Read Kambera KOLOHI 2 Bible Online

KOLOHI 2 - Kambera bible

KOLOHI 2

¹Keha ka dapinya wànggunggai jàka nggiki mbangatu-na na pamukarungu-nggu ndumami nyimi dàngu ndumada nyuda la Laündikia hamanai mbuu ndàbana na tau na manda tandaka nyungga.

²Mbuu ndàbana hi kiri tunggu nu ka peku undungu-na na etida dàngu ka da-pambuhangu dàngga anguda, ka na-màndungu na mbulungu-da. Ba wàngu patuda nu jàngapu langatàka-danyaka dàngu pi hàmu-danyaka ba datanda-ya na pakàpi-na i Ala, nu i Karitu wiki.[3]

³I Karitu-maka na ma-pawuwa-ya na manggàna-na dàngu na pinguna i Ala, àmangu na-pawiningu làti.

⁴Yiana hi kupanii-ya ka àmbu ningu ma-panyonga-kai, jiapa nda nggamuya, jiapa nda nggiki minangu-na na ngaruna lai nyimi.

⁵Nadu jiapa ka kumarau-kai welingu lai nyimi, kaka biaya ba nimangga duku la padua-mi. Dàngu na-nggaüru nyungga na etinggu ba kuita-kai ba hau eti-akai dàngu ba na-màndungu na pawaimi lai Karitu.

⁶Nyimi angu dedi mbàda kataku-minyaka i Karitu Yehu ba Miriya. Jia-duya nu màtawa kai luri pa-mbulungu dàngu Nyuna,

⁷dàngu kai paamu lai Nyuna. Màtawa nyimi kai pahada-nya na lurimi ba jiaya i Karitu na latana. Màtawa nyimi kai parukangu papawai lai Karitu, tundunya na pambàda ajaru-kai. Dàngu màtawa da etimi ka da-mbumbaru wàngu lii pa-malangungu.

⁸Màtawa nyimi kai pananjarungu, napa hi ningu lia mahiru-ha da etimi ba dawàngu mà - màtu pa-manggàna wàngu la pinu tana na manda palingu, tàka ma-panjàrangu-ha. Da manggàna nuda nda ma-pawelingu lai Karitu-ha, tàka manggàna pahunggu tau-aha dàngu da wàndi da ma-kuaha-ya na pinu tana.

⁹Nadu mbuu ndàbana na hada wikina i Ala ni hàla-manya lai Karitu, nu la hada tauna.

¹⁰Dàngu ba ruku luri pa-mbulungu dàngu i Karitu, nyimi pa-wuangu-mbukai luri malundungu. Nadu i Karitu jia-mayaka na mangia dita hàlanja nimbihu da wàndi da ma-kuaha dàngu da ma-pareta.

¹¹Nadu ba pa-mbulungu dàngu i Karitu, nyimi pakàri-makaika, nda kàri pawàngu lima tau, tàka kàri paruku-na i Karitu-maya duna, na ma-pahàla-kai welingu la kuaha huri manjala.

¹²Nadu ba parunu-nggai nyimi, patani kariangu-kaika dàngu i Karitu; dàngu jia-mbuyai na pa-runungu nunamai ba paluri kariangu-kai nyimi dàngu i Karitu, nadu bai waiya na kuaha-na i Ala na mambàda paluri-ya i Karitu welingu la meti.

¹³Àmangu, nyimi mbàda meti-mika la huri pangahu rukuna bai njala, dàngu ba nda pakàri-kai la tolu. Tàka nàhu nyimi na-paluri pakaria-nggaika dàngu i Karitu paraïna i Ala. I Ala mbàda jàma hàla-nanjaka da njalanda,

¹⁴nda na-ihili-anyapa na huratu wutangu-nda, na ma-pangàdu wànda kalaratu - kalaratu mambotu. Ba na-harika-nyaka nuna na huratu la ai harikangu, na-podahu-ha i Ala mbuu ndàbada da pakàla wànanda.

¹⁵La ai harikangu nuna-duka i Karitu ba na-pàraku hàlaha da wàndi da ma-pareta dàngu da ma-kuaha hi nda dahili tu papida.[4] Nyuda jia la paimi-ki-anjaka madangu ba jiaya naweli-nanja paraïna i Karitu ba tanawangu duhaka la paï mànangu-na Nyuna.

¹⁶Jia-duya nu àmbi pahia-dunya na tau la pa-panjala-kai nyimi la ngera pangangu pa-ngunungu, jàka ndia la ngera lodu - lodu bokulu anggama, jàka ndia la pa-mbabungu wula bidi, jàka ndia la ngera lodu Hangahu.

¹⁷Nuda mbuu ndàbada beri maü-adaha duda da manàmu-nja, tàka na mawuwa na ngerada nuda jia-mayaka i Karitu!

¹⁸Àmbi pahiangu-du wikimi la pa-parunggi-kai paraï tau na ma-kapilandu la pa-pawawa wikina dàngu na ma-maraku-nja da papalewa awangu. Na tau nuna ngamba wànanya na kanandingu pinu tanana dàngu hamemu wànanja da harii mata patukingu,

¹⁹hi lupa nda nahili yàpa-apa lai Karitu na kapala. La pa-irungu-na i Karitu, mbuu ndàbana na taunda pa-radangu-ya dàngu hi na-pandetu-nja paraï kawohu - kawohuku-na, hi na-kabutuhu tundunya na pambuha-na i Ala.

²⁰Nyimi mbàda meti karia-minyaka i Karitu, dàngu mbàda pa-pahàla-kaika welingu la wàndi - wàndi na ma-kuaha-ya na hanggubu awangu yiana. Màla, nggikina nyimi hi miluri hama tuna jiapa-kaipa la kuaha-na na pinu tana yiana? Nggikina nyimi hi mi-pawawangu wikimi la kalaratu da matuda yia:

²¹“Àmbi dàmaya yiana”, “Àmbi kapaliku-nya nuna”, “Àmbi jonggaru-ya nuna”? ba wàna.

²²Mbuu ndàbada da kalaratu nuda jiaha ba hàla pawànja nda hili ningu-apa linguda. Nuda da kalaratu dàngu da lii pa-ajaru pawunda tau-aha duda.

²³Tubangu-ma ba wàngu paita-aya nuna hama ma-manggàna-maduya, ba na-pawànda ka nalumu-nja tau da papalewa awangu, la pa-pawawangu wiki, dàngu pa-mayila wiki; tàka nuna mbuu ndàbana nda ningua linguna la pa-roputu-ya na itirungu-na na tau.[5]