Read Kambera 2 TEHALUNIKA 2 Bible Online

2 TEHALUNIKA 2 - Kambera bible

2 TEHALUNIKA 2

¹Rukuna na maina na Mirinda i Yehu Karitu, dàngu rukuna ba pauhi-nda ngeru pa-ndàdiku lai Nyuna, kukarai pambana-kai:

²Àmbi rengga la pa-hondaru jàka ndia àmbi rengga la paringu langu rukuna na kareuku tau ba rehi-mana-nyaka nàhu na lodu mai belina i Miri Yehu ba wàda. Talànga wanguna nuna na kareuku ma-welingu la manyura-ya, jàka ndia ma-welingu la hau lii pa-pekangu-yakai; jàka ndia talànga wanguna ningukai mapanii ba tuna nu na pa-tulihu-ma la hangia huratu-ma nyuma.

³Jiapa ka nggiki hamana-kai, àmbi pa-màjangu-du wikimi ka na-panyonga-kai tau. Nadu ba ndedipa natàka nu na Lodu, lupangu da-mangilu-mapa yiada: Nadangu na tau na ma-kandulingu, ma-pahini-nya i Karitu; tàka na Tau Akatu na pa-pandumangu patama la naraka na-jakarungu wikina.

⁴Wàngu ngànjangu-na napa na-patumbarungu dàngu na-pajangga wikina la mbuu ndàbada da pa-hamaya tau, jàka ndia la mbuu ndàbada da marapu da Ala ba wàna na tau. Lupa na-mandapu-ma napa la Uma Ala hi na-bobaru-ya, Alaka ba wàna.

⁵Namu-maha ba mbàda panii ndàba-ngguhaka nuda ba ninggapa lai nyimi.

⁶Dàngu pi-maminya jàka nggàra-yapa na ma-pabetangu hi nda danjadi nuda mbuu ndàbada. Napa na-mumuku nu na Tau Akatu la rehi pambàda kawuku-na i Ala.

⁷Pakiringu-nanyaka nàhu paràma kangunduhu nu na àtalu na ma-paloku-ya na akatu, na nyuna papa - pàtu-yapa. Napa jàka pa-hinggilu-yaka nu na mapàtu-ya,

⁸hina-duka hi nawuwa nu na Tau Akatu. Napa jàka namai-yaka i Miri Yehu ka pameti-nanyaka nu na Tau Akatu wàngu kayeku welingu la ngaruna, dàngu na-pamolu wànya handaraku-na ba ninya.

⁹Napa na-mumuku wàngu mbiha manyola-na i Kambàliku nu na Tau Akatu. Ma - màtu pa-hangàtarungu napa pawunda-na dàngu ngga - nggàra manda ningu hamangu da ma-panyonga.

¹⁰Ma - màtu ma-akatu pa-kahili wàna ba na-panjàra-nja napa da tau da manduma-nya na molungu. Napa da-molungu ba da-tebuku-ya dàngu ba nda dambuha-nya na lii langu na ma-tubangu welingu lai Ala na ma-ngalangu pa-pamàna-nja nyuda.

¹¹Tuna nuduka hi na-patàka-nja kawaha ma-panjàra-nja paraïna i Ala, hi dawaiya na manda tubangu.

¹²Mbuu ndàbana na tau na mambuha-nya na njala dàngu ba nda dawaiya na ma-tubangu, napa daita-ya na injana ba hukunja.

¹³Angu dedi pambuha-na i Miri! Lupangu-maka bàdi ma-pamalangu mànunya i Ala rukumi nyimi, nadu ba weli mulangu-maka ba mbàda pindi-nanggai paraïna i Ala ka pamàna-nggai.[2] Nuna nu hi nanjadi jiaya ba ruku paràma-na na Ngahuna i Ala lai nyimi ba na-panjadi-kai banjaru matua-na i Ala dàngu bai waiya na lii ma-tubangu welingu lai Ala.

¹⁴Ndumana nuna-maka hi napaau-nggai paraïna i Ala wàngu Lii Mànangu pa-bobaru-manggai. Tàka hi kiri paau-nanggai paraïna i Ala, maa ba nawuku-duya ka peku-mbuna napàda-minya na mangunju-na na Mirinda i Yehu Karitu.

¹⁵Jia ba tuna angu dedi, màtawa kai ndolaku bànduku dàngu kai paundu mànu-manya na lii pa-pekangu pambàda wua-manggai, ka la ngarukai, ka la huratu-kai.

¹⁶Màla àruki na Mirinda i Yehu Karitu wiki, dàngu i Ala na Amanda ka na-panggaüru dàngu ka na-pamàndu-nja da etimi, ka peku paloku dàngu ka peku bobaru-minya na mahàmu. Nadu ba nambuha-dunda paraïna i Ala, dàngu ba ruku hàmu etina hi na-pamàndu-nja da etinda tàka hi tamonu-nya na mahàmu.