Read Kambera PILIPI 2 Bible Online

PILIPI 2 - Kambera bible

PILIPI 2

¹Mi-àtalu nyimi, rukuna bai pa-mbulungu dàngu i Karitu. Dàngu ninggai la omba eti rukuna ba nambuha-nggai i Karitu! Na-kapipi-kai paraïna Ngahuna i Ala,[2] dàngu bai maràngga pa-mbuhangu dàngu bai maràngga pangàdangu ngera dua wikimi.

²Màla naa, ka tuna yia bai li langatàka-ya na etinggu: Kai pahama eti ba dàngu pahama-na na pa-mbuhangu-mi, ba dàngu pahama-na na kanandingu-mi dàngu pahama-na na pawuku-mi.

³Àmbu nggàradu pawunda-mi lumuna na-kehangu-mi ngera wikimi, jàka ndia la pa-ngànjangu wàngu. Tàka làti duna màtawa kai maràngga wawa etimi bai maràngga kakaya ba narihi na tau hawiangu welingu lai nyimi wiki.

⁴Eti wànyawa na nduma tau hawiangu; àmbu jia biaya na nduma wikimi.

⁵Màtawa na huri etimi ka hama tuna na huri etina i Karitu:

⁶Làti duna nahama hadanya i Ala, tàka lupangu-ma bàdi kupàtu-ya na hada Alanggu nda wàna-a.[3]

⁷Tàka na nyuna napuli ndàbanja nuda hi hama tuna haàtu ataya. Hama tuna haàtu tauya, dàngu hi itaya na lurina ba hama tuna luri tauya.

⁸Na-pawawangu wikina, hi na-karadaku lai Ala la ngala lurina lundu metina — nu na meti la ai harikangu.

⁹Tuna nuduka hi dira pajangga-nanya paraïna i Ala, hi na-pakata-nya kawaha marihi ndàbanja da kawaha hawiangu.

¹⁰Ka tembi wànya i Yehu, napa na-marubuku ndàba mbutana na maninya la awangu, dàngu la pinu tana, hamangui na maninja la unu tana[4] ba datembi-ya Nyuna.

¹¹Napa dapeka ndàba mbutada ba Miriya i Yehu Karitu; tuna nuduka hi pa-mangunju-ya i Ala Ama.

¹²Jia ba tuna, dou da angu dedi pambuha-nggu duku, hama tuna ba naingu manundu-mi lai nyungga ba ninggapa àmangu la pahiku-mi, tàka ri - rihipa nàhu ba ta-pamaraungu, màtawa ka pa-daingu manundu-mi lai nyungga. Mbàda pamàna-nanggaika i Ala ba tuna pa-ringgitu pangalangu-ma ka na-lànyapu na peku hàmumi. Wunda-yawa nuna ba wàngu pa-maraku dàngu manundu-mi lai Ala,

¹³nadu ba i Ala wikima duna na maràma la wikimi nyimi ka peku mbuhangu dàngu ka peku ngalangu-mi paliya na etina i Ala.

¹⁴Ràma-yawa mbuu ndàbana dàngu nda hoputu-mi jàka ndia dàngu nda pa-lumungu-mi.

¹⁵Nu ba timi nu jakaru-minya ba ana Ala manda ningu nyurangu-kai, matànji mola dàngu ma-padeningu la lurimi la pahiku tau akatu dàngu tau njala. Dàngu la rehi patàka-minya lai nyuda na lii langu paluri wàngu, màtawa ka hama tuna handaraku-kai lai nyuda na ma-hambila hi naharii na pinu tana. Jàka tuna nu na lurimi ràka-manaka duku la pa-hamemu wànggai nyimi la rehi mai belina i Yehu Karitu. Nuna nu mbuti-duyaka ba nda kahewa-na na paringgitungu-nggu dàngu ba ningu ngalana na pamukarungunggu.

¹⁷Talànga wanguna pa-pameti-ka ihu napa, tàka na wai rianggu hi beri mangejingu pa-paliringu-ya la pinu pa-mangeji-mi lai Ala na tanda pawaimi lai Nyuna. Jàka lupangu-ma ba tuna nu, ku-pamalangungu rukuna nuna, dàngu kumbaha eti dànggai nyimi.

¹⁸Màta àruki ka tuna numbu nyimi bai mbaha eti, dàngu bai mbaha eti dàngga nyungga.

¹⁹Ku-monungu ba wàngu pa-ndulangu-na i Miri Yehu, peku lu palewa-nggunya i Timutiu lai nyimi ka peku halembiru-na na etinggu jàka kurongu-ya na ngerami nyimi.

²⁰Didi meha-ma-aya i Timutiu na mahama etingga nyungga, dàngu na maweli etingu pa-pangàda-nya na pahàmu wàmi nyimi.

²¹Mbuu ndàbada hawiangu jiaya na nduma wiki-ma-ada na palumu-da, nda jia-aya na ndumana i Yehu Karitu.

²²Mbàda ita wiki-mami-nyaka na mbutina ba ningu linguna i Timutiu. Mbàda ràma pa-mbangatungu-naka ba na-pambapa dàngga la ngera bobaru-ya na Lii Mànangu welingu lai Ala. Hama tuna ana dàngu ama bia-kama.

²³Jia ba tuna, jàka kupi-nyaka, jàka nggi - nggikina na hupu njàpuna napa na ngeranggu, lu paràha-manggunya lai nyimi.

²⁴Ku-monungu ba wàngu pa-ndulangu-na i Miri, lu mai wiki-manggunya duku napa pa-tadalu-kai nyimimbu.

²⁵Jàka jia-yaka i Epaporunditu na papalewa-mi la pa-pambapa dàngga, ku-paràha-nyaka bàdi lai nyimi wànggu. Mbàda karaha-mana-nggaka la paràma-nggu dàngu la pa-ringgitungu-nggu.

²⁶Dira rinju ndàba-mananggai, dàngu nda nangudu-a na etina rukuna bai ronguya hiduna.

²⁷Deningu-mana ba nahidu tika pameti-ka-amangu. Na nyuna namila-nya eti paraïna i Ala; tàka nda didi mehaya nyuna bia, nyunggambu namila-ngga eti i Ala ka àmbu hama huka hawina-nggu.

²⁸Tuna nuduka hi hama huka rinjungu-nggu pa-paràha-nya pabeli lai nyimi, kai hawola beli bai itaya, dàngu ka nangudu-mbui duku na etinggu.

²⁹Ba tuna nggepi mbaha eti-yawa ba haàtu angu dedi angu pawaiya. Tembi-yawa mbuu ndàbana na tau tungu nu.

³⁰Lumuna na paràma-na i Karitu, natika pameti-ka-amaka; nda nawaia wikina ba na-pambapa dàngga nyungga hurumi nyimi.