Read Kambera YUHUA 14 Bible Online

YUHUA 14 - Kambera bible

YUHUA 14

¹Yiana na patiki pandàkingu jiaya na kaloka-na ba pabe - berinya la banjaru Ihirailu na tana Kanaàngu la patama loduna na Luku Yorundangu. Da mapabe - berinya nuna na tana la banjaru Ihirailu jiaha i Ratu Eliahàru, i Yuhua anana i Nungu, dàngu da ngora kalibaru la kabihu - kabihu banjaru Ihirailu.

²Hama tuna na pambàda paniina i MIRI la hupu liina lai Muha, da ngabana na Luku Yorundangu la patama loduna, pa-pandumangu-ha da hiwa paradua mbua kabihu banjaru Ihirailu, ba pabe - berinya na ngabana lai nu lupangu wàngu patunya undima[5] bàdi.

³Hawiangu da madàmbu paradua mbua kabihu-da mbàda wua-nanjaka tana la pahunga loduna na Luku Yorundangu i Muha. (Tulihu-yaka bàdi lai yia ba na-pabiwangu la dàmbu kabihu da ana umbuku-na i Yuhupu: na kabihu Manahi dàngu na kabihu Epuraïmu.) Jàka jia-yaka na kabihu Lewi, nda ningua tana pawua-nanja nyuda i Muha. Mbulungu pa-wuangu paraingu-aha nyuda ka da-ngiangu ningu, dàngu padangu-da nduma banda hapi dàngu mbimbida.

⁵Tuna nuduka ba napabe - berinya nuna na tana na banjaru Ihirailu nunjuya na pambàda paniina i MIRI la hupu liina lai Muha.

⁶La hau lodu, damai tomaya i Yuhua la Ngginggalu paraï da tau welingu la kabihu Yahunda. Na haàtu la hongada nyuda jiaya i Kalipu anana i Yapuni welingu la kalibaru Kenàhu. Napanii i Kalipu, “Oi Yuhua! Hiu pi-madunya nyumu na papanii-na la Kandihu-Mbarania i MIRI lai Muha, na papalewa-na i Ala, na rukumu nyumu dàngu nyungga.

⁷Na ndaungu luringgu patu kambulu-naka, ba na-palewa-ka welingu la Kandihu-Mbarania i Muha, na atana i MIRI, ba ma-kapilitu-ka la pa-kanuturu-ya yiana na tana. Dàngu ba mbàda beli ngàndi-ngguhaka lai nyuna da lii pa-patàkangu ma-patutungu.

⁸Na nyuna ba tuna, da tau malua karia-ngga nyungga, da pa-mangàdatu-ya na banjaru Ihirailu. Tàka nyungga duku pa-daingu tuturu-manggunya i MIRI na Alanggu.

⁹Rukuna nuna-duka hi nanjanji-ya paraïna i Muha na tana na panjada-nggu ba jiangu-ma napa pawua-njaha da ananggu dàngu nyungga, ka mamangu-nya lundu nu - nu.

¹⁰Tàka nàhu mbàda patu kambulu lima mbua ndaunaka mandaina, piti welingu ba napanii-ya nuna i MIRI lai Muha. Nuna nu jiaya ba na-lindingu la maràda wara na banjaru Ihirailu. Dàngu hama tuna na pambàda njanjina i MIRI, mbàda mangga-mana nggaka duku i MIRI, hi pa-daingu luri bianggupa lundu nàhu. Itaya ni na ihinggu. Walu kambulu lima-naka nàhu na ndaungu luringgu,

¹¹na nyuna ku-àtalu-mapa duku hama tuna ba jiaya na palewa-nangga i Muha. Natoma-mapa duku na àtalu-nggu la pa-pabera, dàngu jàka nggàra-yakai na pawunda.

¹²Jia ba tuna, wua-ngganyawa nàhu na ngabana na ma-palindingu na panjanji-nangga duku i MIRI ba mabeli dàngu da karia-nggu ba jiaya na patàkangu-ma lii. La rehi nu rongu wiki-mamunya ba ningu banjaru mahama milimungga-ha lai nu, na banjaru Enàku ba wàda. La paraingu mabo - bokulu dàngu maningu kangelingu-maha da-ngiangu ningu. Ba tuna, talànga wanguna nadidi karaha-maka duku napa i MIRI hi lupa peku wàngga paluhu-ngguha nyuda napa, hama tuna na papanii-na i MIRI,” wàna.

¹³Ka peka-nanyaka mahàmu i Kalipu anana i Yapuni paraïna i Yuhua, hi nawua-nyaya na paraingu Hemburungu ka tana mangu-nanya.

¹⁴Lundu nàhu mangu-mada-nyapa, ba kangeha-da nyuda maya duda nuna na paraingu da ana umbuku-na i Kalipu anana i Yapuni, na tau Kenàhu, nadu ba na-karadaku mànu i Kalipu lai MIRI, na Ala Ihirailu.

¹⁵La mangilu-na, paraingu Àramba wàda-nyapa duna na Hemburungu (i Àramba jiaya na marihi halawàla pa-bokulu tauna la banjaru Enàku). Ka mambiru hàmu-nanyaka nuna na tana ba nda na nggumangu-apa pa-pabera.