Read Kambera YUHUA 15 Bible Online

YUHUA 15 - Kambera bible

YUHUA 15

¹Da kalibaru la kabihu Yahunda da-ngalangu tana ndumada da matuna nu da padira-na: La mbara luru na-tayilingu nuna na ngabana lai nu lundu la hupu dehi mbara luruna na ngabana na maràda telangu Njingu la padira Endumu;

²piti welingu la hupu luruna na Tehiku Meti,

³na-namatu pangalangu hu luru la karaha palindi la Àkurambimu lundu la Njingu. Na pangalangu-na na namatu ningu la luru Kandihu-Mbarania, hi nalii ningu la Hehirungu, na kandekalu la Andaru, hi namangu pa-wikitu hanggangu la Kàraka.

⁴Piti welingu lai nu nahili pangalangu la Àhumungu hi namangu pa-pipitu-ya na ana luku la padira Mehiru, tunaka nu hi lundu la Tehiku Padua-ya na hupu njàpuna. Nuya na lola padira mbara luruna na ngaba tana ndumana na kabihu Yahunda. Tàka nuna na lola padira, jia-mbuya na lola padira mbara luruna na tana Ihirailu nggubulu-na.

⁵Na padira pahunga loduna jiaya na Tehiku Meti, na-pangalangu hu dia lundu la mananga Luku Yorundangu. Na padira mbara diana napiti welingu la mananga-na na Luku Yorundangu,

⁶nakandekalu la Mbetu-Honggula, hi na-pangalangu la padira Lolangu Yorundangu. Welingu lai nu na padira mbara dia nahili kandekalu pangalangu hu dia lundu la Watu Mbohàngu (Mbohàngu anana i Rumbingu-ya),

⁷tunaka nu na-pangalangu la Lolangu Handuka lundu la Ndembiru, hi nahili wikitungu hu dia hanggangu la Ngginggalu la hau pangia la papada da karaha palindi la Andumimu la luruna nuna na lolangu. Welingu lai nu nahili pangalangu la mata wai Eni-Hemihu, mangupa la Eni-Ronggilu-ya,

⁸tunaka nu hi na na-kandekalu li ningu la Lolangu Hinumu hanggangu la luru tandula, na pangia-na na Yeruhali na paraida da tau Yembuhu. Na lola padira welingu lai nu na-hanggangu la pinuna nuna na tandula la patama loduna na Lolangu Hinumu, la hupu diana na Lolangu Repayimu,

⁹tunaka nu na-pangalangu la mata wai Mei-Nipitua, lundu la parai - paraingu la lihina na Palindi Epurungu. Na lola padira-na na ngabana nu na tana na-wikitu welingu lai nu hanggangu la Mbaala (nu na Kiriyàtu-Yiaarimu),

¹⁰hi na-winggiru-nya na patama loduna na Mbaala hanggangu la ma-palindingu la Endumu, hi na-pangalangu la diana na Palindi Yearimu (nu na Palindi Kahalungu), hi nahili kamburungu la Mbetu-Hemihu, tunaka nu hi na-pangalangu la Timuna.

¹¹Welingu la Timuna na-pangalangu na lola padira hanggangu la diana na Palindi Ekurungu, hi na-wikitu hanggangu la Hikurongu, hanàhu-na la Palindi Mbaala, na-pangalangu la Yàpuneyilu, hi la Tehiku Padua-ya na hupu njàpuna,

¹²nuya na lola padira la patama loduna na ngabana na tana Yahunda. La ngabana lai nuduka da-ngiangu ningu da tau la kalibaru - kalibaru kabihu Yahunda.

¹³Pa-namatu-nya na hupu liina i MIRI lai Yuhua, hawiangu welingu la ngaba tana Yahunda pa-wuangu lai Kalipu-ya anana i Yapuni welingu la kabihu Yahunda. Jiaya na Hemburungu na pawua-nya nyuna, nu na paraingu manguna i Àramba, amana i Enàku.

¹⁴Da ana umbuku-na i Enàku jiaha da tau Hehai, Ahimàngu dàngu Tàlumai. Mbàda wàngga paluhu ndàba-nahaka nyuda paraïna i Kalipu welingu la Hemburungu.

¹⁵Welingu lai nu nalua pahada-nja da tau ma-ngiangu la Ndembiru. (La mangilu-na, Kiriyatu-Hepiru, wàda-nyapa duna nuna na paraingu.)

¹⁶Napanii i Kalipu, “Na mini na ma-ngalangu pawàhi-ya na Kiriyatu-Hepiru, napa kuwua-nyaya i Àkaha, na ananggu, ka papaha-nanya,” wàna.

¹⁷Tàka i Otunialu ana anguna paluhu i Kalipu na ma-tamungu Kenàhu nawàhi-ya nuna na paraingu; tàka i Kalipu hi nawua-ya i Àkaha anana ka natuya papaha-na i Otunialu.

¹⁸La lodu pauma-da i Otunialu na-ruwatu-ya i Àkaha[6] ka nakarai ha kadipu tana la amana. Ka puru-nanyaka i Àkaha welingu la kalandai-na hi na-paàra-nya paraïna amana, jàka nggara pambuha-na.

