Read Kambera 1 TEHALUNIKA 5 Bible Online

1 TEHALUNIKA 5 - Kambera bible

1 TEHALUNIKA 5

¹Angu dedi, nda majàra-a pa-tulihu-nggainya jàka pira pa-wingungu-ya na rehina na rapa njadida nuda napa.

²Maa ba pi hàmu-maminya ba hama ma-manganga matàka wàngu rudungu-ya na Lodu tàkana i Miri.

³“Peku hàmu-nanyaka nàhu mbuu ndàbana,” ba wànaka na tau, la rehi nuduka ba natàka harabànda-nya pa-molungu wàngu, hi nda haàtu mapeku la pamara. Nuna nu nanjadi harabàndangu, hama tuna na pakati kajia-na na haàtu kawini ma-habola.

⁴Na nyuna nyimi dimi nda tau maluri la kapàtangu-akai, hi katàtaku-nya nu na lodu hama tuna tàka ma-manganga.

⁵Tau maluri la hambila-kai nyimi mbuu ndàbami; ma-ngiangu la harii lodukai dimi nyimi. Nda tau maluri la kapàtangu-ata duta nyuta, jàka ndia nda ma-ngiangu la kapàta rudungu-ata.

⁶Jia ba tuna, àmbu mahuru pàku-andanya hama tuna na tau hawiangu. Ta-rimangu-maka bàdi, dàngu nanggàna ndàbama bàdi na kanandingu-nda.

⁷Rudungu pa-katuda wàna na tau, dàngu rudungu-mbu pa-maüku wàna.

⁸Tàka nyuta duta ma-ngiangu la harii loduta; jia ba tuna nanggàna ndàbama bàdi na kanandingu-nda. Lupangu pa-daingu wai-manda-nyaka bàdi i Miri dàngu tambuha-nya na tau hawiangu, dàngu tamonu-nya wàngu pi hàmu-ndanya ba na-pamàna-nda napa paraïna i Ala. Nuna-duya na temi timbinda na ma-pahangindi-nda ba ta-paringgitungu pa-ndubaku-ya na kapàtangu.

⁹Hi napindi-ta i Ala nda jia-aya ka hukunda, tàka ka pamàna-nda rukuna na Mirinda i Yehu Karitu.

¹⁰Nameti lumunda nyuta ka màtawa la rehi tàkana napa — ka luri-ndanyapa, ka mbàda meti-ndakai — peku luri karia-ndanya Nyuna.

¹¹Jia ba tuna, màtawa kai maràngga pa-kamahingu ka àmbi màli dàngu kai maràngga pa-undungu pawaimi dua wikimi, hama tuna na pawàmi nàhu.

¹²Angu dedi, ma-kamahi pambana-kai kai ma-humbaru-nja da tau da maràma la pahiku-mi; nu da tau da pambàda pindina i Miri la pa-kapipi-kai dàngu la papanau-nggai.

¹³Màtawa kai yemaha wàngu tembi halawàla-minja dàngu wàngu mbuha-minja ba pangàda-nja da paràma-da. Màtawa kai papeku mànu dàngga angumi.

¹⁴Ma-kamahi-mbunggai angu dedi, hàngga nàrunya na tau na manda mbuhangu paràma; pamàndu-nya na etina na tau ma-mangàdatu; ndulaha da tau da paràka pandula dàngu màtawa kai lerangu etimi la tau mbuu ndàbana.

¹⁵Pananjarungu ka àmbu ningu ma-palimba wànya akatu na ma-akatu. Pamukarungu mànuma la pawunda mahàmu dàngga angumi dàngu la tauka mbuu ndàbana.

¹⁶Màtawa kai hawola mànu,

¹⁷dàngu kai hamayangu mànu.

¹⁸Màtawa kai pa-malangungu mànu jàka ngga - nggàra ehimi, maa ba nunaya na parinju-na i Ala welingu lai nyimi ba tau ma-pambulungu dàngu i Karitu Yehukai.

¹⁹Àmbi roputu-ya na Ngahuna i Ala.

²⁰Àmbi pahalela-ha da lii langu pa-patàka-na na Ngahuna i Ala.

²¹Kanuturu-ya mbuu ndàbana, dàngu kai namatu-maya na mahàmu.

²²Wiliru-nya mbuu ndàbana na ma-akatu-ka.

²³Màla àruki ka i Ala wiki na mawua-nda mapeku mahàmu, ka na-panjadi àrukai tau maweli etingu pa-katiku pulinya na luri ndumana i Ala. Màla àruki i Ala ka namangga-nya na wikimi mangu mbulungu-na, na ngahumi, na hamangu-mi, hamangui na ihi daami, hi lundu nda ningu nyurana la rehi mai belina na Mirinda i Yehu Karitu.

²⁴I Ala, na mambàda paaunggai, napa nawunda-ya nuna maa ba ma-tuturu-duya.

²⁵Hamaya àru-nggama ndumama, dou da angu dedima duma!

²⁶Màtawa kai maràngga patambi mbuu ndàbami wàngu pa-mbuhangu-mi ba ohami patau Karitu.

²⁷La hupu liina i Miri, kukarai pambana-kai, kai dihaya yiana na huratu la mbuu ndàbada da angu dedi angu pawainda.

²⁸Màla àruki na Mirinda i Yehu Karitu ka na-paliri-nggai kanyuru mbuu ndàbami. Matembi-kai, Paulu