Read Kambera NGGALATIA 4 Bible Online

NGGALATIA 4 - Kambera bible

NGGALATIA 4

¹Na nyuna ku-jakaru-nyaka bàdi yiana: Ba ndedi natoma matua-na na haàtu ana manduma-nja da pa-bànjalu amana, ningu tau matanggu hamata-ya dàngu matanggu tanara-ya na pahàmu wàna nyuna lundu nadeni-nya na matua-na pa-namatu-nya na hupu lii amana. Ba hangganya nyuna nu na ana, hama biana ba hanggangu haàtu ata, jiapa-kai ka jiaya na mamangu ndàbanja da banda.

³Tuna numbu duta nyuta: Ba ndedi ta-matua, na atanda paraïna kanandingu memana na pinu tana.

⁴Tàka ba na-patutungu-ka na rehina paràha-nanyaka na Anana paraïna i Ala, na pa-paana haàtu tau kawini hi naluri ningu la kaloka uku anggama.

⁵Nu ba tuna nu, padita-nahaka da tau da maluri la kaloka uku anggama; ka peku-mbunda nyuta panjadi ana Ala.

⁶Nu ba ana Alakai,[6] paràha-nanyaka na Ngahuna na Anana paraïna i Ala ka natama la etimi dàngu la etinggu nyungga, nu i Ngahu na mawara, “Dou Ama, na Amanggu,” na mawàna.

⁷Jia ba tuna, nda ata-akaipa, tàka anakai-ka. Tàka ba ana Alakai, napa i Ala nawua ndàba-nggaiha da pa-payema-na ndumada da anana.

⁸Àmangu, ndai tanda-aya i Ala, tuna nuduka hi na-atanggai paraï da kawaha da pa-alangu, tàka làti duna nda hidama ka Alaha.

⁹Na nyuna nàhu tanda-minyaka i Ala, jàka ndia narihi jàngapu-pa i Ala natanda-kai nyimi. Ba tuna, ka nggikina dimi hi beli la kanandingu memana na pinu tana da ma-lamanga dàngu da mamila? Ka nggikina dimi hi hili mbuhangu-minyai papa-atangu wikimi la kanandingu nuda?

¹⁰Imbabunja da lodu da pa-hekangu, da wulangu da pa-hekangu, dàngu da ndaungu da pa-hekangu.

¹¹Na-nggidiku na etinggu jàka era kahewa pàku-anaka na jàranggu ndumami nyimi.

¹²Dou da angu dedinggu duku! Ku-kamahi pambana-nggai hama àrungga nyungga. Nadu ba kuhama-dunggaika nyimi. Nda nggàra manjala pawunda-mi lai nyungga.

¹³Jiangu-mapa bai namuya jàka nggàraya nu na ma-pawitingu la kawunga-na hi kiri bobaru-nggunya na Lii Mànangu lai nyimi. Na ma-pawiti-nya nu jia ba kuhidu.

¹⁴La rehi nu ndai mayita-angga nyungga, jiapa-kai ka jiaya na ihinggu na pa-kamangu wàngukai la rehi nu. Jiapa inggepi-mbukapa hama tuna nanggepi-mi papalewa-na i Ala jàka ndia hama tuna nanggepi-minya i Karitu Yehu wiki.

¹⁵Kanjupu pa-ohangu-kai la rehi nu. Tàka nàhu, nggiyaka na pa-ohangu-mi? Kupi-manya duku la rehi nu jàka pekuna làti bai mbuhangu-ma pahiku-ha da wua matami la pawua-nggaha nyungga.

¹⁶Ka màla nàhu papa-ndanya wàmi-nggaka nu, rukuna ba kupeka-nggainya na ma-padeningu?

¹⁷Dira ringgitu-ha nu da tau hawiangu ba dahimbu-kai nyimi, tàka manda hàmuha da pawuku-da. Na parinju-da jia-ma-aya la pabota-ya na papuingu-mi dàngu nyuma, ka peku ringgitu-mi la patundu-nja nyuda.

¹⁸Nahàmu-mai nyuna la pa-ringgitu-nja da mahàmu - mahàmu-ka, mili àru nyuna ka timi nu mànuma, dàngu àmbu mbulungu ba ningga nyungga-a.

¹⁹Dou da ana mbuhanggu duku! Nàhu hili mayila-nggunyaka lumumi nyimi. Ku-mayila hama tuna na mayila-na na haàtu ina ba na-habolangu anana. Pa-daingu mayila-manggu napa jàka ndedi-mapa ihembanja da hembana i Karitu!

²⁰Dira rinjungu-ka nàhu ka ningga la pahiku-mi nyimi ka peku panii dànggunggai ba kuwàngu pa-haleli-ya na nggorunggu, maa ba nda pi-manggu-nyapa jàka nggiki-nggunggaika bàdi!

²¹Dou da angu dedinggu duku ma-mbuhangu paluri la kaloka-da da uku anggama, màla làti kai patinggi-ngga! Napa kupanii-nggainya jàka nggàraya duna na pa-tulihu la Mbuku Ukuna i Muha.

²²Lai nu pa-tulihu-ya ba tau madua-ha da anana i Ambarahàmu: Na inana na haàtu ataya, tàka na inana na haàtui tau marandeka-ya.

²³Na anana na kawini ata, hama dedi-mana na made - dedika ba ruku pa-patumbu la huri tauya. Na nyuna na anana na kawini marandeka, hi nadedi jiaya ba ruku panjanji-na i Alaya.

²⁴Nuna nu ta-ngalangu patuya ngerangu. Nuda da kawini madua pelu jia-haka da dua mbungu pa-njanjingu: Na hapungu welina la Palindi Hinai — jiaya i Hanggaru-duka, ba dadedi da anana ataha.

²⁵Jia ba tuna, i Hanggaru jiaya na Palindi Hinai la tana Arapu-duka, na maninu maünya[7] na paraingu Yeruhali dàngu nggubulu-na na mangia-nya nàhu da mambàda njadi ata.

²⁶Na nyuna na Yeruhali la awangu, Yeruhali ma-marandeka-ya duna, tàka jia-yaka na inanda nyuta.

²⁷Maa ba ninya na pa-tulihu la Huratu Matua, “Hawola-wa dumu ha kawini mbuta, manda pa-ana! Mu-hanggela hawola-wa dàngu kakàlaku-wa dumu mandedi handàkangu papàda-nya na pakati kajia paraï pa-habola! Nadu ba darihi dangupa napa da anana na kawini pa-dunjaku leina welingu la kawini maningu leingu,” na mawàna.

²⁸Dou da angu dedinggu duku! Nyimi ana Alakai papa-anangu ruku njanjina i Ala; nyimi mihama-nya i Ihàku.

²⁹La rehi nu na ana na madedi na pa-patumbu ruku pambuha tau na-pamayila-ya na ana na madedi ruku pambuha-na na Ngahuna i Ala. Tuna numbu nàhu.

³⁰Tàka nggàraya na pa-tulihu la Huratu Matua? Tuna yia na pa-tulihu lai nu: “Wànggaya na kawini ata dàngu na anana, nadu na anana na kawini ata nda angu pa-kangehangu-ana ngeru pa-bànjalu amada dàngu na anana na kawini marandeka,” wàna.

³¹Nu ba tuna, angu dedi, nyuta nda jia-ata anana na kawini ata; tàka anana na kawini marandeka-ta duta.