Read Kambera NGGALATIA 1 Bible Online

NGGALATIA 1 - Kambera bible

NGGALATIA 1

¹Dou da angu dedinggu la kabunggu - kabungguru la ngabana na tana Nggalatia. Nyungga yia, Paulu, dàngu mbuu ndàbada da angu dedi nu da tau Karitu da angunggu, mamonu-nya ka màla àruki i Ala na Amanda, dàngu i Miri Yehu Karitu ka nawua-nggai kanyuru dàngu mapeku mahàmu. Nyungga duku hi pa-pahurungu-ka nda lindi ninguna la taua jàka ndia nda ruku taua mawotu-ka, tàka pawotu-na i Yehu Karitu-ka dàngu i Ala na Amanda na mambàda paluri beliya Nyuna welingu la meti.

⁴Paraï pa-karadaku-nya na pambuha-na i Ala na Amanda, na pa-jàmangu wikina i Karitu panjadi kameti maraku lumuda da njalanda, ka peku pahàla-ta welingu la akatu-na na rehi nàhu.

⁵Pa-wotungu-ya i Ala lundu nu - nu! Amingu.

⁶Ku-hangàtaru-nya na rukumi nyimi angu dedi! Nyimi pa-paaungu-kai paraïna i Ala ruku pa-namungu-na i Karitu,[1] tàka nàhu kanjupu renggakai pa-taluru-nya i Ala tàka hi katundu ninya na “lii mànangu” na mahauya welingu la Lii Mànangu na ma-welingu lai Ala.

⁷Làti duna nda ningua “hili hau lii mànangu”. Tàka ninja da tau da ma-bobaru-ya lai nyimi na “lii mànangu” rukuna i Karitu ba dawàngu pa-panjingu-njànganya hi lupa da pa-hariwatu-ha da kanandingu-mi.

⁸Na tau na ma-bobaru-ya na “lii mànangu” na mahauya welingu la Lii Mànangu pambàda bobaru-ma màtawa ka nahuku-nya paraïna i Ala — jiapa ka jia wiki-kama nyumakai jàka ndia ka papalewa welingu la awangu-yakai!

⁹Mbàda panii-mamaka àmangu, tàka nàhu kuhili paniiya: Na tau na ma-bobaru-nggainya na “lii mànangu” na mahili hauya welingu la Lii Mànangu na pambàda ngalami welingu lai nyuma, màtawa na tau nuna ka nahuku-nya paraïna i Ala!

¹⁰Nu ba panii tunggu nu keha ka na-pajia-ya tau ba pa-pahurungu-ka wàngguka ihi nu? Nda hidama! Monu-nggunya na-pajia-nangga i Alama-a duku. Duruhungu-nggunya ihi nu pa-pamandangu eti tau ka nambuha-ngga tau? Jàka tuna numapa na pawunda-nggu, nda atana i Karitu-aka.

¹¹Lupangui pi-manyaka bàdi angu dedi ba nda welina la taua nu na Lii Mànangu na pa-bobaru-nggu.

¹²Nda pangala-nggu la tau-aya nuna na lii langu dàngu nda haàtu-mbu ma-papeka-ngganya. I Yehu Karitu wikima duna na mabowa-ngganya na ihina nuna na Lii Mànangu.

¹³Jiangu-maka ba mbàda rongu-minya rukuna na nggoda-nggàduku luringgu àmangu ba haàtu tau ma-kadupulu la anggama Yahundi-ka. Pi-maminya ba kanjupu mbana etika ba ku-palua-nya lima na kabungguru-na i Ala dàngu ba dira kukutungu-ka keha ka ku-weharu-ya ba wànggu.

¹⁴La ngera nunjuya na anggama Yahundi, kurihi-manjapa duku da tau Yahundi rànjanggu. Kanjupu ringgitu-ka la ngera huri lawiti-da da boku la mangilu-ma.

¹⁵Na nyuna ruku hàmu etina i Ala, napindi-ka nyungga ba ndedi-mapa kudedi, tàka hi napaau-ngga la palumu-nya Nyuna.

¹⁶Na-paloha-ngganya na Anana paraïna i Ala ka peku bobaru-nggunya na Lii Mànangu rukuna na Anana la tau manda Yahundi. La rehi nu nda haàtu-a ngia palua-nggu pakarai timbangu.

¹⁷Nda kulua-mbu la tau la Yeruhali da mambàda mangilu-ngga panjadi pa-pahurungu. Tàka kulaku ningu la tana Arapu, hàlaka welingu lai nu hi kuhili beli la Ndamàhiku.

¹⁸Palàngangu tailu mbua ndaungu lua-nggunyaka la Yeruhali ka ma-patanda dàngu i Peturu. Hakambulu lima mbua lodu-anggu ba ku-ndàdiku lai nyuna.

¹⁹Nda ku-jàngapu-aha da pa-pahurungu hawiangu hinggilu-na i Yakombu[2] na anguna paluhu i Miri.

²⁰Yiana na pa-tulihu-nggu ma-deningu-maya. Napi-mangga i Ala ba nda kambàliku-anggunya!

²¹La hambeli-na nu lua-nggunyaka la ngabada da tana Hiria dàngu Kilikia.

²²Lundu toma la rehi nu ndedi-mapa datanda pawingu-ngga paraï da kabungguru Karitu la Yundia.

²³Dawàngu parongu panii tau bia: “Na tau na ma-pamayila-kama àmangu nàhu bobaru-nanyaka rukuna na pawai na pa-pamànji-na làti àmangu,” da mawàda.

²⁴Ka wotu-danyaka i Ala na rukunggu nyungga.