Read Kambera KOLOHI 4 Bible Online

KOLOHI 4 - Kambera bible

KOLOHI 4

¹Angu dedi nyimi manjadi miri! Màtawa bai hangganja da atami, kai wàngu ma-padeningu dàngu ma-patànjingu. Namuya nyimii dimi ba ningu-madui haàtu mangia ditanggai la awangu.

²Màtawa kai hamayangu ma - mànu dàngu kai màra mangga rimangu, ba dàngu pa-malangu-minya i Ala.

³Hamaya-mbu-nggama ndumama nyuma, ka nawua-nggama ma-kalongga hàmu i Ala la pa-hàbaru-nya na lii rukuna na pa-kàpingu rukuna i Karitu. Nadu ba rukuna nuna-maka nyungga yia hi kiri ningga la uma kapàtangu.

⁴Hamayangu-wa ka peku màkanggu nyungga la pa-wàlahu-ya nuna na pa-kàpingu ka lupa na-habola hàla, hama tuna na pawàngu-ma duna.

⁵Jàka jiaya na pa-nuangu-mi dàngu da tau nda pawai, màtawa kai màhi la paluri, màtawa kai panggapa-nya na ngia papeku-na na mahàmu.

⁶Màtawa la hangia - hangia da patiki-mi ka da-pahàmu eti dàngu ka da-pawànda eti. Màtawa nyimi kai pinya jàka nggikina wàmi bai hemaha da paàrangu tau.

⁷I Tihiku, na angu dedi pa-mbuhangu, napa nyuna ka na-wàlahu-nggainya mbuu ndàba-naka na ngeranggu nyungga. Nyuna na-tuturu la paràma dànggama ndumana i Miri.

⁸Ku-palewa-ya nyuna lai nyimi kai pinya na rukuma nyuma dàngu ka peku nggaüru-mi.

⁹I Onihimu napa nalua karia-nya i Tihiku, nyuna tau ma-pawelingu lai nyimiya. Nyuna tau tuturu-ya, tàka mambuha-manya nyuna. Nyuna dàngu i Tihiku napa da-wàlahu-nggainja mbuu ndàbada da matumbu la pangia-nggu nyungga yia.

¹⁰I Aritàruku, na maninya la uma kapàtangu angunggu nyungga, na-pangàdi-nggai tambi. Hamangui i Màruku, na tambaru anguna paluhu i Mbàranamba. (Mbàda pa-pangàndingu-makaika langu la pa-tàbuku-ya jàka namai lai nyimi.)

¹¹Tambi wàna-mbunggai i Yehu, nu i Yutuhu ba wàda-mbunya. Welingu la tau Yahundi da mambàda pawai lai Miri Yehu, didi-aha nyuda pa-kadua haàtu-da da maràma dàngga nyungga la pa-paloku-ya na wai ngerama welingu lai Ala. Nyuda lalu mbana pa-ndulangu langatàka-ha lai nyungga.

¹²Tambi wànanggai i Epàparàhu. Nyunambu ma-pawelingu lai nyimiya. Nyuna atana i Karitu Yehuya, na ma-hamayangu mànu ndumami nyimi. Nyuna na-kamahi langatàka-nya i Ala ka peku kapànduku-mi la pa-kawana-mi dàngu kai matua langata - tàka, ka peku lànyapu-na na karadaku-mi la pawuku-na i Ala.

¹³Ku-hakahii-manya duku nyungga ba mambana mbangatu langatàka-ya na ràmana ndumami nyimi dàngu ndumada da tau la Laündikia dàngu la Hiarapoli.

¹⁴I Ndotiru Lukahu na pambuha-nda dàngu i Ndemàhu tambi wàdanggai.

¹⁵Patàka àrunya na tambima la angunda pa-karitu la Laündikia, hamanai i Nimupa, dàngu na kabungguru na ma-lumungu la umana.

¹⁶Jàka hàlaka pambaha-ya na huratu yiana lai nyimi, màla àru na huratu yiana ka pambaha-mbuya la kabungguru la Laündikia. Hama-mbunai nyimi wiki màta kai mbahaya napa na huratu pa-pangàndingu welingu la Laündikia lai nyimi.

¹⁷Dàngu kai paniinya i Àrakipu, “Palundu-nya na wai ngera na pa-wuangu-kau la palumu-nya i Miri,” wàna wàminya.

¹⁸Tambi wànggunggai nyungga Paulu. Nyungga wikima duku ma-tulihu-ya la ngabana yiana. Àmbi maromba-dunya ba ningga-pa nyungga la uma kapàtangu! Màla àru i Miri ka na-pakanyuru-kai mbuu ndàbami. Matembi-kai, Paulu