Read Kambera YUHUA 9 Bible Online

YUHUA 9 - Kambera bible

YUHUA 9

¹Mbàda rongu-dahaka da ruku taluna na Ihirailu paraï mbuu ndàbada da hanganji la patama loduna na Luku Yorundangu — la ma-palindingu, la ma-pahuru melingu, dàngu la ma-ndidaru nàhu la hingi Tehiku Padua lundu hu dia la mamarau la Palindi Limbanongu; nu da hanganji Heti, da hanganji Amori, Kanaàngu, Perihu, Hewi dàngu Yembuhu.

²Mbuu ndàbada yiada da hanganji da-pahamangu hi da-pambulungu pahada-nya i Yuhua dàngu na banjaru Ihirailu.

³Na nyuna da tau Nggimbiungu la banjaru Hewi mbàda rongu-danyaka na pawunda-na i Yuhua la Yeriku dàngu la Aï.

⁴Nyuda nu dabota-ya ka wàngu pamàhi-nya i Yuhua, ba dawàngu pa-pabuku-nja da kalandai-da: karungu mambàda miri, dàngu kanai angguru mambàda mbora ma-welingu la manulangu. Da roti bàlangu pangàndi-da, roti mambàda màdu-haka dàngu daparau ahuka.

⁵Tunaka nu hau-danyaka paki makarii dàngu datungu halapa mamaku - kumalu da pambàda kada - dapu.

⁶Dawàngu patuda nu ba dalua la kalibaru uma tera la Ngginggalu hi dapanii lai Yuhua dàngu da tau Ihirailu, “Welima la tana mamarau dàngu mbuhangu-manya patura lii pa-njanjingu dàngu nyimi Umbu - umbu,” wàda.

⁷Na nyuna dapanii da tau Ihirailu, “Nggàra tuba-naka hi matura lii pa-njanjingu dàngu nyimi? Talànga wanguna yiahu biakai ihu indàdiku ningu la ma-mareni!” wàda.

⁸Dapanii nyuda, “Pa-naingu-mamanya duma la pa-pahàra-nya nggàra biaya na parinju-mu Umbu,” wàda. “Ka nggamukai nyimi? Nggi weli ningumi?” wàna ba na-paàra-nja i Yuhua.

⁹Dahema nyuda, “Welima la tana mamarau halawàla-ma dumu Umbu, nadu ba mbàda rongu-manyaka na rukuna i MIRI Ala na palumumi nyimi Umbu - umbu. Mbàda rongu ndàba-mahaka da pawunda-na la Mehiru,

¹⁰dàngu jàka nggiki-nanja da tau madua hanganji Amori la pahunga loduna na Yorundangu i Hihungu na hanganji Hehimbungu dàngu i Onggu na hanganji Mbahàngu na ma-ngiangu la Àhitaròtu.

¹¹Da paraha-nggama da liku uruma dàngu nggubulu-na na mangia-nya na tanama pa-paloku bàlangu dàngu pa-kapàlaku la pamai tomakai nyimi Umbu - umbu, dàngu la papeka-ya ba ma-mbuhangu panyàku lai nyimi. Jia ba tuna, ma-kamahi-nggai kai mila-nggama eti, kai tura pa-njanjingu dàngu nyuma Umbu - umbu.

¹²Kamangu kai tàngaru-ha, ni da roti bàlangu-ma. Ba ma-hadangu nàmu, dambana-mapa ni da roti. Tàka nàhu tàngaru-ha ni! Mbàda màdu-daka dàngu daparau ahuka.

¹³Dàngu yiada da kanai angguru, mabidi-mahapa ba ma-paihi-nja; tàka nàhu kamangu pa-tàngaru-ha ni! Mbàda kahi - hira-daka. Da paki dàngu da halapa-ma mbàda mbora-daka paraï pamarau na kapàlaku-ma nàmu,” wàda.

¹⁴Ka kei-dahaka tau Ihirailu nu da pangangu hawutu welingu la tau Nggimbiungu na nyuna nda da-paàra-nya jàka nggikina wàna i MIRI na rukuna nuna.

¹⁵Ka tura-nanyaka lii pa-njanjingu pa-pambuhangu dàngu da tau Nggimbiungu i Yuhua dàngu na-panjanjingu la panda pameti-ha nyuda. Hi da-harangu-mbu da liku uru banjaru Ihirailu la pa-padeni-nya nu na pa-njanjingu.

¹⁶Tailu mbua lodu ba hàlaka patura-ya nu na pa-njanjingu, mbàda toma-daka da tau Ihirailu la paraingu Nggimbiungu, Kepira, Mbaerutu dàngu Kiriyàtu-Yiaarimu nu la ngaba tanada da tau nuda. Ka hina-duka hi pinya ba nda namarau-a na pangia-da welingu la Ngginggalu.

¹⁸Na nyuna nda peku-ada da tau Ihirailu pa-pameti-ha nyuda, nadu ba mbàda harangu-daka lai nyuda da liku uru Ihirailu wànya na tamuna i MIRI na Ala Ihirailu. Nggubulu-na na banjaru Ihirailu da-hoputu-nja da liku uruda rukuna yiana.

¹⁹Na nyuna dahema da liku uru, “Màlawa nyuna! Mbàda harangu-maka nyuma lai nyuda wànya na tamuna i MIRI na Ala Ihirailu. Nàhu àmbu jia tuudunda manda hàmu hanggangu lai nyuda.

²⁰Àmbu ta-pameti-duha, nadu ba mbàda pa-njanjingu-ndaka; jàka tapangga-ya na pa-njanjingu napa nahuku-nda nyuta i Ala.

²¹Ba tuna, pahia bianja paluri, màta ka tatuha matanggu bera ai dàngu matanggu duku wai ndumanda nyuta,” wàda. Tuna nuduka na patuuda da liku uru.

²²Hàla, paau-danjaka da tau Nggimbiungu la hanggana i Yuhua. Napanii i Yuhua, “Ka nggikina dimi hi ipanyonga kama dàngu hi ipanii ba kanjupu marauya na tanami, tàka hi yiahu pàku-aya?

²³Rukuna bai wundaya nuna, nahuku-nggai nyimi i Ala. Napa na banjaru-mi na-padaingu pa-ata matanggu bera ai dàngu matanggu duku wai ndumana na Uma Alanggu,” wànanja.

²⁴Dahema nyuda, “Umbu, hi kiri wunda-maha nuda rukuna ba mbàda rongu-dumaka i MIRI na Ala palumu-mi, mbàda paràha-nanyaka i Muha, na atana la pawua-nggaunya nyumu nggubulu-na yiana na tana dàngu la pa-pameti ndàbaha da tau da mangia-nya la rehi piti-munya yiana na tana. Ka dira mangàdatu wàngu duma-nyaka lai nyimi; ma-mangàdatu pa-pameti kama, nuna-duyaka na ma-pawitingu hi mawunda ndàbaha yiada.

²⁵Nàhu ni nggama la limamu nyumuma Umbu. Palua nggamawa lima pa-namatu-nya na mahàmu bau kakaya, Umbu,” wàda.

²⁶Yianaya na pawunda-na i Yuhua: Na-kahiri-ha nuda da tau dàngu nda na-pamàja-anja da tau Ihirailu ka da-pameti-ha nyuda.

²⁷Na nyuna la perana nuna natuha ata nyuda — matanggu bera ai dàngu matanggu duku wai ndumada da tau Ihirailu dàngu ndumana na ngia pa-maraku manguna i MIRI. Lundu nàhumbu pahàra-mada-nyapa na paràma nuna la ngia pa-lumungu pa-patuki-na i MIRI.