Read Kambera PILIPI 1 Bible Online

PILIPI 1 - Kambera bible

PILIPI 1

¹Dou da angu dedinggu mbuu ndàbami banjaru-na i Ala ma-ngiangu la Pilipi, dàngu mambàda pa-mbulungu dàngu i Karitu Yehu. Hamangui da angu dedi da liku uru dàngu da ma-pambapangu la kabungguru! Nyungga Paulu anguma i Timutiu ba atana i Karitu Yehu kama,

²ma-monungu ka màla àruki i Ala na Amanda dàngu i Miri Yehu Karitu nawua-nggai kanyuru dàngu peku hàmu.

³Handàka pangàda - handàka pangàda-nggunggai ku-pamalangu-nya i Ala.

⁴Dàngu handàka hamaya - handàka hamaya-nggunggai ndumami mbuu ndàbami, dàngu mbaha eti-manggu ba ku-hamayangu.

⁵Ku-pamalangu-nya i Ala rukuna bai pambapa dàngga la pa-bobaru-ya na Lii Mànangu welingu lai Ala, piti welingu la lodu kawunga-na lundu nàhu.

⁶I Ala wikima duna na ma-pakiri-nya nu na paràma mahàmu lai nyimi, dàngu kupi hàmu-manya duku ba na-pangala-manya duna lupa na-palundu-nya la lodu mai belina i Karitu Yehu.

⁷Ràka-mana jàka tuna nu ba ku-pangàda-nggai, nadu ba ni mànunggai nyimi mbuu ndàbami la etinggu. Dàngumbu bai angungga la pangala-nya na pa-namungu-na i Ala na pawua-nangga; nàhu ba ku-ngiangu la uma kapàtangu, hamangui ba la hambeli-ka la papulu angunya dàngu la pa-padàdu-nya na Lii Mànangu.

⁸Napi-mangga i Ala ba kanjupu rinju-nggunggai wàngu mbuha weli eti weli puhu-nggunggai na ma-pawelingu lai Karitu Yehu wiki.

⁹Yiana-ya na hamaya-nggunggai ndumami: màla àruki ka na-parukangu na mbuha-minya i Ala dàngu na angumi dàngu ka naingu bonjangu-na na pingumi la ma-padeningu dàngu timbangu ma-pananjarungu.

¹⁰Nu ba tuna pingu-minyaka papindi-ya jàka nggàraya na mahàmu halawàla, hi nda ana nggàra nyurami jàka ndia nda ana nggàra pa-panjala wàngukai la lodu mai belina i Karitu.

¹¹Napa nabundu làndangu wàngu pawunda mahàmu langatàka na lurimi da pa-patumbu wikina i Yehu Karitu; hi pabokulu-ya dàngu hi pawo - wotungu-ya napa i Ala.

¹²Màta kai pinya wànggu, da matu - tumbuka lai nyungga ba jia pàkuyai na parihi dangu wàna na tau na marongu-ya dàngu na mawaiya na Lii Mànangu.

¹³Jiaya nuna-duka na papi wànanya mbuu ndàbana na madai la uma hanganji dàngu da tau hawiangu-ka la paraingu yiana ba ruku lumu-nggunya i Karitu hi kiri puhika la uma kapàtangu.

¹⁴Tàka na tamanggu la uma kapàtangu jia-yaka na pa-màndungu wàna na etina lai Miri na tau dangu la honga tau Karitu la paraingu yiana, hi hama huka toru mbenida pa-bobaru-ya na lii languna i Ala[1] dàngu nda mangàdatu-da.

¹⁵Nimanjai nyuna hawiangu lai nyuda da ma-bobaru-ya i Karitu ruku malara etida dàngu ka pahànggangu wàngu ba wàda, na nyuna hawiangu duda matànji-maya na pawuku-da ba da-bobaru-ya i Karitu.

¹⁶Ruku mbuha-mada-nyaka i Ala dàngu nyungga hi kiri wunda-danya nuna maa ba dapi-dunya ba mbàda pawai ngaba-nanggaka i Ala la pa-jakaru-nya ba ma-deningu-maya na Lii Mànangu.

