Read Kambera YUHUA 4 Bible Online

YUHUA 4 - Kambera bible

YUHUA 4

¹Ba la hapapa ndàba-yaka na banjaru, napanii i MIRI lai Yuhua,

²“Pindiwa tau hakambulu madua, haàtu welingu la nimbihu kabihu.

³Wuanja pareta ka dapiti watu welingu la padua Luku Yorundangu, nu pàku la ngia pa-ndolaku-da ba hapajia-ha da ratu. Paràha-nja ka dangàndi-ha da watu la ngia patodu-mi taï la rudungu,” wàna.

⁴Ka paau-nanjaka paraïna i Yuhua nu da tau hakambulu madua da papindi,

⁵hi napanii, “Iluawa la padua Luku Yorundangu, la hanggana na Pàti Pa-ràndingu-na i Miri na Alami. Nimbihu-mi lupangu kai piti hau watu welingu lai nu — na danguda hakambulu dàmbu nunjuya na danguda da kabihu la banjaru Ihirailu.

⁶Napa nuda da watu da-panamu-nya na banjaru Ihirailu nu na pambàda wundana i MIRI. Jàka da-paàrangu da anami la lodu malamiri, nggàraya na ihina ndumami nyimi nuda da watu jàka wàda,

⁷màtawa kai pekanja ba na-manggàtahu na wai Luku Yorundangu la rehi pala ngàndiya la luku na Pàti Pa-njanjingu-na i Miri. Nuda da watu da-panamu mànunya napa na banjaru Ihirailu nu na mambàda njadi lai yiahu,” wàna.

⁸Ka pahàra-danyaka na hupu liina i Yuhua paraï da tau hakambulu madua. Dàngu pa-namatu-nya na papeka-na i MIRI lai Yuhua, dapiti hakambulu dàmbu watu welingu la padua Yorundangu — na danguda nunjuya na danguda da kabihu la banjaru Ihirailu — hi dangàndi-ha la pangia kalibaru uma terada.

⁹La padua-na na Yorundangu-mbu na-panunggulungu hakambulu dàmbu watu i Yuhua, nu pàku la ngia pa-ndolaku-da da ratu ba hapajia-ha da maduku-ya na Pàti Pa-ràndingu. (Nuda da watu ni-manjapa lai nu lundu nàhu.)

¹⁰Ba hapajia-ha nuda da ratu, pa-daingu ndolaku-mada la padua-na na Yorundangu, lundu da-pahàra ndàbanya paraï da nuda da tau na hupu liina i MIRI lai nyuda la ngaruna i Yuhua. Yiana na-patangangu-ma la lii kaloka pawua-na i Muha lai Yuhua. Lu pala parenggangu-danyaka da tau Ihirailu.

¹¹Ba datàka ndàbaka la hapapa, da ratu ba hapajia-ha da maduku-ya na Pàti Pa-ràndingu dalaku mangilu-nja nyuda.

¹²Nunjuya na hupu liina i Muha, mbàda pala mangilu-danyaka na luku da mini mbeni hanggangu welingu la kabihu Rumbingu, Nggàtu dàngu na beri mandua-na na kabihu Manahi.

¹³Nggubulu-da 40.000-ya na tau mini ma-kawanangu madàka ba dàngu hawaritu-da la pa-kabungu. Dapala la ma-ndidaru lihina la Yeriku ba la hanggana i MIRI-ha.

¹⁴La lodu nu nawunda-ha nuda da matumbu i MIRI na ma-pawiti-nya na banjaru Ihirailu la patembi-ya i Yuhua ba haàtu tau bokulu-ya. La ngala lurina datembi-ya nyuna hama tuna natembi-danya i Muha.

¹⁵Halaka nu, i MIRI na-paràha-nya i Yuhua

¹⁶ka nawua-nja pareta ba hapajia-ha da ratu da maduku-ya na Pàti Pa-ràndingu ka dadita-ha welingu la Yorundangu.

¹⁷Ka pahàra-nanyaka paraïna i Yuhua na hupu liina i MIRI lai nyuna.

¹⁸Ba datàka-kika la hingi luku nu da ratu ba hapajia-ha, pakiri belingu-nanyaka pa-lulungu na wai luku hama jiaya welingu hi nambinu lembaru hama tuna la mangilu-na.

¹⁹Na banjaru Ihirailu natàka la hapapa Luku Yorundangu la tànggalu hakambulu wulangu kawunga-na. Tunaka nu da-pahadangu uma tera la Ngginggalu la pahunga loduna na Yeriku.

²⁰Lai nu na-panunggulu ninja da hakambulu dàmbu watu i Yuhua da papiti weli dalungu la Yorundangu.

²¹Hi napanii-nya na banjaru Ihirailu i Yuhua, “Jàka da-paàrangu da anami la lodu malamiri rukuda yiada da watu jàka nggàraya na ihina,

²²màtawa kai pekanja nu na matumbu na ngera lida la mamàdu ba dapalaya na Luku Yorundangu da tau Ihirailu.

²³Pekanja da anami ba na-pamàdu-nggainya na wai Luku Yorundangu paraïna i MIRI, lundu itàka ndàba nyimi la hapapa, hama tuna ba na-pamàdu nggamanya nyuma na Tehiku Tibuhala,

²⁴màta mbuu ndàba na tau la pinu tana ka napinya nggi tuna bokulu-na na mbihana i MIRI. Nu ba tuna nu tembi-minyaka napa i MIRI na Alami lundu nu - nu,” wàna.