¹⁹Nahema i Àkaha, “Na tana na pawua-mungga ama la ngaba mamàdu-ya na pangia-na. Jia ba tuna karai-nggunya ana nda pira mata wai,” wàna. Ka wua-nanyaka paraïna i Kalipu mata wai mangia dia dàngu wai mangia luru.

²⁰Da patiki pandàkingu yiada jiaha da tana pawua-nja da kalibaru kabihu Yahunda, ka damangu-nja.

²¹Da paraingu da mamarau halawàla da manguna na Yahunda, la mbara luru, nu la padira Endumu, dua kambulu hiwa mbua paraingu-da mbuu ndàbada, papohu-nja da ndeha la winggiru-da. Nuda da paraingu jiaha: na Kàpuheyilu, Endiru, Yangguru, Kina, Ndimuna, Andanda, Kendihu, Hahuru, Yitunangu, Hipu, Telimu, Mbialutu, Hahuru-Handata, Kariutu-Hehurungu (nu na Hahuru), Amàmu, Hema, Molanda, Hahàru-Ngganda, Hehimungu, Mbetu-Pelitu, Hahàru-Hualu, Mbiruhemba, Mbaala, Iyimu, Ehimu, Elitolàtu, Kehilu, Hòruma, Hikulàku, Màtumana, Hànahana, Lembaütu, Hilihimu, Aïngu dàngu na Rimungu.

³³Da paraingu, papohu-nja da ndeha la winggiru-da, la wawada da tandula hakambulu patu mbua paraingu-da mbuu ndàbada nu: na Ehitaülu, Hora, Àhana, Hanua, Eni-Ngganimu, Tapua, Enàmu, Yàramutu, Andulàmu, Hoku, Aheka, Haaraïmu, Anditaïmu, Nggandera dàngu na Ngganderutaïmu.

³⁷Jia ndàba mbuha da hakambulu nomu mbua paraingu da patiki pandàkingu yiada papohu-nja da ndeha la winggiru-da: na Henàngu, Handaha, Mikindàlu-Nggàtu, Ndiliangu, Mihipa, Yòkuteyilu, Lakihu, Mbòhukàtu, Enggulungu, Kambungu, Lamàhu, Ketilihu, Ngganderutu, Mbetu-Ndanggungu, Naama dàngu na Makenda.

⁴²Jia-mbuha da hiwa mbua paraingu da patiki pandàkingu papohu-nja da ndeha la winggiru-da: na Lipuna, Etiru, Ahàngu, Yiputa, Àhana, Nehipu, Kahila, Àkahipu dàngu na Mareha.

⁴⁵Hinggilu-da nuda, jia ndàba-mbuha dàngu na Ekurungu papohu-nja da paraingu kudu dàngu da ndehana,

⁴⁶papohu-nja mbuu ndàbada da paraingu dàngu da ndeha la lihina na Àndutu, welingu la Ekurungu lundu la Tehiku Padua.

⁴⁷Tuumbuna na Àndutu dàngu na Nggaha papohu-nja da parai kudu dàngu da ndehana da ma-taneparu lundu la lihi ana luku la padira Mehiru dàngu na hingi Tehiku Padua.

⁴⁸La ngaba ma-palindingu, hakambulu hauda da paraingu papohu-nja da kotaku la winggiru-da: na Hamiru, Yatiru, Hoku, Ndana, Kiriyàtu-Hana (nu na Ndembiru), Anàpu, Etimua, Animu, Nggohingu, Holungu dàngu na Nggilu.

⁵²Jia-mbuha da hiwa mbua paraingu patiki pandàkingu yiada, papohu-nja da ndeha la winggiru-da: na Arapu, Nduma Ehàngu, Yanumu, Mbetu-Tapuha, Apeka, Humuta, Kiriyàtu-Àramba (nu na Hemburungu) dàngu na Hiuru.

⁵⁵Hamangui da hakambulu paraingu da patiki pandàkingu yiada papohu-nja da ndeha la winggiru-da: na Maüngu, Kàramilu, Hipu, Yuta, Yihireyilu, Yòkundiamu, Hanua, Kaïngu, Nggimbia dàngu na Timuna.

⁵⁸Dàngu da nomu mbua paraingu da patiki pandàkingu yiada-mbu, papohu-nja da ndeha la winggiru-da: na Hàlahulu, Mbetu-Huru, Nggenduru, Maaràtu, Mbetu-Anutu dàngu na Elitekungu.

⁶⁰Dàngu da dàmbu paraingu patiki pandàkingu yiada-mbu papohu-nja da ndeha la winggiru-da: na paraingu Kiriyàtu-Mbaàlu (nu na Kiriyàtu-Yiaarimu) dàngu na paraingu Ramba.

⁶¹La ngabana na maràda telangu, jiaha yiada da nomu mbua paraingu patiki pandàkingu papohu-nja da ndeha la winggiru-da: na Mbetu-Aramba, Mindingu, Hekaka, Nipuhàngu, Parai Mehi dàngu na Eni-Nggendi.

⁶³Na paraingu Yeruhali mangu Yahunda-mbuya, na nyuna nda da-ngalangu-a da tau Yahunda pawàngga paluhu-ha da tau Yembuhu da ma-ngiangu lai nu. Lundu nàhu da tau Yembuhu angu ngiangu-madapa la paraingu nuna dàngu da tau Yahunda.