Read Kambera YUHUA 13 Bible Online

YUHUA 13 - Kambera bible

YUHUA 13

¹Nàhu kaweda halawàla-mana-nyaka i Yuhua. Napanii i MIRI lai Yuhua, “Kaweda-munyaka, Yuhua! Na nyuna dadangu-mapa da ngaba tana da pawàhi bàdi:

²nggubulu-na na ngabana na Pilitingu dàngu na Nggehuru,

³dàngu nggubulu-na na ngabana na Awi hanggangu hu luru. (Na ngabana welingu la Luku Hikuru la padira Mehiru lundu la padira Ekurungu la mbara dia, nggubulu-da nu ngaba banjaru Kanaàngu-mahapa; tàka da hanganji Pilitingu da-ngiangu la Nggaha, Àndutu, Àhakelungu, Nggàta dàngu Ekurungu).

⁴Dàngu lupangu pawàhi-mayapa nggubulu-na na ngabana na Kanaàngu dàngu na Miara (na mangu banjaru Hindungu), lundu la Apiku la padira ngaba tana Amori;

⁵na pangalangu-na na ngaba tana banjaru Nggembàlu dàngu nggubulu-na na ngabana la Limbanongu hanggangu la pahunga lodu, piti welingu la Mbaàlu-Nggàtu la luruna na Palindi Herumungu, pangalangu lundu la ànda ma-hanggangu la Hamàtu.

⁶Jia ndàba mbuya nggubulu-na na ngaba tanada da tau Hindungu, da ma-ngiangu la ngabana na ma-palindingu la henaku-da da palindi la Limbanongu dàngu na paraingu Mihireputu-Maimu,” wàna. “Mbuu ndàbada nuda da banjaru kuwàngga-ha napa, la rehi bera-daha nyuda paraï banjaru Ihirailu,” wàna. Napanii pangalangu i MIRI lai Yuhua, “Lupangu upabe - berinya bàdi nuna na tana la banjaru Ihirailu ka tana mangu-danya, hama tuna na pambàda panii-nggunggau la hupu liinggu.

⁷Ba tuna, pabe - beri-nyawa nàhu na tana la hiwa mbua kabihu hawiangu la banjaru Ihirailu papohu-nya na beri mandua-na na kabihu Manahi, ka tana mangu-danya nuna.”

⁸Da kabihu banjaru Rumbingu dàngu Nggàtu dàngu na beri mandua-na na kabihu banjaru Manahi mbàda ngalangu-daka tana ndumada welingu lai Muha na atana i MIRI; nu na tana la pahunga loduna na Luku Yorundangu.

⁹Na tana ngabada nyuda nahanggau-nya na Arowiru (la hingi Lolangu Luku Àrunongu), dàngu na paraingu la padua-na nuna na lolangu, jia ndàba-mbuya nggubulu-na na ngabana la ma-ndidaru dita welingu la Mandemba hanggangu la Ndimbungu

¹⁰na pangalangu-na na-paràpangu lundu la padira tana ngaba Amungu, papohu-nja mbuu ndàbada da paraingu da pa-kawaha wungana i Hihungu na hanganji Amori, na ma-mandapu la Hehimbungu.

¹¹Na ngabana la Nggiliatu, na ngaba la winggiru-na na Nggehuru dàngu Maaka, dàngu nggubulu-na na Palindi Herumungu, dàngu nggubulu-na na ngabana la Mbahàngu lundu la Hàlaka.

¹²Na ngaba tanada nyuda na-hanggau-mbunya na ngaba tana pa-kawaha-na i Hanganji Onggu, na tau Repayimu[4] panjàpu wàda ma-katangu pareta la Àhitaròtu dàngu la Endirei. Mbàda pakàku-nahaka i Muha da banjaru nuda dàngu nawàngga-ha paluhu welingu la ngaba tanada.

¹³Na nyuna da ma-ngiangu la Nggehuru dàngu Maaka nda dawàngga paluhu-aha paraï tau Ihirailu; ndàdiku-mada-nyapa la Ihirailu.

¹⁴Na kabihu Lewi nda da-ngalangu-a tana ndumada welingu lai Muha. Mbàda panii-naka i MIRI lai Muha, na nduma kabihu Lewi ba jiaha da ma-welingu la kameti maraku patunu la ngia pa-maraku ndumana i MIRI Ala Ihirailu.

¹⁵Hawiangu welingu la tana panjanji-na i MIRI la banjaru Ihirailu mbàda wua-nanjaka da kalibaru la kabihu Rumbingu paraïna i Muha, ka tana manguda nyudaha.

