Read Kambera 1 TEHALUNIKA 4 Bible Online

1 TEHALUNIKA 4 - Kambera bible

1 TEHALUNIKA 4

¹Hinggilu-nai nu angu dedi, mbàda paita-manggaika ngerangu jàka nggiki lurimi bàdi kai liya na etina i Ala. Deningu-mana ba mbàda timi nu-maka bai luri. Na nyuna nàhu la hupu liina i Miri Yehu, makarai pambana-kai dàngu ma-ruwatu-kai, kai parukangu-ki pa-pamukarungu la luri tungu nu!

²Nadu ba mbàda pi dimi-njaka da ngerangu pambàda pangita-manggai la hupu liina i Miri Yehu.

³Yiana-ya na pambuha-na i Ala: Màtawa kai luri ndumana i Alama-a, bai pa-matua wikimi, kai wiliru-nya mbuu ndàbana na luri iraku.

⁴Nimbihu-da da mini lai nyimi, lupangu dapi-manya bàdi jàka nggiki hamana ba naluri dànya na papaha-na[3] pa-namatu-nya na pawàngu na maliya na etina i Ala dàngu na tau.

⁵Àmbu luri namatu-ya na pambuha tolu hanggangu la papaha-mu, hama tuna na pawunda-da da tau manda tandaya i Ala.

⁶Nu la matuna nu, àmbu jia haàtu du mawunda manjala la angu dedina, jàka ndia la pa-panyonga-ya. Àmangu mbàda pa-jorutungu-maka ba ma-panamu-nggainya, ba nahuku-nja napa i Miri da tau da mawunda-ha da njala tungu nu.

⁷Ba napaau-nda i Ala, nda jia-aya ka taluri kajari, tàka ka taluri pa-namatu-nya na maliya na etina Nyuna.

⁸Na tau na ma-tebuku-ya yiana na lii papekangu, nda tebuku-nanya taua, tàka tebuku-nanya i Ala na mawua-nggainya na Ngahu Matua-na.

⁹Nda nggàra maihi wàngu-apa la pa-tulihu-nggainya jàka nggiki hamana bai mbuhanja da angu dedi angu pawainda. Mbàda papeka-mana-nggaika paraïna i Ala la pa-maràngga pa-mbuhangu dàngga angumi.

¹⁰Tàka na ngerana yiana mbàda paloha-minyaka la mbuu ndàbada da angu dedi angu pawainda la nggubulu tana Makandonia. Na nyuna, angu dedi, makarai pambana-kai, ka na-parukangu-ki pahàmu na lurimi.

¹¹Pamukarungu-ma paluri mandangu dàngu àmbu pa-hongangu la ngera tau hawiangu. Màtawa kai ràma bai himbuya na pa-patoma wàna na luri wikimi, hama tuna na pambàda jorutu-manggai àmangu.

¹²Jàka tuna numa bai luri, nda jia monungu-ami la tau hawiangu, dàngu hi datembi-kai tau manda pawai lai Karitu.

¹³Angu dedi, ma-rinjungu-ma kai pi hàmunya rukuda da tau da mambàda meti; ka àmbi handuka hama tuna da tau hawiangu da manda ningu monungu-da.

¹⁴Nyuta duta tawai-maya ba mbàda meti-naka i Karitu dàngu ba mbàda luri beli-naka. Tuna nuduka hi tawai-mbuya ba na-paluri beliya paraïna i Ala mbuu ndàbana na tau mapawai lai Yehu na mambàda meti, ka daluri lai Nyuna.

¹⁵Na ngerana nuna, yiana-ya na lii papekangu-na i Miri na pa-patàkangu-ha ba wàmanggai: La rehi maina i Miri Yehu, nyuta maluri-pa la rehi nu nda jia mangilu-andanja da tau da mambàda meti mangilu.

¹⁶Napa nawara pakodungu na ngora papalewa dàngu hi napini-ya na taropitu-na i Ala ba jiaya na tanda lii pa-irungu. Hàla, hi napuru wikina i Miri Yehu welingu la awangu, tàka da tau Karitu da mambàda meti hi paluri mangilu-ha.

¹⁷Hàlaka nu, nyuta maluri-ipa la rehi nu pa-padita pa-kariangu-ta dàngu nyuda la karumangu pa-patàbuku dànya i Miri la kuru awangu. Tàka hi hanii mànunda lai Miri lundu nu - nu.

¹⁸Jia ba tuna, yiana na panii ka jiaya na pawàngu bai maràngga pa-màndungu eti dua wikimi.