Read Kambera YUHUA 16 Bible Online

YUHUA 16 - Kambera bible

YUHUA 16

¹Da lola padira-na na tana pa-panduma-nja da ana umbuku-na i Yuhupu, napiti welingu la Luku Yorundangu lihina la Yeriku, la pahunga loduda da mata wai Yeriku lundu la maràda wara. Welingu la Yeriku, na-kandekalu nu na lolana lundu la Mbetilu la ngaba ma-palindingu.

²Welingu la Mbetilu, na-hanggangu la Luhu nu na lolana, hanàhu-na la Ataròtu, nu na ngia pa-ngiangu-da da tau Àraki.

³Welingu lai nu na-hanggangu la patama lodu na lolana hi hanàhu-na la ngaba tanana na banjaru Yàpulitu, lundu la Mbetu-Horungu-Mbara Luru, na-pangalangu la Nggehiru, hi la Tehiku Padua-ya na hupu njàpuna.

⁴Nunaya na ngaba tana pawua-nya na kabihu banjaru Manahi dàngu na Epuraïmu da ana umbuku-na i Yuhupu ka tana mangu-danya.

⁵Yiada da patiki pa-ndàkingu jiaha da lolana na tana pawua-nja da kalibaru la kabihu banjaru Epuraïmu. Na lola padira tanada nyuda la pahunga lodu, napiti welingu la Ataròtu-Andaru lundu la Mbetu-Horungu-Mbara Dia,

⁶hi na-pangalangu hanggangu la Tehiku Padua. Na Mikimetàtu la dia-nanya. La pahunga loduna, nu na lola padira na-wikitu hanggangu la Taanàtu-Hilu, hi namangu pa-làpahu-nya la pahunga loduna ba hanàhu-na la Yanua.

⁷Welingu lai nu na-kamburungu nu na lolana hanggangu la Ataròtu dàngu Naharàtu, hi na-pangalangu pa-pipitu la Yeriku hi la Luku Yorundangu-ya na hupu njàpuna.

⁸La patama lodu, nu na lola padira Epuraïmu napiti welingu la Tapua lundu la ana Luku Kana, hi la Tehiku Padua-ya na hupu njàpuna. Nunaya na tana na-pawua-nja da kalibaru la kabihu Epuraïmu, ka damangu-nya,

⁹jia ndàba-mbuha ba nda pirada da parai kudu dàngu da ndeha da maninja la ngaba tana Manahi.

¹⁰Na nyuna nda na-wàngga paluhu-aha da tau Kanaàngu welingu la Nggehiru paraïna Epuraïmu. Tuna nuduka lundu nàhu da tau Kanaàngu angu ngiangu-madapa la Nggehiru dàngu da tau Epuraïmu, na nyuna pa-ruwatu-ha nyuda la paràma nduma tau Epuraïmu ba hama tuna ataha.