

2 KORINITU 9 - Kambera bible

2 KORINITU 9

¹Làti duna nda nggàra ihi wàngu-apa ba ku-tulihu-nggai rukuda da pa-ndulangu nàhu da pa-pangàndingu la kabungguru-na i Ala la Yundia.

²Kupi-manggai bai mbuhangu pa-pandulangu, dàngu mbàda hamemu wa-manggu-nggaika la hanggada da tau Makandonia. Kupeka-nja nyuda, ba welingu la ndaungu na ma-làpahu-maka da angu dedi la Akaya ba mbàda rimangu-daka pa-wuangu hunggu. Dàngu na pa-ringgitungu-mi nyimi nawànda-yaka na pa-ringgitungu-da hawiangu da madangu lai nyuda.

³Nàhu ku-palewa-ya i Titu dàngu da angu dedi da madua lai nyimi, ka pekuna jàka nggàraya na pa-hamemu - hamemu wàma na ngerami nyimi àmbu hama tuna ma-kakòlulu-ya. Jia ba tuna, màtawa ka mbàda rimangu-mi, nadu mbàda rimangu-daka ba wànggu-manjaka.

⁴Na-kadiku na etinggu, napa hi ningu bia tau Makandonia matundu-ngga, jàka jia-yaka na mainggu lai nyimi. Tàka napa jàka datoma-nggai dàngu ndedi rimangu-mi, ka makia nda uku-aka-mapa, nadu ba mbàda panii-maka nyuma ba pa-monungu langatàka-makai nyimi! Tàka nyimi wiki imakia-mai dimi.

⁵Nuya na pakiri-na palewa mangilu-mahaka bàdi nyuda ka da-paloku-ha da hunggu da paràndi-mi hi wànggu. Hi kiri tunggu nu ka pekuna napa jàka kutàka, nuda da pawua-mi ka mbàda màtu-daka. Nu ba tuna nu, wuwa-nanyaka ba pawua weli eti-minja nuda da pawua-mi, nda ruku wua lerangu-ami.

⁶Namuya! Na tau na ma-hàbarungu wini hawutu - hawutu, ana hawutu-mai duna pangala-na napa. Tàka na tau na ma-hàbaru pada - dangu wini, napa namuti pada - dangumai duna.

⁷Màtawa nimbihu-na na tau ka nawàngu etina ba na-wuangu. Àmbu na-kanodaru ba na-wuangu jàka ndia àmbu nawua mangu lerangui, nadu i Ala ba nambuha-nya na tau na ma-wuangu wàngu mbaha etina.

⁸Nambiha-ma duna i Ala pawua-nggai kanyuru mabundu làndangu, hi peku ningu mànu padua jàka nggàraya na pa-kalana-mi; màlai narihi-mbuipa hi peku pa-itangu wàngumi hàmumi dàngu pa-namungu-mi.

⁹Daa la Huratu Matua ninya na pa-tulihu rukuna i Ala: “Nyuna naha - hàbarungu la tau mila; na màjangu etina na-padaingu lundu nu - nu,” na mawàna.

¹⁰I Ala na ma-payema-nya wini na tau na ma-hàbarungu dàngu pangangu ndumanda nyuta. Nyunambu na ma-payema-nya dàngu na ma-paworu-ya jàka nggàraya na pa-hàbaru-mi, hi peku bonjangu-na na ruku màjangu etimi.

¹¹Jia ba tuna nu napa namàtu ndàbaka dimi lai nyimi la ngga - nggàra bia hi pekuna ka nua naingu-na bai wuangu wàngu màjangu etimi. Dàngu da pawua-mi da papabe - berima jia-haka da ma-pawiti-nya hi kiri danguna na tau na ma-pamalangu-nya i Ala.

¹²Nadu paraï ruku hàmu eti timi nu, nda jia biaya bai patoma-ya na pa-kalana-na na banjaru-na i Ala, tàka jia-mbuya na ma-pawiti-nya napa hi kiri danguna na tau na ma-pamalangu-nya i Ala.

¹³Rukuna na hàmumi na pa-pajiliku-mi, dangu na tau Karitu la Yundia napa da mawotu-nya i Ala, nadu ba daita-ya na tuturu-mi hanggangu la Lii Mànangu rukuna i Karitu na pakiku-mi. Dàngumbu, dawotu-nya i Ala, nadu ba lalu màjangu etikai la papabe - berinja ndumada nyuda dàngu mbuu ndàbada da tau hawiangu-ka wàngu ngga - nggàra na maninya lai nyimi.

¹⁴Napa nyuda da-hamaya-manggaika duda ndumami nyimi ba dàngu kanjupu namu-danggai rukuna ba lalu hàmu etiya i Ala lai nyimi.

¹⁵Màlawa ka ta-pamalangu-nya i Ala rukuna na pawua-na na manda najaru!