Read Kambera 2 TEHALUNIKA 1 Bible Online

2 TEHALUNIKA 1 - Kambera bible

2 TEHALUNIKA 1

¹Angu dedi kabungguru la Tehalunika, manjadi banjaru-na i Ala na Amanda dàngu i Miri Yehu Karitu! Nyuma ba ha-pajia-kama i Paulu i Hila dàngu i Timutiu

²ma-monungu ka màla àruki i Ala Ama dàngu i Miri Yehu Karitu ka na-paliri-nggai kanyuru dàngu peku hàmu mbuu ndàbami.

³Angu dedi, ngera mànu-mamanya duma la pa-pamalangu-nya i Ala rukumi nyimi. Dàngu ràka-mana ba tuma numaa, ba hama huka pawai-dimika lai Karitu, dàngu ba hama huka pa-mbuhangu dimika dua wikimi.

⁴Tuna nuduka hi kiri panii-manya na rukumi nyimi handàka tada - handàka tadalu-manja da kabungguru-na i Ala. Mawàngu pa-hamemu ba mapeka-ya, nggiki hama undungu-na na pawaimi lai Karitu ba pajàra-kai dàngu la mayila na pahunggu-mi.

⁵Nuna-duyaka na pa-lohangu wàna, nggiki hama molana ba na-patandangu-na ngera i Ala, Nyimi mbàda mayila-mika lumuna na Tana Bidina i Ala, tuna nuduka napa, ràka-mada duda la patama-nya na Tana Bidina i Ala hi kiri wànanggai.

⁶Napa nawànya na mamola dàngu na-palimba wànya mayila la tau na ma-pamayila-kai nyimi.

⁷Tàka lai nyimi ma-mayila la rehi nàhu — hamangui lai nyumambu — napa nawua-nda halembiru i Ala la lodu puruna i Miri Yehu welingu la awangu ba na-pawuwangu wikina dàngu da papalewa-na da ma-kaborangu

⁸dàngu wàngu epi ma-kandulangu. Puru-nanya pahuku-nja da tau da manda wàrihu-ya i Ala da manda pa-tangangu lurida la Lii Mànangu rukuna i Yehu na Mirinda.

⁹Napa da tau nuda dangala-nya na hukungu, nu na molungu lundu nu - nu, hi wàrunja la hambeli welingu la hanggana i Miri dàngu welingu la mbiha manyola-na;

¹⁰napa da-hàrangu nuda mbuu ndàbada la lodu maina ka na-pamangunju-ya paraï banjaru-na dàngu ka datembi-ya paraï mbuu ndàbada da tau pawaika. Napa nimbunggai nyimi la hongada nu na banjaru-na i Ala, maa ba mbàda wai-dimi-nyaka na lii langu pa-patàka-manggai.

¹¹Tuna nuduka hi ma-hamaya mànunggai ndumami. Ma-hamayangu ka na-paràka-nggai paraïna i Ala la paluri nunjuya na pambuha-na; jiaya nuna-maka na papaau wànanggai. Màla àruki i Ala, ka wàngu mbihana, ba na-pahàra-nya na parinju-na la pawunda mahàmu, dàngu la pa-palundu-nya mbuu ndàbana na pawunda-mi ruku pawaimi lai Karitu.

¹²Nu ba timi nu pa-mangunju-dimi-nyaka na Mirinda i Yehu Karitu, dàngu na-pamangunju-mbukai nyimi paraïna i Yehu, ruku hàmu etina na Alanda dàngu i Miri[1] Yehu Karitu.