Read Kambera NGGALATIA 6 Bible Online

NGGALATIA 6 - Kambera bible

NGGALATIA 6

¹Dou da angu dedinggu duku! Jàka era toma-minya na haàtu ba nawunda manjala, màtawa nyimi maluri pa-namatungu la Ngahuna i Ala, kai kapipi-ya na tau nuna ka nabeli la ànda ma-padeningu. Na nyuna wàngu malijangu bàdi bai wundaya nuna, dàngu rimangu-ma ka àmbu jia linanggai ma-pakamangu.

²Màtawa kai maràngga pa-mbapangu la paduku-ya na mambotu la tau hawiangu, màtawa ba timi nu[8] kai nunjuya na hupu liina i Karitu.

³Jàka ningu haàtu makaka wikina ba tau ràka tauya, tàka làti wàmu hi ndia biai, na tau nuna panyonga-nanya wikina.

⁴Nimbihu-na na tau nakinju wiki-maya bàdi, jàka nahàmu na huri lurina, jàka ndia. Jàka nahàmu, pekuna ka na-hamemu wànya na rukuna nuna. Na nyuna àmbu na-pamenja-dunya dàngu na pawunda tau hawiangu.

⁵Nadu nimbihu-na na tau ba maràngga hema wiki-mana duna ndumana.

⁶Na tau na ma-ngalangu lii papekangu-na i Karitu màtawa ka na-kawàri welingu la mbuu ndàbada da manguna da mahàmu ndumana na ma-papeka-nya.

⁷Àmbu ningu ma-panyonga-kai. Nda pa-pajulu wàngu-aya i Ala! Jàka nggàraya na pa-tondungu, jia-maya napa na pamuti.

⁸Na tau na ma-tondungu pa-namatungu la huri toluna, napa namuti-ya na meti welingu la huri toluna. Na nyuna jàka na-tondungu pa-namatu-nya la kapipi-nanya Ngahuna i Ala, napa namuti-ya na luri langatàka dàngu na ma-palupangu welingu la Ngahuna i Ala.

⁹Jia ba tuna, àmbu nahoda-duta la pawunda-ha da mahàmu; nadu jàka nda ta-pànjangu-ma pawunda-ha nuda, napa ngeru tamuti-maya na ihina.

¹⁰Jia ba tuna, ba ningu-dupa ma-manggawangu-nda, màtawa ka tawunda mahàmu la mbuu ndàbana na tauka, ri - rihi la angu dedinda da angu pawainda.

¹¹Hamata pahàmu-manya yiana ba nyungga wikima ma-tulihu pa-bokulu-nggainya.

¹²Da tau da ma-mbuhangu pa-pangia ngaba wikida la paita wàngu mata, nyuda-maka nu da mambana la pa-ruwatu-kai la panunju-ya na kalaratu kàri. Tàka hi kiri tuda nu, jia-aya ka àmbu na pa-mayila-ha tau Yahundi rukuna na ai harikangu-na i Karitu.

¹³Da tau da ma-panamatungu la kalaratu kàri, nda da-namatu-mbuya na uku anggama. Tàka dakàri bàdi hi kiri wàdanggai nyimi, ka peku hamemu wàdanya bai nunjuya nuna na kalaratu.

¹⁴Tàka nyungga duku nda ana mbuhangu manggu pa-hamemu wàngu ngga - nggàra, hinggilu-na na Mirinda, i Yehu Karitu na mambàda meti la ai harikangu. Nadu ba ruku metina la ai harikangu, hi nda ana ni-manyapa duku na pinu tana la etinggu. Dàngu beri hama tuna meti-manggu-nyaka duku, hangganya na pinu tana.

¹⁵Jàka kàri jàka ndiakai, nda ehingu-a duna. Tàka na mambàtingu jiaya ka njadi tau bidi.

¹⁶Ndumada da tau da ma-pamàndu-nya nuna, dàngu hamangui nduma nggubulu-na na banjaru-na i Ala, ku-monungu ka nawua-nja mapeku mahàmu dàngu pa-namungu-na paraïna i Ala.

¹⁷Na pangalangu-na, àmbu jia hili ningudu haàtu ma-pahanduka-ka, nadu ba ni-manjaka duku da mbuti la ihinggu na ruku kiku-nggunya i Yehu.

¹⁸Màla àruki na Mirinda i Yehu Karitu ka na-pakanyuru mànukai. Amingu. Matembi-kai, Paulu