Read Kambera PILIPI 3 Bible Online

PILIPI 3 - Kambera bible

PILIPI 3

¹Jia ba tuna angu dedi, màtawa kai hawola rukuna ba mbàda pa-mbulungu-mika dàngu i Miri. Nda kumayau-a duku la pahili tulihu-ya na pambàda tulihu-nggunggai la mangilu-na; nadu ba pahàmu wàna na mànangu-mi nyimiya.

²Pananjarungu-ma la tau da mawunda-ha da ma-akatu, da tau ‘ahu’ ba ràka wàndanja. Da-paruwatu ka kàriha da tau.

³Tàka làti wàmu jiata nyuta-maka duta mambàda ngalanya na kàri na ma-langatàka, nda nyuda-a. Nyuta duta talumu-nya i Ala ruku kapipi-nanda Ngahuna i Alama, dàngu ta-pa-malangungu rukuna ba ta-pambulu dànya i Karitu Yehu la lurinda. Nda tamonu-anja da lii huri lawiti paita wàngu mata.

⁴Peku biana duku làti pamonu-nja nuda da lii huri lawiti. Nadu jàka ningu haàtu makaka-ya ba ma-palatangu-maya la pa-monungu lii huri lawiti paita wàngu mata, kurihi-pa duku nyungga.

⁵Nyungga duku pakàri-ka ba walu mbua lodu-anggupa. Tau Ihirailu-maka duku ba kudedi welingu la kabihu Mbanyamingu; tau Imbarani weli wingungu-maka. La ngera nunjuha da uku anggama Yahundi, tau la kaloka tau Parihi-maka.

⁶Jiapa kanjupu ringgitu-kikaipa, hi lupa ku-pamayila-ya na kabungguru. Jàka pa-namatu ninya la uku anggama Yahundi, haàtu tau hàmu manda ningu nyurangu-maka duku.

⁷Na nyuna lumuna i Karitu, mbuu ndàbada da pautu wàngu ba wànggu làti àmangu, pamburi wànguha wàngguka nàhu.

⁸Nda didi biaha nuda; jiapa mbuu ndàba-naka ngara mbutana, pamburi wànguma-aha wàngguka. Na mangunggu ba wànggu duku nàhu narihi pa-wilingu-pa: nu ba kutanda-ya i Karitu Yehu na Miringgu. Lumuna i Karitu-maka hi kiri jàma-nggunja mbuu ndàbada ngara mbutada. Kalàmba hàlaya wànggu-maka nàhu ka peku ngala-nggunya i Karitu,

⁹dàngu hi ma-langatàka-ya na pambulu dànggunya Nyuna. Na hàmuna na papuingu-nggu lai Ala, nda paloku wiki-anggu-nyapa wàngu nunju-nggunya na uku anggama. Nàhu hi nahàmu na papuingu-nggu dàngu i Ala jiaya ba kupawai lai Karitu. Jia ba tuna, na hàmuna nu na papuingu, ma-pawelingu lai Ala-maya, dàngu palata-nya na pawai lai Yehu Karitu.

¹⁰Hau jua-ma-ana na parinju-nggu, jiaya ka kutanda-ya i Karitu wàngguma-a, dàngu ka kuera-nya na mbiha mendi na ma-paluri beliya Nyuna welingu la meti. Ku-rinjungu pa-mayila dànya Nyuna dàngu la pameti hama tuna Nyuna.

¹¹Dàngu monu-manggunya ba pa-pahada belingu-ka napa welingu la meti.

¹²Mbàda ngalangu-ngguka, jàka ndia mbàda jàngapu-ngguka nda wànggu-a. Na nyuna pa-ringgitu pangalangu-manggunya la pangala-nya na pa-wuangu pa-payema-na i Karitu. Jiaya nuna-maka hi na-hanggàlu-ka hi na-panjadi-ka manguna.

¹³Langatàka-ma angu dedi, mbàda ngala-manggu-nyaka nu na pa-wuangu, nda wànggu-a.[5] Na nyuna hangia-na na pawunda-nggu, nu ba nda kunandi-anyapa na pambàda taluru-nggu dàngu hi ku-paringgitungu la patàka-nya na pa-hanggangu.

¹⁴Tuna nuduka hi ku-talanjiru pangalangu hanggangu la ngia patàka la pangala-nya na talu, nu na luri la awangu; nuna-duyaka na papaau wànanda i Ala lai Karitu Yehu.

¹⁵Tunda numaka bàdi nyuta mbuu ndàbanda mambàda matua la huri pangahu. Na nyuna jàka ningu la hongami mahili hau pangàdangu-na, napa na-pakaloka-manggainya duna i Ala.

¹⁶Na nyuna ba tuna etiwa-manyaka bàdi yiana: Taluri pa-namatungu mànu-maka bàdi la kalaratu pambàda nunjunda lundu nàhu.

¹⁷Dou da angu dedinggu mbuu ndàbami! Kiku-nyawa na ngerangu welingu lai nyungga. Mbàda pangita-mama-nggaika ngerangu ma-padeningu, jia ba tuna hamata pahàmu-nja da tau da ma-panamatungu la ngerangu welingu lai nyuma.

¹⁸Mbàda kàli panii-manggu-nggaika, tàka nàhu kuhili panii-nggainya pa-kariangu wai matanggu, ba nadangu na tau na ma-paruha wànya huri lurina na pameti wàna i Karitu la ai harikangu.

¹⁹Na hupu njàpu lurida da tau tungu nu jiaya na molungu, nadu na pa-paala-da jiaya na parinju-na na tolu wiki-ma-ada. Da pa-makia wàngu ba wànda, jia nihai da pa-hamemu wàda nyuda; nadu ba jiaya na ngera pinu tanama-a duda na pa-kanandi-da.

²⁰Tàka nyuta duta ana tana la awangu-ta. Weli nàmu-dunaka napa ba namaiya na Hanganji Ma-pamànangu-nda i Miri Yehu Karitu. Jiaya Nyuna-maka na pane - nedinda ba dàngu rinju-ndanya.

²¹Da ihinda da ma-maluputu dàngu da ma-ngalangu pakabu, napa na-panjilu-nja paraïna i Karitu hi dahama-nya na ihina Nyuna na ma-mangarangu. Hi na-ngalangu pawunda-ya nuna jiaya ba ningu kodi màkana la pa-panyàku-ya mbuu ndàbana.