Read Kambera YUHUA 7 Bible Online

YUHUA 7 - Kambera bible

YUHUA 7

¹Mbàda wua-nanyaka pareta na banjaru Ihirailu i MIRI, ba nda peku-ana papiti ngga - nggàra welingu la mbuu ndàbada da maninja la Yeriku, nu da pa-pamànji-ma bàdi. Na nyuna nda panunju-aya nuna na pareta. Na haàtu tau mini ma-tamungu Àkuhàngu na panggaya na pareta, hi dira mbeniya i MIRI la banjaru Ihirailu. (Na tamuna na amana i Àkuhàngu Kàrami-ya tàka na bokuna Hambandi-ya na tamuna welingu la kaloka kalibaru Heràhu la kabihu Yahunda.)

²La rehi nu na-palewa tau i Yuhua da manda pirada welingu la Yeriku palua la Aï, nu na hau paraingu la pahunga loduna na Mbetilu, lihina la Mbetu-Awingu. Nuda da tau pa-wuangu wai ngeraha palua pa-kanuturu-ya na ngabana lai nu. Ba da-pahàra-nyaka nu na wai ngerada,

³beli-danyaka pa-patàka-nya i Yuhua. Hi dapanii, “Nda nggàra ila wàngua la palua ndàba nyuta pahada-nya na Aï. Paràhangu bia tau ràkangu ana 2.000 jàka ndia 3.000-kai. Àmbu paràha ndàba-dunya lai nu na pamba tanatara palua pa-pakabungu, nadu ba nakudu-a na paraingu nuna,” wàda.

⁴Ba tuna tau 3.000-aya na malua pahada-nya nuna na paraingu. Na nyuna da-kandulingu-ma-a ba nàhaku-ha.

⁵Da tau Aï dayaulu-ha nyuda piti welingu la pindu bokulu paraingu Aï lundu la ngabana na ngia papala, hi da-pameti-ha ràkangu tau tailu kambulu manomu-ha welingu lai nyuda la karaha tandula. Ka hala eti-danyaka da tau Ihirailu ba da mangàdatu.

⁶Paraï pa-handuka dira matiki daba - bàriku-ha da pakida nyuda i Yuhua dàngu da liku uru Ihirailu ba hapajia-ha, piti weli mbarungu lundu rudungu da-maràbaku la hangga Pàti Pa-ràndingu-na i MIRI ba dawàngu patunja kumburu tana da katiku-da tanda hawina-da.

⁷Napanii i Yuhua lai MIRI, “Ou Ala MIRI-nggu! Nggàra-yaka na pa-karia wàmu-nggama nyuma lundu yiahu la hapapa Luku Yorundangu? Ka wuaha la tau Amori wàmu-nggama? Ka mameti? Narihi hàmu-kipa làti ka ma-ndàdiku bia la hapapa Yorundangu!

⁸Ou MIRI! Mbàda nàhaku-nahaka muhu hi da-kandulingu da tau Ihirailu. Nggikina wànggu-aka bàdi nàhu?

⁹Napa darongu da tau Kanaàngu dàngu mbuu ndàbada da tau lai yiahu na rukuna nuna. Napa da-nggupulu-kama hi da-pameti ndàba-kama! Tàka nggàra-yaka na pawunda-mu napa, ka hindi wànya na patembi wànggau?” wàna.

¹⁰Nahema-ya i Yuhua i MIRI, “Hadangu-wa! Nda ningua linguna bau maràbaku tumu nu la tana!

¹¹Mbàda wunda-daka manjala da tau Ihirailu. Mbàda wua-nggunjaka làti pareta ka danunju-ya na pa-njanjingu-ma nyuda dàngu Nyungga, tàka nyuda dapangga biaya nuna! Ningu papiti-da welingu la banda-malanja, lupangu-ma pamànji-ha ba wànggu làti. Da-mangangaha hi da-kawini-nja la angu banda-malanja-da nyuda ka àmbu ningu mapinya.

¹²Yiana-mayaka na ma-pawitingu hi nda peku pa-dàdungu-da ba dahangga-nya na muhu. Da nàhaku-ha muhu hi da-kandulingu nyuda, nadu nyuda wiki pambàda ratangu-haka hukungu-da ka pamànji-ha. Nda kuhili didi karaha-akaipa, jàka ndedima pamànji-ha da banda-malanja da manda uku la papiti-ha.

¹³Nàhu hadangu hi, Yuhua! Hawari-ya na banjaru Ihirailu ka dawai rehingu pahangga-ngga Nyungga. Wua-njawa pareta ka dawai rehingu padua haromu, nadu ba tuna yia napa na papanii-nggu Nyungga Ala Ihirailu lai nyuda: ‘Ha dimi tau Ihirailu! Da banda-malanja kai pamànji-ha ba wànggunggai làti ba kuwua-nggai pareta, ninja hawiangu lai nyimi. Jàka ndedi-mapa iwàrunja da banda-malanja nuda, nda jia peku pa-dàdungu-ami napa pa-ndubaku-ya na muhu!’ ka wànggunja wànggu.