¹⁷Tàka da tau hawiangu duda, nda nahàmu-a na pawuku-da ba da-bobaru-ya i Karitu; himbu-danya nduma wiki-ma-ada ba da-bobaru-ya. Ka bonja wànya na handuka-na la uma kapàtangu, wàdangga làti pamonu-da.

¹⁸Na nyuna, màlawa nyuna! Jiapa ka nggiki hamana-kadu, ka matànji-ya na pawuku-da ba dawunda-ya nuna, ka manjala-yakai, tàka nu hi pa-bobaru-maduya i Karitu; jiaya hi kumbaha eti. Dàngu pa-daingu mbaha eti-manggu duku,

¹⁹maa ba pi-manggunya ba pa-pahàla-ka duku napa rukuda da hamayangu-mi dàngu wàngu pa-ndulangu-na na Ngahuna i Yehu Karitu.

²⁰Na parinju halawàla-nggu dàngu na pamonu-manggu ka àmbu jia nda duluku-nggu la wai ngabanggu wànggu. Tàka kumonu-manya, ka nua nainguna, ri - rihi nàhuma, ka kutara uranggu la pa-pabokulu-ya i Karitu wàngu ndewa hamangu-nggu — ka luri-nggunya ka meti-nggunyakai — .

²¹Nadu nyungga duku jiaya i Karitu-ma na ngia pa-orangu-na na luringgu! Tàka na meti pamàngi wànguya wànggu.

²²Na nyuna jàka peku wundanggu paràma marihi palingu, nu ba kuluri la pinu tana, ka nda kupi-anyapa jàka nggiya na papindi-nggu.

²³Pa-pandàngi mbeli mbapangu-ka. Ku-rinjungu langatàka-ma duku pa-taluru-nya yia na pinu tana palua pa-ndàdiku lai Karitu, maa ba jiaya nunadu na mahàmu halawàla;

²⁴na nyuna, ndumana na pahàmu wàmi nyimi, narihi hàmupa jàka pa-daingu ndàdiku-nggu la pinu tana yiana.

²⁵Kupi hàmu-manya duku nuna. Tuna nuduka hi kiri pinggunya ba pa-daingu ndàdiku-nggu lai nyimi mbuu ndàbami, ka peku ndula-nggunggai kai parukangu pa-àtalu dàngu kai parukangu pambaha eti la pawaimi lai Miri.

²⁶Jia ba tuna, jàka kubeli napa lai nyimi, nyimi mambàda pa-mbulungu dàngu i Karitu Yehu, pabo - bonjangu-nanyaka na danguna na pa-hamemu wàmingga nyungga.

²⁷Nu ba tuna, na ma-papingi nàhu jiaya jàkai luri pa-namatungu la pa-karuhi-na na Lii Mànangu rukuna i Karitu. Nu ba timi nu, jàka era pa-hàmburu dànggunggai jàka ndiakai napa kurongu ba na-jorutu na kahaungu-mi dàngu ba handàka pa-ringgitungu-mi lumuna na pawuku na ma-mbulungu dàngu na parinju-mi na ma-mbulungu; nu lumuna na pawai na ma-patangangu la Lii Mànangu welingu lai Ala.

²⁸Màtawa kai tara ura mànu, àmbi mangàdatu-nja da papami. Nu ba timinu, jakaru-minya ba jiangu-ma napa dakàku, dàngu ba nyimi napa matalu, ba i Ala wikima na mawua-nggai talu.

²⁹Nadu i Ala nawua-nggainyaka na pa-namungu-na nda mbulungu biana kai pawai lai Karitu, tàka jia-mbuya kai pàdangu mayila lumuna i Karitu.

³⁰Nàhu miangu-ngga la pa-paringgitu dàngga la paringgitungu na pa-ukuru-nda; nu na pambàda itami ba ku-paringgitu-nya àmangu, dàngu ba jia-mayapa nàhu na pa-paringgitu-nggu, hama tuna na pambàda rongumi nàhu.