Read Kambera YUHUA 5 Bible Online

YUHUA 5 - Kambera bible

YUHUA 5

¹Mbuu ndàbada da hanganji Amori la patama loduna na Luku Yorundangu, dàngu mbuu ndàbada da hanganji Kanaàngu la hingi Tehiku Padua darongu-ya ba na pamàdu-ya na Luku Yorundangu paraïna i MIRI nu ba talànga pala-danya tau Ihirailu nuna na luku. Ka dira mangàdatu-ha rukuna na tau Ihirailu.

²Tunaka nu napanii i MIRI lai Yuhua, “Pandoiwa kahidi watu, ka wunda lii la pakàri-ya na banjaru Ihirailu,” wàna.

³Ka pahàra-nanyaka i Yuhua na papanii-nanya i MIRI la hupu liina, hi nakàri-ha da tau Ihirailu la hau pangia na pa-patamungu Tandula ngia Pakàri.

⁴Ba daluhu-ha da tau Ihirailu welingu la Mehiru, pambàda kàri ndàba-haka da tau minida. Na nyuna ba da-lindingu patu kambulu ndaungu mandaina la maràda wara, ndedi ninguma haàtu anada mini pakàri. Tàka da tau mini da mambàda toma matua-da patama la tanatara, nu ba jiaya naluhu-da welingu la Mehiru, mbàda meti ndàba-daka la hupu njàpuna na rehi patu kambulu ndaungu, rukuna ba nda danunju-ya na hupu liina i MIRI. Dàngu pa-namatu-nya na harangu-na i MIRI, nda na-pahia-anja nyuda paita-ya nu na tana mbokaru ma-kamboka na panjanji-nanja da boku la mangilu-da.

⁷Tuna nuduka hi ndedi pakàri-ha da anada mbuu ndàbada. Jiaha da ndalaru bidi ana yiada-duka da pakàri-na i Yuhua.

⁸Ba hàla ndàbaka pakàri-ha, ndàdiku-danyaka la kalibaru uma tera lundu dahàmu da manua-da.

⁹Napanii i MIRI lai Yuhua, “La lodu nàhu mbàda pamuna-nggunyaka na pa-kalana wàmi ba atakai la Mehiru,” wàna. Tuna nuduka hi patamu-nya Ngginggalu[1] na pangia lai nu lundu nàhu.

¹⁰Nu ba talànga ngiangu-da la uma tera la Ngginggalu la ma-ndidaru lihina la Yeriku, mbabu-danyaka na Paha na banjaru Ihirailu la tànggalu hakambulu patu wulangu nu.

¹¹La lodu haromu-na, hina wàngu-duka dangaa-nya na ihina na tana Kanaàngu, nu: roti nda patai wolungu dàngu uhu nggàndumu pa-handarangu.

¹²La lodu nu nda dahili ngangu-mbupa màna da tau Ihirailu nadu ba nda pahili pa-purungu-apa welingu la awangu. Dàngu piti welingu la rehi nu ihi tana Kanaàngu-ka pangaada.

¹³La hau rehi ba la lihina la Yeriku-ya nyuna i Yuhua hi jia ita biana-nya na haàtu ma-ndolaku la hanggana dàngu hapanda pa-binjiru. Lua-nanyaka i Yuhua palihi-nya nuna na tau hi na-paàrangu, “Nyumu yia angu-manggau, jàka ndia hi muhukau?” wànanya.

¹⁴“Nda angu-anda, nda muhu-mbuka,” wàna ba nahema nuna na tau. “Mini la ngora tanatara-na i MIRI-ka duku ba ningga yiahu,” wàna. Ba narongu-yaka nuna ailulu panggubu-nanyaka i Yuhua hi na-marubuku-nya nuna na tau. Napanii i Yuhua, “Nyungga duku ata-mamunggu Umbu. Nggàraka bàdi pawunda-nggunggau Umbu?” wàna.

¹⁵Nahema na mini la ngora tanatara-na i MIRI, “Àlinja da halapa-mu; na tana ngia pa-ndolaku-mu nana tana iliya,” wàna. Ka àli-nanjaka da halapa-na i Yuhua.