Read Kambera YUHUA 17 Bible Online

YUHUA 17 - Kambera bible

YUHUA 17

¹Hawiangu na ngaba tana la patama loduna na Luku Yorundangu, pawua-njaha da kalibaru hawiangu la ana umbuku-na i Manahi, na kawunga anana i Yuhupu. I Makiru anana i Nggiliatu, jiaya na kawunga anana i Manahi. Ba haàtu mini kaborangu-ya, tuna nuduka hi wua ninyaha nyuna da ngabana la Nggiliatu dàngu la Mbahàngu nu la pahunga loduna na Yorundangu.

²Na ngaba patama loduna na Luku Yorundangu pawua-njaha da kalibaru hawiangu la ana umbuku-na i Manahi, nu da kalibaru: Ambiyehiru, Heliku, Àharialu, Hekimu, Hepiru, dàngu Haminda; mbuu ndàbada nuda ana umbuku-da da miniha welingu lai Manahi anana i Yuhupu. Jiaha nyudaka da ngora kalibaru.

³I Helapehàtu anana i Hepiru umbuku-na i Nggiliatu-ya (i Nggiliatu anana i Makiru umbuku-na i Manahi), nda ningua anana mini, mbulungu anana kawini-ma-a, nu: i Màhala, i Nua, i Hòkula, i Miluka, i Tiràhu.

⁴Nyuda yiada dalua lai Ratu Eliahàru dàngu i Yuhua anana i Nungu dàngu da liku uru ba hapajia-ha hi dapanii, “Mbàda panii-naka i MIRI lai Muha ba lupangu-mbu ma-ngalangu ndàba tana nyuma hama tuna da ana minima,” wàda. Rukuna nuna-duka, hi wua ndàba mbunja tana anguda da ana minida, nu da anana kawini i Helapehàtu, nunjuya na hupu liina i MIRI.

⁵Ba tuna nda mbulungu da ana umbuku mini biana i Manahi da ma-ngalangu tana ndumada, tàka da ana umbuku kawini-mbuna. Nuna duyaka na ma-pawitingu jàka nggikina hi kiri wuanya hakambulu ngia i Manahi, hinggilu-da na tana Nggiliatu dàngu na Mbahàngu la pahunga loduna na Luku Yorundangu. Na tana Nggiliatu pa-wuangu-ya la ana umbuku-na i Manahi hawiangu.

⁷Na lola padira-na na ngaba tana Manahi napiti welingu la Ahiaru hanàhu-na la Mikimetàtu la pahunga loduna-na na Hikimu. Welingu lai nu na-kamburungu hu luru na lolana, lundu la ngaba tana banjaru Eni-Tapua-ya.

⁸Na ngabana la Tapua mangu kabihu Manahi-ya, tàka na paraingu Tapua, la padira, mangu ana umbuku-na i Epuraïmu-ya duna.

⁹Na pangalangu-na nu na lola padira ngaba tana Manahi na kamburungu lundu la ana Luku Kana. Da paraingu la luruna nu na ana luku mangu Epuraïmu-ha, jiapa-kai ka la ngaba tana Manahi-ha. Na lola padira ngaba tana Manahi na-pangalangu pa-namatu-ya na ànda la diana nu na ana luku, hi la Tehiku Padua-ya na-kanjupungu ningu.

¹⁰Tuna nuduka hi mbara luruya na Epuraïmu, dàngu hi mbara diaya na Manahi, tàka na Tehiku Padua jiaya na padira-da la patama lodu. La patama lodu pa-haritungu hu dia na ngaba tana Manahi, na-padirangu dàngu na ngaba tana Ahiaru tàka la pahunga lodu pa-haritungu hu dia, na-padirangu dàngu na ngaba tana Ihakàru.

¹¹Nu la ngaba tana Ihakàru dàngu Ahiaru ninja da tana mangu Manahi, nu: na Mbetu-Hiangu, dàngu Yimbiliamu papohu-nja da ndeha la winggiru-na. Hamangui: na Ndòru (na paraingu la hingi tehiku), na Eni-Ndòru, Taanàku, Manggindu dàngu da ndeha la winggiru-na.

¹²Na nyuna nda na-ngalangu-a na kalibaru Manahi pawàngga paluhu-ha da mangia-nja nuda da paraingu; tuna nuduka hi pa-daingu ngiangu-da da tau Kanaàngu lai nu.

¹³Hamangui la lodu malamiri jiapa ka mbàda bonjangu-nakai na kapingatu-da da tau Ihirailu, nda dawàngga ndàba-aha paluhu da tau Kanaàngu; na nyuna da-ruwatu-ha nuda da tau paràma la ndumada nyuda.

¹⁴Dapanii da ana umbuku-na Yuhupu lai Yuhua, “Ka nggikina hi hangia ana na tana pawua-nggama nyuma, tàka làti dira dangu kama nyuma, rukuna ba na-pakanyuru-kama i MIRI?” wàda.

¹⁵Nahema i Yuhua, “Ba lalu dangumi nyimi, hi lupa lalu nggipuna na ngabana na ma-palindingu la Epuraïmu ndumami nyimi, iluawa la ngaba tanada da tau Perihu dàngu Repayimu. Parahu-wa pangia mabidi la o - omangu-da nyuda,” wàna.

¹⁶Dahema da ana umbuku-na i Yuhupu, “Na ngabana nu la ma-palindingu, nda natoma-a na lerangu-na ndumama nyuma, tàka na banjaru Kanaàngu da mangia-nja da ma-ndidaru la ndàdiku mbara waa, ningu kareta - kareta pabera-da ma-welingu la bàhi, — nyuda nu da ma-ngiangu la Mbetu-Hiangu dàngu da ndeha la winggiru-na, hamangui da ma-ngiangu la Yihireyilu,” wàda.

¹⁷Ka panii-nanjaka da kabihu Epuraïmu dàngu Manahi patama lodu i Yuhua, “Deningu-na, ba dira dangu-makai nyimi, dàngu ikapingatu-mbu, dàngu ràka-mana ka narihi welingu la hangia bàdi na ndumami nyimi.

¹⁸Pitiwa la ngabana na ma-palindingu, ka jiapa-kai ba omangu-iyapa, peku parahu-maminya ka mangumi nyimiya mbutana. Tàka jàka jia-haka da tau Kanaàngu, peku wàngga-mamiha, jiapa ka darihi kapingatu-kai dàngu ba ningu kareta pabera-da ma-welingu la bàhi,” wàna.