Read Kambera PILIPI 4 Bible Online

PILIPI 4 - Kambera bible

PILIPI 4

¹Jia ba tuna dou da angu dedi pambuha-nggu duku, tuna nuduka bàdi bai luri pawai weli etingu lai Miri. Kurinju-manggai duku! Jiakai nyimima pa-bokulu eti wànggu hi kiri mbaha etinggu.

²Kukarai pambana-kai dou da ana wininggu i Eundia dàngu i Hinitiki! Màtawa kai kahau etingu ba angumi papawai.

³Tàka la angu ràmanggu na ma-tuturu, kukarai-mbukau kau ndulaha nuda da tau kawini da madua. Mbàda pa-mbangatungu-madaka ba daràma dàngga la pa-bobaru-ya na Lii Mànangu welingu lai Ala; hama tuna i Kalemingu dàngu mbuu ndàbada hawiangu da angu ràmanggu. Da tamuda nyuda ninja la Mbuku Tau Luri.

⁴Màta àruki ka ni mànunggai la hanggela hawola nadu ba mbàda pa-mbulungu-mika dàngu i Miri. Hanggela hawola-wa! Hili wànggu-manggai.

⁵Màtawa mbuu ndàbana na tau ka naita-ya na hàmu etimi la nggoda nggàduku-mi. Maa ba nda pira-kinaka na tàkana i Miri.

⁶Àmbu nggàradu pa-kaduku-mi. Nggàra biaya na pahili ulami patàka bianya na pakarai-mi lai Ala la hamayangu-mi. Nggàra biaya na manjaka-nggai panii mànu-maya nu lai Ala ba dàngu pa-malangungu-mi.

⁷Na peku na hàmu welingu lai Ala na panda toma kanandingu tau pinu tana, napa namangga-nya na etimi dàngu na pangàdangu-mi na mambàda pa-mbulungu dàngu i Karitu Yehu.

⁸La hupu njàpuna angu dedi, màta ka jiaha da ma-pawilingu da ma-hulungu la kanandingu-mi, da paràka pa-wotungu, nu da matànji, da patembi, da mamola, da ma-langatàka, da huri mandangu, dàngu da mahàmu.

⁹Pahàra-nyawa na pambàda papeka-mi dàngu na pambàda ngalami welingu lai nyungga; nu na parongu-mi la kareuku-nggu dàngu na pangita-mi la pawunda-nggu. I Ala na pingina na peku na hàmu, jiangu-ma duna na-angunggai.

¹⁰La luri pambulu dànggunya i Miri, kanjupu pa-ohangu-ka, nadu ka jiapa ba ngala mandai-manaka, peku pangàda bia-minyapa nàhu na ngeranggu. Nu hi panii tunggu nu, mbàda maromba-minggaka nda wànggua; maa ba etiwa-mamingga, tàka ndai hunggungu ngarangia la pa-paloha-nya.

¹¹Hi ku-jakaru-nya yiana, nda jia-aya ba ningu manjaka-ngga, maa ba mbàda ndàmangu-mangguka duku pa-patoma wàngu tuda maningu-ngga.

¹²Mbàda era-manggu-nyaka na panjaka wàngu, dàngu na pa-bundungu wàngu. Mbàda pi-manggu-nyaka na nyangana la pa-hanobaku-ya jàka nggàra biaya; ka luri mbokaru-ya, hamangui ka luri mila-yakai, ka mabundu làndangu-ya ka manjaka njàpu-yakai.

¹³Wàngu kodi màka pawua-nangga i Karitu, ku-dàdungu-ma duku pa-hanobaku-ya mbuu ndàbana jàka nggàraya.

¹⁴Na nyuna mbàda ndula-minggaka la handuka-nggu; tàka mahàmu-maya nu na pawundami.

¹⁵Dou da angu dedinggu duku tau Pilipi! Pi wiki-maminya ba ku-hadangu àmangu welingu la Makandonia, la kawunga bobaru-nggunya na Lii Mànangu, didi meha-akai nyimi kabungguru mandulaka; didi meha-akai nyimi maangu pàda-ngganya na utu dàngu na runggi.

¹⁶Ba ningga la Tehalunika ba ku-kalanangu pa-ndulangu, ndai wàngu pa-handàkangu bia pa-pangàndi-ngga pandula wàmingga.

¹⁷Nu keha ka ku-ngalangu wàngu pa-wuangu-ka nda wànggua. Na parinju-manggu jiaya ka peku ita-kingguha da ihina na mabonja-ya na utumi, wànggu.

¹⁸Mbàda ngala ndàba-manggu-njaka — jiapa darihi-mbupa welingu la tudana! Mbuu ndàbada da pawua-mi da pa-pangàndi-mingga, mbàda ngala-nggunjaka welingu lai Epaporunditu. Nàhu màtu ndàba-mana-nyaka duku na pa-kalana-ngguka. Nuda da pawua-mingga hama tuna mbii hiritu welingu la kameti maraku pawotu lai Alaha da payema mbaha etina i Ala.

¹⁹I Ala na palumu-nggu na mabundu làndangu pawulu-na lai Karitu Yehu, napa na-patoma ndàbaya na pa-kalana-mika.

²⁰Pa-wotungu-ya i Ala na Amanda lundu nu - nu! Amingu.

²¹Tambi wànanggai wàminya nggubulu-na na banjaru-na i Ala na ma-pambulungu dàngu i Karitu Yehu. Dàngu tambi wàda-mbunggai da angu dedi da maninja lai nyungga.

²²Tambi wàda-mbunggai mbutana na banjaru-na i Ala la paraingu yiana ri - rihi da maninja la umana na Hanganji Bokulu.

²³Màla àruki i Miri Yehu Karitu ka na-pakanyuru hàlakai. Matembi-kai, Paulu dàngu Timutiu