Read Kambera YUHUA 21 Bible Online

YUHUA 21 - Kambera bible

YUHUA 21

¹La hau na lodu ba hapajia-ha da ama bokulu la biliku kabihu Lewi dalua la Hilu la tana Kanaàngu, la hanggana i Ratu Eliahàru, i Yuhua anana i Nungu, dàngu da ama bokulu la biliku kabihu banjaru Ihirailu nggubulu-da. Dapanii nyuda, “Mbàda wuangu-naka hupu liina i MIRI la ngaruna i Muha, ka wua-nggama parai - paraingu ngia pa-ngiangu-ma nyuma tau Lewi dàngu da tana ma-pa-maràdangu la winggiru-da nuda da paraingu ndumada da bandama,” wàda.

³Pa-namatungu la hupu liina i MIRI, piti-dahaka paraï da tau Ihirailu welingu la tana mangu wikida nyuda, da paraingu pa-hekangu dàngu da tana pa-maràdangu-da, hi dawua-nja da tau Lewi.

⁴Da mawu - wungangu pangala-nja da paraingu-da jiaha la kaloka kalibaru Kehàtu. Da biliku ana umbuku-na i Harungu, dawua-nja hakambulu tailu mbua paraingu welingu la kabihu Yahunda, Hamiungu dàngu Mbanyamingu.

⁵Da biliku hawiangu la kalibaru Kehàtu dawua-nja hakambulu mbua paraingu welingu la kabihu Epuraïmu, kabihu Ndàngu dàngu kabihu Manahi patama loduna na Luku Yorundangu.

⁶Na kaloka kalibaru Nggerihongu da-ngalangu hakambulu tailu mbua paraingu welingu la kabihu Ihakàru, Ahiaru, Nàputali dàngu Manahi pahunga loduna na Luku Yorundangu.

⁷Da biliku la kalibaru Marari da-ngalangu hakambulu dàmbu paraingu welingu la kabihu Rumbingu, Nggàtu dàngu Hembulungu.

⁸Tuna nuduka ba dapabe - berinja la tau Lewi paraï da tau Ihirailu ba dawàngu patunja undi[9] nuda da paraingu dàngu da tana pa-maràdangu-da hama tuna na pambàda paniina i MIRI la hupu liina la ngaruna i Muha.

⁹Welingu la kaloka kalibaru Kehàtu la kabihu Lewi, jiaha da ratu ana umbuku-na i Harungu da mawu - wungangu pangala-nja da paraingu-da; pa-wuangu hakambulu tailu mbua paraingu-ha dàngu da tana pa-maràdangu-da. Hiwa mbuada da paraingu pangala-da welingu la kabihu Yahunda dàngu Hamiungu, nu: na Lipuna, Yatiru, Etimua, Holungu, Ndembiru, Aïngu, Yuta, Mbetu-Hemihu dàngu na Àramba, na pa-patamungu pa-namatu-nya na tamu amana i Enàku. Nuna na paraingu na ma-tamungu Hemburungu la rehi nàhu, hau paraingu ngia pamara-ya la ma-palindingu la Yahunda. Da woka dàngu da ndehana na paraingu yiana pambàda wuangu-haka lai Kalipu anana i Yapuni ka tana mangu-nanja. Patu mbuada da paraingu pangala-da welingu la kabihu Mbanyamingu nu: na Nggimbiungu, Nggemba, Anatutu dàngu na Àlumungu.

²⁰Da biliku hawiangu welingu la kalibaru Kehàtu pa-wuangu hakambulu mbua paraingu-ha dàngu da tana pa-maràdangu-da. Patu mbuada da paraingu pangala-da welingu la kabihu Epuraïmu, nu: na Mbetu-Horungu, Kipuhaïmu, Nggehiru dàngu na Hikimu, na hau paraingu ngia pamara la ma-palindingu la Epuraïmu. Patu mbuada da paraingu pangala-da welingu la kabihu Ndàngu nu: na Eliteki, Nggimbitungu, Ayalungu dàngu Nggàta-Rimungu. Dàmbuda da paraingu pangala-da welingu la kabihu Manahi patama lodu, nu: na Taanàku dàngu na Nggàta-Rimungu.

²⁷Na hili hau kalibaru la kabihu Lewi jiaya na kalibaru Nggerihongu. Nu na kalibaru Nggerihongu pa-wuangu hakambulu tailu mbua paraingu-ha dàngu da tana pa-maràdangu-da. Dàmbuda da paraingu pangala-da welingu la kabihu Manahi pahunga lodu, nu: na Mbaihitera, dàngu na Nggolàngu, na hau paraingu ngia pamara la Mbahàngu. Patu mbuada da paraingu pangala-da welingu la kabihu Ihakàru, nu: na Kihiungu, Ndòburàtu, Yàramutu dàngu na Eni-Ngganimu. Patu mbuada da paraingu pangala-da welingu la kabihu Ahiaru, nu: na Mihàlu, Àpundongu, Helikàtu dàngu na Rehupu. Tailu mbuada da paraingu pangala-da welingu la kabihu Nàputali, nu: na Hamàtu-Ndoru, na Kàratàngu dàngu na Kendihu na hau paraingu ngia pamara la Nggalilia.

³⁴Da kalibaru marihi la kabihu Lewi nu welingu la kaloka kalibaru Marari pa-wuangu hakambulu dàmbu paraingu-ha dàngu da tana pa-maràdangu-da. Patu mbuada da paraingu pangala-da welingu la kabihu Hembulungu, nu: na Yòkuniamu, Kàrata, Ndimuna, dàngu na Nahalàlu. Patu mbuada da paraingu pangala-da welingu la kabihu Rumbingu nu: na Mbehiru, na Yahàhu, na Kendimutu dàngu na Mapàatu. Patu mbuada da paraingu pangala-da welingu la kabihu Nggàtu, nu: na Mahanaïmu, na Hehimbungu, na Yaehiru dàngu na Ramutu, na hau paraingu ngia pamara la Nggiliatu.

⁴¹Ba tuna welingu la tana da pamangu-da nggubulu-na na tau Ihirailu patu kambulu waluda nggubulu-da da paraingu pawua-nja da tau Lewi. Nimbihu-da nuda da paraingu ni - ninguma tana pa-maràdangu-da la winggiru-da.

⁴³Tuna nuduka i MIRI ba nawua-nya na banjaru Ihirailu nggubulu-na na tana na pambàda njanjina wàngu harangu-na la boku la mangilu-da. Ba wàhi-yaka nu na tana, ngiangu-nanyaka na banjaru Ihirailu lai nu.

⁴⁴Pa-namatu-nya na panjanji-na i MIRI la boku la mangilu-da, namangga-manya duna i MIRI nggubulu-na nuna na tana hi na-mambiru. Welingu la mbuu ndàbada da muhuda nda ningua ma-ngalangu pa-ndubaku-ha nyuda, nadu ba nawua-nja talu da tau Ihirailu paraïna i MIRI hanggangu la mbuu ndàbada da muhuda.

⁴⁵I MIRI na-patutu-manja nimbihu-da da-panjanji-nanya na banjaru Ihirailu; nda ana hauma panda patutu-na.