¹⁶Na ngaba tanada nyuda na-hanggau-nya la Arowiru (la hupu Lolangu Àrunongu) dàngu na paraingu la padua-na nuna na lolangu lundu la nggubulu-na na ma-ndidaru dita la winggiru-na na Mandemba;

¹⁷na Hehimbungu-mbu dàngu mbuu ndàbada da paraingu la ma-ndidaru dita nuna: nu na Ndimbungu, Mbamutu-Mbaàlu, Mbetu-Mbaàlu-Miungu,

¹⁸Yahàhu, Kendimutu, Mapàatu

¹⁹Kiriyataïmu, Hipuma, Heritu-Hahahàru nu la pinu tunduna la lolangu.

²⁰Mbetu-Piuru, da karaha-na na Palindi Pinggàhu, dàngu na Mbetu-Yehimutu.

²¹Na pangalangu-na jia ndàba-mbuha mbuu ndàbada da paraingu la ma-ndidaru dita, dàngu nggubulu-na na ngaba kawaha-na i Hihungu, na hanganji banjaru Amori, na ma-mandapu la Hehimbungu, yia la mangilu-na. Mbàda pakàku-nahaka paraïna i Muha, nyuna dàngu da ma-pareta la Mindiangu-mbu, nu: i Ewi, i Rekimu, i Njuru, i Huru dàngu i Remba. Mbuu ndàbada nuda da ma-pareta mbàda pareta-danyaka nuna na tana la wawana i Hanganji Hihungu.

²²La hongada da tau pa-pameti-da da tau Ihirailu, nimbunya i Mbiliamu anana i Mbeuru, na mini manyura.

²³Na Luku Yorundangu jiaya na padira patama loduna na ngaba tana kabihu Rumbingu. Nudaha da paraingu dàngu da ndeha da pawua-nja da kalibaru la kabihu Rumbingu, ka tana manguda nyudaha.

²⁴Hawiangu welingu la tana panjanji-na i MIRI la banjaru Ihirailu, mbàda wua-nanjaka da kalibaru la kabihu Nggàtu paraïna i Muha, ka damangu-nya.

²⁵Na ngaba tanada nyuda na-hanggau-nya na Yaehiru dàngu mbuu ndàbada da paraingu la Nggiliatu dàngu na beri mandua-na na ngaba tanana na banjaru Amungu lundu la Arowiru-ya na marauna la pahunga loduna na Ramba;

²⁶na ngabana la Hehimbungu lundu la Ramàtu-Mipàhu dàngu Mbetonimu, dàngu na ngabana la Mahanaïmu lundu la padira Londimbàru, mbuu ndàbada nuda jia ndàba-maha la ngaba tana nduma kabihu Nggàtu.

²⁷La Lolangu Yorundangu, na ngaba tana kabihu Nggàtu na-hanggau-nya na Mbetu-Haràmu, Mbetu-Nimura, Hukutu dàngu na Hapungu nu na ngaba tana tuda marihi pa-kawaha-na i Hanganji Hihungu la Hehimbungu. Na padira patama loduna na ngaba tana Nggàtu jiaya na Luku Yorundangu lundu la tana Nggalilia-ya marauna hu dia.

²⁸Nudaha da paraingu dàngu da ndeha da pawua-nja da kalibaru la kabihu Nggàtu ka tana manguda nyudaha.

²⁹Hawiangu welingu la tana panjanji-na i MIRI la banjaru Ihirailu mbàda wua-nanjaka da kalibaru la beri mandua-na na kabihu Manahi paraïna i Muha, ka damangu-nya.

³⁰Da padira tana ngabada nyuda na toma la Mahanaïmu, papohu-nya nggubulu-na na Mbahàngu — nu na nggubulu ngaba kawaha-na i Onggu na hanganji Mbahàngu, dàngumbu da nomu kambulu kotaku-na i Yairu la Mbahàngu.

³¹Na pangalangu-na papohu-nya na beri mandua-na na ngabana la Nggiliatu, pa-karia-nya na Àhitaròtu dàngu na Endirei, nu da madàmbu-da da parai puhu pareta ngaba kawaha-na i Hanganji Onggu la Mbahàngu. Mbuu ndàbana na ngabana lai nu pawua-njaha da beri mandua-da da kalibaru ana umbuku-na i Makiru, na anana i Manahi.

³²Tuna nu na pawàna i Muha ba na-paberi-nya na tana la pahunga loduna na Yeriku, la hapapa Luku Yorundangu, nu ba ninya la ma-ndidaru Muapu.

³³Na nyuna na kabihu Lewi nda ana hakudu-ma tana pangala-da welingu lai Muha. Mbàda panii-nanjaka nyuda i Muha, na nduma pawua-nja nyuda jiaha da ma-welingu la maraku da pawotu lai MIRI na Ala Ihirailu.