Read Kambera NGGALATIA 5 Bible Online

NGGALATIA 5 - Kambera bible

NGGALATIA 5

¹Nyuta nàhu marandeka-ndanyaka, maa ba na-pamarandeka-dutaka i Karitu! Jia ba tuna pamàndu-manya na marandeka-mi, dàngu àmbi bihu-dupa ka hili atanggai.

²Namu-maya, jàkai karai ka kàrikai, nda ningua linguna i Karitu lai nyimi, wàna-duka nu. Nyungga wikima yia ma-tamungu Paulu mangu wàngu.

³Kuhili panamu-nya na tau na makarai ka kàriya ba ngera-mananya la panunju-ya nggubulu-na na uku anggama!

⁴Keha ka ta-pahàmungu beli dàngu i Ala jàka wàmi hi kiri nunju-minya na uku anggama, mbota-duna-nyaka nu na papuingu-mi lai Karitu. Nu ba tuna nu, luri-minya la hambeli pa-namungu-na i Ala.

⁵Tàka nyuma duma, mamonu-nya ba wàngu pa-ndulangu-na na Ngahuna i Ala dàngu ba ngahama papawai lai Karitu, na-pahia-nggama i Ala ka ma-pahàmungu beli dàngu Nyuna.

⁶Nadu jàka mbàda mbulungu-ndaka dàngu i Karitu Yehu, nda papanii wàngu-ayapa duna na ngera kikunya jàka ndia na ngera nda kikunya na kalaratu kàri. Na ma-papingi jia-aya na ngera pawai lai Karitu, tàka nuna na-lohangu ningu la mbuha-ndanya na tau hawiangu.

⁷Àmangu nahàmu-maka làti na pa-dàdungu-mi! Ka nggiki-naika nàhu hi ndai nunju-ayapa na pambuha-na i Ala? Nggamuya na mambàda pamanda-nggai?

⁸Jiangu-ma ba nda i Ala-a duna na mawunda-ya nuna, nu i Ala na mambàda paaunggai nyimi!

⁹“Na tai wolu ma-hawutu-na na-pahawunju-ya nggubulu-na na kanguta pa-haürungu,” wàna na tau.

¹⁰Jiapa ka tunakai na-màndungu-mapa duku na etinggu ba nda jia kadupulu-ami la hili hau pa-ngàdangu, maa ba mbàda mbulungu-ndaka dàngu i Karitu. Dàngu na-màndungu-ma duku la etinggu ba nahuku-nya napa paraïna i Ala na tau na ma-kuwaru-ya na kanandingu-mi, jiapa ka nggamu-yakai nu.

¹¹Jàka jiaka nyungga, angu dedi, ka nggikina duna hi muhu mànungga jàka tuba bobaru-nggunya làti ba pawàngu-mayapa na kalaratu kàri? Jàka tuna numa làti na pa-bobarungu-nggu, ka nda papanii wàngu-ayapa làti na bobaru-nggunya rukuna na ai harikangu-na i Karitu.

¹²Da tau da ma-kuwaru-ha da kanandingu-mi, narihi hàmu-mapa ka ailulu handàkangu luhuda welingu la kabungguru!

¹³Pambàda paaungu-kaika nyimi la panjadi tau marandeka. Na nyuna àmbu àtalu eti biami la pawunda ndàbaya jàka nggàraya na parinju-mi ba ngahami pa-marandeka. Tàka na nyuna lupangu-ma kai maràngga pa-mbuhangu dàngu kai maràngga painga dua wikimi.

¹⁴Nggubulu-na na uku anggama pa-pambulungu-ya la hupu lii yiana ba hauna, “Màtawa kau mbuhanya na angumu patau hama tuna bau mbuhangu wikimu,” ba wàna.

¹⁵Na nyuna jàka maràngga pa-kumbitu bia-minyai, pananjarungu-ma napa ihadànjalu pa-kariangu-du.

¹⁶Tuna yia na pawuku-nggu: Màtawa ka na-kapipi-kai Ngahuna i Ala dàngu àmbu namatu niduya na parinju-na na tolu.

¹⁷Nadu na parinju-na na tolu na-pandubaku dàngu na parinju-na na Ngahuna i Ala, hamangui na parinju-na na Ngahuna i Ala na-pandubaku dàngu na parinju-na na tolu. Da-maràngga pa-ndubaku-ma duda hi lupa nda peku namatu-minya jàka nggàraya na parinju-mi.

¹⁸Tàka jàka na-kapipi-kai paraïna na Ngahuna i Ala, nda na-kawaha-akaipa uku anggama.

¹⁹Na parinju-na na huri tolu na-lohangu ningu la pawunda - pawunda ma-kajari, ma-iraku, dàngu manda pa-ràkangu,

²⁰la lumungu marapu, dàngu alimu; la pa-muhungu, pa-hànggangu, pa-kilitungu, karaü eti, yaulu kangeha wiki; maràngga pa-kawàringu dàngu pa-bàriku,

²¹dàngu malara eti, maüku, borakungu dàngu da hama-daka. Ku-panamu-nggaiha nàhu mbuu ndàbada nuda hama tunambu ba ku-panamu-nggaiha àmangu ba nda jia njadi-ada ana banjaru-na i Ala ngeru da tau da mawunda-ha da matungu nu.

²²Tàka làti duna, jàka na-kapipi-ha da tau paraïna Ngahuna i Ala, tuda yia duda làti: Da-maràngga pa-mbuhangu, da-hawola, da-mambiru, da-lerangu eti, da-lerangu patandangu, dahàmu eti la tau hawiangu, da-tuturu,

²³dawawa eti, dàngu damàka mànuma pa-roputu wiki. Nda ningua duna uku anggama mahiri-nja da matuda nu.

²⁴Da tau da pambàda manguna i Karitu Yehu duda, mbàda pameti-danyaka na huri toluda dàngu mbuu ndàbana na itirungu dàngu na parinju-na.

²⁵Na Ngahuna i Ala mbàda wua-nandaka luri bidi; jia ba tuna lupangu Nyuna-maka duna na ma-kawaha-ya na lurinda.

²⁶Àmbu tangamba, dàngu àmbu ta-maràngga tuya na pakatiu eti wàngu, dàngu àmbu ta-maràngga pa-malarangu eti dua wikinda.