Read Kambera YUHUA 11 Bible Online

YUHUA 11 - Kambera bible

YUHUA 11

¹Mbàda rongu-naka i Hanganji Yambingu la Hahuru rukuda da taluna na tau Ihirailu. Tuna nuduka hi na-palewa tau lai Hanganji Yombàpu la paraingu Mandungu, la hanganji - hanganji paraingu Himurungu dàngu Àkahàpu,

²la hanganji-da da paraingu la ma-palindingu mbara dia, la Lolangu Yorundangu la luruna la Nggalilia, la ngabana la ma-pahuru melingu, dàngu la ngabana la hingi tehiku lihina la Ndòru.

³I Hanganji Yambingu na-palewa-mbunja tau da tau Kanaàngu la patama lodu dàngu la pahunga loduna na Yorundangu, dàngu da tau Amori, Heti, Perihu dàngu da tau Yembuhu la ngabana na ma-palindingu, dàngu da tau Hewi la ma-pahuru melingu la wawa Palindi Herumungu la ngabana la Mihipa.

⁴Ka mai-danyaka nuda da hanganji dàngu nggubulu-da da tanatara-da, ba kanjupu danguha hi hama tuna wara la hingi tehiku-ha. Da njara dàngu da kareta pabera-da dira dangu-mbuha.

⁵Mbuu ndàbada nuda da hanganji da-pambulungu, hi handàka maida pamaü la ana luku Merumu ka njungunya na Ihirailu.

⁶Napanii i MIRI lai Yuhua, “Àmbu mangàdatu-dunja nyuda. La rehi tungu nàhu haromu, mbàda pameti ndàba-ngguhaka nyuda lumuna na Ihirailu. Lupangu-ma upatalàpu-ha da njarada, dàngu lupangu-ma utunuha da kareta pabera-da,” wàna.

⁷Ka kaluluku-danjaka da muhu i Yuhua dàngu da tanatara-na mbuu ndàbada, ba dawàngu pa-harabànda-nja la ana Luku Merumu.

⁸Tàka i MIRI na-pawiti-nya na Ihirailu la patalu-ha nyuda. Da-kaluluku-nja paraï da tau Ihirailu hi dayaulu-ha lundu tuna marauna la Mihireputu-Maimu dàngu hu dia la Hindungu, dàngu hi lundu la Lolangu Mihipa-ya na marauna la pahunga lodu. Pangala tilangu-mananya na pa-kabungu hi lundu nda ana haàtu-ma muhu ma-kanjepi — dameti ndàbama.

⁹I Yuhua na-pahàra-nya lai nyuda na pambàda paniina i MIRI la hupu liina: na-patalàpu-ha i Yuhua da njarada dàngu natunu-ha da kareta pabera-da.

¹⁰Hàlaka nu beli-nanyaka i Yuhua hi nawàhi-ya na Hahuru ba jiaya na ma-kapingatu halawàla làti la rehi nu la hongada mbuu ndàbada da pa-hanganji-ka lai nu. Dahulu-ya na paraingu, tàka na hanganji dàngu nggubulu-na na tau lai nu da-pameti-ha; nda ana haàtu-ma pamàta-da paluri.

¹²Mbuu ndàbada nuda da paraingu nawàhi-ha paraïna i Yuhua. Nayàpa-ha da hanganji-da hi pameti-ha nunjuya na hupu liina i Muha, na atana i MIRI.

¹³Na nyuna da paraingu da patura la majangga nda haua pahulu-da da tau Ihirailu, hinggilu-na na Hahuru na pahulu wikina i Yuhua.

¹⁴Mbuu ndàbada da mangia-nja nuda da paraingu pa-pameti-ha; nda ana haàtu-ma pa-màtangu paluri. Na nyuna mbuu ndàbada da malanja da ma-pawilingu dàngu da bandada dapiti-ha tau Ihirailu hi datuha manguda.

¹⁵Na papanii-na i MIRI la hupu liina lai Muha, na atana, jia-maya na papanii-na i Muha lai Yuhua, tàka i Yuhua na pahàra ndàbanja nuda; nda ana hauma panda pahàra-na.

¹⁶Nawàhi ndàbaha da paraingu i Yuhua — la ngaba ma-palindingu la ngaba ma-pahuru melingu la wawa palindi, la mbara dia hamangui la mbara luru; dàngu nggubulu-na na ngabana la Nggohingu-mbu dàngu na ngabana na maràda katukuru la luruna la Nggohingu, dàngu na Lolangu Yorundangu.

¹⁷Na lerangu-na nu na ngaba tana, piti welingu la Tandula Kamuluku mbara luru la lihina na Endumu, na marauna lundu hu diaya la Mbaàlu-Nggàtu la Lolangu Limbanongu la luruna na Palindi Herumungu. Dira mandaiya i Yuhua ba na-pabera dànja da hanganji la ngabana lai nu, na nyuna la hupu njàpuna nayàpa-ha hi na-pameti ndàbaha nyuda paraïna i Yuhua.

¹⁹Welingu la mbuu ndàbada da paraingu la nggubulu ngabana lai nu nda ana hauma paraingu matura lii pa-njanjingu pa-paariyangu dàngu na Ihirailu hinggilu-na na Nggimbiungu na paraingu banjaru Hewi. Mbuu ndàbada da paraingu hawiangu pa-pakàku-ha la pakabungu.

²⁰I MIRI na-pawiti-nja nyuda la pa-tongguru eti pa-pabera dànja da tau Ihirailu, ka pamànji-ha dàngu ka pameti ndàbaha dàngu nda pa-aïngu. Nunjuya na hupu liina i MIRI lai Muha.

²¹La rehina numbu nalua pa-pamànji-ya na banjaru Enàku i Yuhua, nu na banjaru mahama milimungga-ya, da ma-ngiangu la ngaba ma-palindingu — nu la Hemburungu, Ndembiru, Anàpu dàngu la nggubulu ngaba ma-palindingu la Yahunda dàngu Ihirailu. Na-pameti ndàbaha nyuda i Yuhua, dàngu na-patàlaru-ha da paraingu-da.

²²Nda ana haàtu-ma welingu nu la banjaru Enàku ma-kanjepi la ngabana na Ihirailu; na nyuna la Nggaha, Nggàta dàngu Àndutu, ningupa ma-kanjepi.

²³Nggubulu-na nuna na tana nawàhi-ya i Yuhua hama tuna na hupu liina i MIRI lai Muha, hàla hi nawua-ya nu na tana la banjaru Ihirailu ka damangu-nya. Napabe - berinya nuna na tana, dàngu nimbihu-na na kabihu banjaru danga - ngalangu-ma hangia ndumada. Ka pànjangu-nanyaka pa-pabera na banjaru Ihirailu, hi dira mambiru-ya na tanada.