¹⁴Jia ba tuna, Yuhua, màtawa kau paniinja, ba pa-pareha màra hau kabihu - hau kabihu-ha nyuda haromu la mbaru. Jàka ku-patuji-ya na hau kabihu mbuu ndàbada da kalibaru la kabihu nuna lupangu-ma da-hurungu màra hau kaliba - hau kalibaru. Tàka jàka ku-patuji-ya na hau kalibaru, mbuu ndàbada da kuru uma la kalibaru nuna lupangu-ma da-hurungu màra hau kuru uma - hau kuru uma. Tunaka nu jàka ku-patuji-ya na hau kuru uma, nimbihu-na na tau la kuru uma nuna lupangu-ma na-hurungu màra haàtu - haàtungu.

¹⁵Hàlaka nu, na tau pa-patuji ba deningu-ma na-pahàmu-na banda-malanja pa-larangu, lupangu-ma tunu pambuta-ya pa-kariangu kuru umana dàngu mbuu ndàbada da pamangu-naka; nadu ba nyuna-duka na mapangga lii pa-njanjingu dàngu na mawunda-ya na-akatu bokulu la honga banjaru Ihirailu,” wàna.

¹⁶La haromu-na, la mbaru hada rudungu, na-pahangga màra hau kabihu - hau kabihu-nya na banjaru Ihirailu paraïna i Yuhua, tàka jiaya na kabihu Yahunda na panggàna.

¹⁷Hàla na-pahangga màra hau kaliba - hau kalibaru-nya na kabihu Yahunda i Yuhua, tàka jiaya na kalibaru Heràhu na panggàna. Tunaka nu na pahangga màra hau kuru uma - hau kuru umanya na kalibaru Heràhu i Yuhua, tàka jiaya na kuru umana i Hàmbandi na panggàna.

¹⁸Hàlaka nu, na-pahangga màra haàtu - haàtu-nya na kuru umana i Hàmbandi i Yuhua; tàka jiaya i Àkuhàngu anana i Kàrami, umbuku-na i Hàmbandi na panggàna.

¹⁹Napanii i Yuhua lai Àkuhàngu, “Dou na ananggu, pekawa dàngu panii patànjingu-wa lai yiahu la hanggana i MIRI na Ala Ihirailu, jàka nggàraya na pambàda wundamu. Panii-yawa lai nyungga, àmbu pahiningu-du,” wànanya.

²⁰“Deningu-mana,” wàna i Àkuhàngu. “Mbàda wunda-ngguka manjala lai MIRI na Ala Ihirailu. Yianaya na pambàda wundanggu:

²¹La honga banda-malanja pawàhi-nda kuita-ya na hawàla kalembi malai Mbambilunia na madira manandangu; ku-itangu-mbu àmahu bara ràkangu dàmbu kiluda, dàngu hapungu kabuli àmahu rara marihi welingu la paradua kilu na mbotuna. Dira mataru-nggunja nuda da banda-malanja la pamangu-nja, tuna nuduka hi kupiti-ha dàngu hi kuwini-nja la tana la uma teranggu; la kiri dehi-maha da àmahu bara,” wàna.

²²Ri - ringa-naka i Yuhua pa-paràhangu tau la umana i Àkuhàngu. Ma-langatàka-maya, nu da banda-malanja pa-larangu ninja lai nu pa-kawiningu la tanaha, tàka da àmahu bara la kiri dehi-maha.

²³Dapiti-ha nyuda da banda-malanja hi dangàndi-ha lai Yuhua dàngu la mbuu ndàbada da tau Ihirailu. Hàla, hi dawotu-ha nu da banda-malanja la hanggana i MIRI.

²⁴Tunaka nu yàpa-danyaka i Àkuhàngu paraï da i Yuhua dàngu nggubulu-na na banjaru Ihirailu hi dangàndi-ya la Lolangu Handuka dàngu mbuu ndàbada da anana, da banda hapina, da kalandai-na, dàngu da mbimbina, na uma terana, dàngu mbuu ndàbada da pamangu-naka pa-karia-nja da àmahu bara, na kalembi malai dàngu na àmahu rara da pa-manganga-na.

²⁵Hàla, hi napanii i Yuhua lai Àkuhàngu, “Ka nggikina dumu hiu patàka-ndanya na handuka? Nàhu patàka-nanggau-nyaka nyumu na handuka i MIRI!” wànanya. Ka nàhaku-danyaka watu i Àkuhàngu lundu nameti, paraï da mbuu ndàbada da tau Ihirailu. Mbuu ndàbada da manguna da patuna, dàngu da pa-manganga-na patunu pambuta-ha.

²⁶Hàlaka nu, da-pabundu pada - daamanya watu na pangia nuna da mani-manjapa lundu nàhu. Tuna nuduka Lolangu Handuka hi wàda-manyapa na pangia nuna. Ka wadaru-nanyaka na mbenina i MIRI.