Read Kambera 1 TEHALUNIKA 1 Bible Online

1 TEHALUNIKA 1 - Kambera bible

1 TEHALUNIKA 1

¹Dou da angu dedinggu la kabungguru la Tehalunika, manjadi banjaru-na i Ala Ama dàngu i Miri Yehu Karitu: Nyuma ba jia ndàba-kama Paulu, Hila dàngu Timutiu ma-monungu ka màla àruki i Ala ka nawua-nggai kanyuru dàngu peku hàmu mbuu ndàbami.

²Nyuma duma ma-pamalangu mànu-manya i Ala rukumi nyimi mbuu ndàbami. Handàka hamaya - handàka hamayangu-ma lai Ala na Amanda, ma-pangàda mànu-manggai. Ma-hamaya mànu-manggai ndumami. Manamu-maya jàka nggiki hamana bai paloha-nya na pawunda-mi ba tau mapawai lai Karitu-kai, jàka nggiki hamana bai mbuhanya na tau hawiangu tàka hi lumunja, dàngu jàka nggiki hamana na undungu-na na monungu-mi la Mirinda i Yehu Karitu.

⁴Mapi-manya, angu dedi, ba nambuha-nggai paraïna i Ala dàngu ba mbàda pindi-nanggai panjadi mangu paleha-na.

⁵Maa ba nda mbulungu wàngu kareuku bia ba ma-patàka-nggainya na Lii Mànangu, tàka wàngu mbihana dàngu wàngu Ngahuna i Alambu. Dàngu mapi hàmu-manya duma ba ma-deningu-maya na Lii Mànangu. Mipi-manya nggiki hamana na huri lurima duma lumuna na pahàmu wàmi nyimi ba ninggama la hongami nyimi.

⁶Mikiku-manya na huri lurima nyuma dàngu na huri lurina i Miri. Jiapa ka dira mayila-kai, minggepi mbaha etiya na pulungu pa-bobaru-manggai. Nu na mbaha eti, pawua-na na Ngahuna i Alaya.

⁷Nu ba timi nu jiakai-ka ngerangu la mbuu ndàba tau Karitu la tana Makandonia dàngu la Akaya.

⁸Nadu pakiringu welingu lai nyimi mbàda kada-nanyaka na rukuna i Miri la Makandonia dàngu la Akaya. Dàngu nda didi biaya nuna; jiapa na rukumi nyimi jàka nggiki hama pawaimi lai Ala, mbàda toma-naka la nggi - nggini, hi nda majàra-apa la papanii ngga - nggàra.

⁹Mbuu ndàbada nuda da tau dapanii-ya jàka nggiki hamana bai nggepi-kama àmangu ba mamai lai nyimi. Dapanii-ya jàka nggiki hamana bai dunjaku-nja da marapu, tàka hi hurungu lai Ala maluri na madidi meha-aya la palumu-nya Nyuna.

¹⁰Dapanii wàmbunya jàka nggiki hamana nanedi-minya na maina na Ana Ala welingu la awangu, nu i Yehu, na pambàda paluri-na i Ala welingu la meti. Jiaya i Yehu nuna-maka na ma-pahàla-ta welingu la hànggana i Ala na manàmu-nya.