Read Kambera EPIHU 4 Bible Online

EPIHU 4 - Kambera bible

EPIHU 4

¹Nunaya na pakiri-na nyungga — haàtu tau pa-tahangu, na pa-tahangu paraï ruku lumu-nggunya i Miri — hi kukarai pambana-nggai nyimi: luriwa nunjuya na mandapu-mi ba tau pambàda paauna i Alakai.

²Màtawa nyimi ka na-karàda mànu na etimi, kai malijangu dàngu kai pa-torungu. Pawuwa-ya na mbuhangu-mi bai wàngu pa-pandulangu dàngga angumi.

³Pamukarungu langata - tàka kai luri pandami, ka peku padai pangalangu-na na mbulungu na pambàda raï rukuna na Ngahuna i Ala.

⁴Ba mbulungu pàkuna na taunda dàngu hi mbulungu-na na Ngahu. Tuna numbu nyimi ba paaunggai, ka na-mbulungu na monungu na ma-pahama.

⁵Ba mbulungu pàkuna na Miri, mbulungu na pawai, mbulungu na parunungu,

⁶dàngu na-mbulungu na Ala, na Ama la mbuu ndàbana na tau. Nyuna-maka na Miri pa-nggubulu awangu na maràma la mbuu ndàbana dàngu na ma-kuaha la mbuu ndàbana.

⁷Nyuta haàtu - haàtu ta-kawàra ngalangu hangia pa-wuangu, tundunya jàka nggàraya na pawua-na i Karitu.

⁸Daa la Huratu Matua ninya na pa-tulihu, “Ba jiaya na heina Nyuna la pangia mahupu jangga, nangàndi padangu tanawangu; dàngu na-wuangu pa-wuangu hangia - hangia la tau,” wàna.

⁹Nu, “nahei” jàka wàna, jia-duyaka ba mbàda puru-naka la kawunga-na lupa la pangia mangia wawa halawàla la pinu tana yiana.[5]

¹⁰Tàka Nyuna nu na mambàda puru, Nyuna-mbuduka na mahei la pangia marihi jangga halawàla welingu la a - awangu-ka, hi lupa nambinu wàngu na hanggubu awangu na ninya Nyuna.

¹¹Nyuna-maka “na ma-wuangu pa-wuana hangia - hangia la tau” ba wàna; hawiangu natuya papahurungu, hawiangu natuya wunangu; tàka hawiangui natuya ma-bobaru Lii Mànangu, tàka da-hawiangui natuha ngguru dàngu matanara kabungguru.

¹²Yiana hi tunanya nu hawanjiru-nanya na banjaru-na i Ala ka peku lumunanya i Miri dàngu ka peku pahada-nanya na tauna i Karitu.

¹³Jia-duyaka ba tuna nu hi ta-mbulungu nyuta nu ba hamanda la ngera pawai dàngu la ngera tanda hàmundanya na Ana Ala. Tàka hi tanjadi tau mamatua taunda mangeri nda - ndàharungu la jàngapu hama tuna i Karitu.

¹⁴Nyuta nda tahilu anakeda-apa ma-lindingu lai nu - lai nu dàngu da pangàndi arihu pa-ajaru-da da tau da mapingu pa-kahili. Nyuda da-panjàra-nya na tau wàngu akalu kahili-da.

¹⁵Ndia-a! Hauya duna, màta ka ta-pawuwa-ha wàngu eti mbuhangu langatàka-nda jàka nggàraha da ma-deningu, hi lupangu la ngala mandaina taparu - rukangu pa-lànyapu la mbuu ndàbana hama tuna i Karitu na kapala-nda.

¹⁶Ruku ulingu-na Nyuna, hi na-panua pa-hàmungu, hi na-parepingu mbuu ndàbada da nua ihi danguka paraï rukuda da kawohuku-mada duda nimbihu-da. Tàka jàka da-kawàra ràma-maka ndumada nuda nimbihu-da da anggota, mbuu ndàbana na tauna napa kabu - butuhu-mana-nyaka duna hi lupa na-matua dàngu hi lupa na-halangatu paraïna mbuhangu.

¹⁷Jiaya ba tuna lumuna na tamuna i Miri, yiana-yaka napa na papanii-nggu dàngu na pa-paailulu-nggu: àmbi hili luri-dupa hama tuna na tau na manda tandaya i Ala, dàngu la pa-pangàda-nya na manda jiaya.

¹⁸Na kanandingu-da nyuda na-kapàtangu-ka. Nda datanda-ayapa na luri pa-wuana i Ala, nadu ba nda ningu ndokuma duda papi wàdanya na ngerana i Ala. Hi tuda nu ba malihu katiku-madanya.

¹⁹Nda ningu-apa nyuda papàda-da pa-makia wàngu, hi lupa datundu-maanya na hawuwatu-na na itirungu-da, hi daluri iraku pambuha etida.

²⁰Tàka i Karitu Yehu na patanda-mi nda tuna nua duna!

²¹Mbàda rongu-minyaka na rukuna Nyuna! Dàngu ba makiku - makikungu-kai, pambàda ajaru-makaika na huri - hurina i Ala na maninya lai Nyuna!

²²Jia-duya pukalu-yawa na tau memangu lupa na huri luri memangu na pa-paruha-da da paiti - paitirungu da ma-panjàrangu.

²³Màtawa da eti dàngu da kanandingu-mi kai pabidi palundu hàlanja.

²⁴Màtawa kai luri hama tuna tau bidikai na pa-padikangu tundunya na hadana i Ala; nu la paluri wàngu huri madeningu, matànji dàngu ma-matua.

²⁵Jia-duya angu dedi mbuu ndàbami, àmbi hilu kambàliku-dupa. Màta kai kawàra patutungu dàngga angumi, nadu nyuta mbuu ndàbanda ba angu nua tauna i Karitu-ta.

²⁶Jàka era mbenimi, àmbi màta-dunya na mbenimi hi lupa na-pawiti-nya na panjala wàmi. Àmbi mbeni lundu malingu-na,

²⁷ka àmbu ningu ngia papeku-na i Kambàliku.

²⁸Na tau na makàli manganga, na-pànjangu-maka bàdi pa-manganga. Tàka na nyuna màta ka naràma ka wàngu tànjina ba na-ngalangu paluri wàna dàngu ka peku pa-ndulangu-na la tau na maningu ma-njakangu.

²⁹Jàka mi-kareuku àmbi wàngudu panii marihaku. Màta kai wàngu panii ma-panaungu dàngu ma-pandulangu la tau hawiangu. Da panii tungu nu napa da-patàka-nya pahàmu wàngu da tau da marongu-ya.

³⁰Àmbi pa-kahàdiku-duya na etina na Ngahuna i Ala. Nyimi pambàda ndàta wàngu Ngahu-kaika, ba manguna i Alakai. I Ngahu nuna-maka na kawuku ba nàmu-ama-nyaka lai nyimi na Lodu Hawewa-mi.

³¹Wàrunya mbuu ndàbana na hidu eti, na pa-umbingu dàngu na mbeni. Àmbi hilu warangu-du dàngu àmbi hilu tolangu. Àmbu hilu ningu-dupa karaü eti jàka ndia hilu hau papàda eti hamana nuna.

³²Tàka na nyuna, màtawa nyimi kai pa-hàmungu eti dàngu kai pa-milangu eti dàngga angumi, dàngu kai kawàra pa-jàmangu hama tuna i Ala ba najàma-nggai nyimi lai Karitu.