Read Kambera NGGALATIA 2 Bible Online

NGGALATIA 2 - Kambera bible

NGGALATIA 2

¹Pa-làngangu hakambulu patu mbua ndaungu beli-nggunyaka la Yeruhali anguma i Mbàranamba, dàngu ma-karia-mbunya i Titu.

²Nu hi kulua la Yeruhali, jiaya ba mbàda puru peka-nanggaka i Ala, lupangu ulua-maka bàdi, ba wànangga. Tàka la pauhi pa-mehangu-ma dàngu da liku uru lai nu pakaloka-nggunjaka na Lii Mànangu pa-bobaru-nggunja da tau nda Yahundi. Maa ba nda ku-mbuhangu-a duku ka kahewa-maana na paràma-nggu la rehi na ma-làpahu hamangui la rehi nàhu.

³I Titu na ma-karia-ngga tau Yunani-ya, tàka nda pa-pambana-aya la panunju-ya na huri kàri,

⁴jiapa ka ningukai tau ma-pambana-ya nuna. Nyuda nu jiaha da tau da matama kangunduhu la kaloka-nda nyuta hi da-panjàda wikida ba beri angu dedi-ndaha. Nu hi datama kangunduhu, jiaya la pa-kanuturu-ya na marandeka-nda rukuna ba ta-mbulungu dàngu i Karitu Yehu. Da-mbuhangu pa-pabeli-nda la mandapu-nda na ma-wungangu ba ata-tapa,

⁵tàka nyuma duma nda jia tamaï ànga-ama lai nyuda, maa ba mangga-mamanya duma ka pa-daingu ihi mbàngi-nanya na Lii Mànangu ndumami nyimi.

⁶Tàka ba tuna, nda ningua mabidi pa-karuhi-da da tau da paràka parongu — nyungga duku nda ningu hekangu-na jàka paràka parongu-ha jàka ndiakai, ba nda napindi-a kaba mata tau duna i Ala.

⁷Tàka da-pajia-mbuyaipa paraïda tau da paràka parongu ba mbàda pangaba-nanggaka duku paraïna i Ala la pa-bobaru-ya na Lii Mànangu la tau nda Yahundi, hama tuna ba mbàda pangaba-nanyaka i Peturu la pa-bobaru-ya na Lii Mànangu la tau Yahundi.

⁸Nadu i Ala na mawua-nya kodi màka i Peturu la panjadi pa-pahurungu nduma tau Yahundi, nawua-mbungga nyungga kodi màka la panjadi pa-pahurungu nduma tau nda Yahundi.

⁹I Yakombu, i Peturu dàngu i Yuhani ba hada jiaha da liku uru kabungguru, da-pajia-ya ba mbàda wua-nangga-nyaka paraïna i Ala yiana na wai ngaba ma-patukingu. Nu, kei-danyaka na limana i Mbàranamba dàngu na limanggu nyungga ba tanda pa-kanduangu-ya. Hàlaka nu pahama-manyaka la ngaru pamera-manyaka la lima nyuda dàngu nyuma, ba la hongada da banjaru nda Yahundi-kama na ngia paràma-ma duma nyuma, tàka nyuda duda la honga banjaru Yahundi-ha.

¹⁰Na pakarai-da na madidi-aya, jiaya ka mainga-ha da tau mila. Tàka hi jia pàkuyai na uhu etinggu[3] duku la pawunda matungu nu.

¹¹Ba namai la Atiokia i Peturu ku-rawaku-ya la hangga madangu, maa ba nda na-padeningu-du na pawàna.

¹²La mangilu-na na-mandapu pangaa dànja da angu dedi da tau nda Yahundi. Tàka ba datàka-ka da tau pa-paràha-na i Yakombu wiliru-nanyai welingu la angu dedi da tau nda Yahundi dàngu nda nabihu-apa pa-angu ngangunja nyuda, paraï pa-mangàdatu-nja da tau da mawuku-ya ka kàri ndàbaya na tau.

¹³Da angu dedi Yahundi hawiangu da-kikungu-mai duda la pa-kapilandu hama tuna i Peturu hi lupa na-kahala katundungu-mbu i Mbàranamba la pa-kapilandu hama tuna nyuda.

¹⁴Nu ba kuita-yaka na nggàduku-da ba nda na-patangangu la pa-deningu-na na Lii Mànangu, ka panii-nggunyaka i Peturu la hanggana mbuu ndàbana na tau na maninya lai nu: “Nyumu ba tau Yahundi-kau, jàkau paluri tau nda Yahundingu, ka nggikina nàhu hiu hàniya na tau hawiangu la paluri hama tuna tau Yahundi?” wànggunya.

¹⁵Deningu-mana pa-namatu-nya na dedima, nyuma duma tau Yahundi-kama dàngu “nda tau njala ma-welingu la tau nda Yahundi-akama”.

¹⁶Jiapa-kai ba tuna mapi-manya duma, hi kiri hàmu belina na papuingu-na na tau dàngu i Ala, mbulungu-ana ba ruku pawai lai Yehu Karitu-a, ba nda ruku pahàra-nya na uku anggama-a duna. Nyuma wikimbu mapawai-ma duma lai Yehu Karitu, ka peku pa-hàmungu belima dàngu i Ala ba ngahama papawai, nda jiaya ba ruku pahàra-manya na uku anggama. Nadu ba pahàra-nya na uku anggama, nda jia haàtu-a mapeku pa-pahàmungu beli dàngu i Ala.

¹⁷Ma-paringgitungu-ma duma ka nahàmu beli na papuingu-ma dàngu i Ala ba mawàngu pa-pambulu dànya i Karitu la lurima. Tàka ba mawunda-yaka na matuna nu hi lohangu bia-nanyai ba “tau njalambu-kamapa” hama tuna da tau nda Yahundi, ka nu, jiaya i Karitu-ka ihu na ma-pawiti-nya hi kiri njalama? Jiangu-ma ba ndia-a!

¹⁸Jàka ku-pahada belinya na uku anggama na pambàda nyungguru-nggu, paloha-dunggu-nyaka nu ba tau mambàda pangga uku-kaka nyungga.

¹⁹Na nyuna nyungga duku mbàda meti pahàlangu-ngguka la uku anggama — nu na uku wikima duna na ma-pameti-ka — ka peku luringgu ndumana i Ala. Mbàda pa-harikangu-kaka dàngu i Karitu.

²⁰Nàhu nda nyungga-apa duku maluri, tàka jiaya i Karitu duna na maluri daa la wikinggu. Na luringgu na papàda-nggu nàhu jiaya na luri ruku pawai la Anana i Ala na mambuha-ngga dàngu na mambàda mangejingu wikina ndumanggu nyungga.

²¹Nda ku-pahalela-aya na pa-namungu-na i Ala. Jàka nahàmu beli na papuingu-na na tau dàngu i Ala rukuna ba na-pahàra-nya na uku anggama, ka nda ningu-apa linguna na metina i Karitu!