Read Kambera 2 TEHALUNIKA 3 Bible Online

2 TEHALUNIKA 3 - Kambera bible

2 TEHALUNIKA 3

¹La njàpuna angu dedi, hamaya-nggamawa ndumama. Hamayangu-wa ka nalu kada ndàbanya tau na lii langu welingu lai Miri dàngu ka danggepi hàmuya, hama tuna lai nyimi àmangu.

²Hamayangu-mbu ka na-pamara-kama i Ala la tau iraku da ma-akatu. Nadu ba nda mbuu ndàba-ana na tau na mawaiya na lii langu welingu lai Miri.

³Tàka ma-tuturu-maya duna i Miri. Napa na-paundu-nggai dàngu naopa-nggai welingu lai Ma-akatu.

⁴Dàngu mamonu hàmu-manya duma i Miri na rukumi nyimi, ba pahàra-minya padua dàngu ba daingu pahàra-maminya duna napa na pa-panau wàmanggai.

⁵Màla àruki i Miri ka na-kapipi-kai ka hama huka jàngapu-minya ba mbuha-nanggai paraïna i Ala dàngu ba wua-nanggai torungu i Karitu.

⁶Angu dedi, la hupu liina i Miri Yehu Karitu, ma-paràha-nggai angu dedi kai wiliru ndàbanja da angu dedi da mapatai eti, da manda nunjuha da lii pa-pekangu da pawua-manja.

⁷Maa ba pi wiki-maminya ba lupangui pa-namatungu-ma la ngerangu welingu lai nyuma. Nyuma duma nda ma-katuda hada - katuda hadangu-a ba ni-nggama lai nyimi.

⁸Nda mangangu jua-a la tau, ma-mbayaru-ma duma. Jiapa dira matiki-mbuipa ba maràma wàngu lodu rudungu ka àmbu haàtu-du pa-pambotu-ma lai nyimi.

⁹Hi tuna nu na pawunda-ma nda jia-aya ba nda ngaba-manya la pa-karuhi-kai kai ndula-kama, tàka jiaya ba mbuhangu-manya pa-paita-nggai ngerangu.

¹⁰Ba ni-nggamapa lai nyimi, mbàda jorutu-manggai-nyaka yiana, “Na tau na manda mbuhangu paràma, àmbu nangangu-du,” mbàda wàmaka.

¹¹Hi tuna nu na paniima jiaya ba ningu parongu-ma, ba ninja da tau patai eti lai nyimi. Nda nggàra-a paràma-da, jia-ma-aya la patama korunya na ngera tau hawiangu na pangguma-da.

¹²La hupu liina i Miri Yehu Karitu, ma-panggàna-nja kareuku da tau nuda dàngu ma-panamu-nja, ka daràma mandangu dàngu ka dahimbu wiki lurida.

¹³Tàka nyimi dimi àmbu nahoda-dukai la pawunda mahàmu.

¹⁴Talànga wanguna ningu napa tau manda mbuhangu pakiku-nya na paniima la huratu yiana. Pananjarungu-ma la tau tungu nu dàngu àmbu pa-longgamai daa-dunya ka na-makia.

¹⁵Na nyuna àmbu hama tuna papa-minyai; tàka miwàngu papanau bianya duna hama tuna angu dedi-minya.

¹⁶I Miri jiaya na pingi peku na pola hàmunda. Màla àruki ka nawua-nggai peku hàmu la mbuu ndàbana. Màla àruki i Miri ka hanina lai nyimi mbuu ndàbami.

¹⁷Nyungga yia Paulu, tambi wànggunggai. Nyungga wikima ma-tulihu-ya lai yiana. Yiana-maya na tanda na patunggu la mbuu ndàba-daka da huratu-nggu.

¹⁸Màla àruki na Mirinda i Yehu Karitu ka na-paliri-nggai kanyuru mbuu ndàbami. Matembi-kai, Paulu