Read Kambera 1 TIMUTIU 1 Bible Online

1 TIMUTIU 1 - Kambera bible

1 TIMUTIU 1

¹Timutiu, ana langatàka-nggu lai Miri! Na huratu yiana welina lai nyungga yia Paulu, pa-pahuru-na i Karitu Yehu ruku pareta-na i Ala, na Ma-pamàna-nda dàngu ruku pareta-na i Karitu Yehu, na pamonu-nda. Mili àru i Ala Ama dàngu i Karitu Yehu na Mirinda ka nawua àrunggau nyumu kanyuru, màjangu dàngu mànjaku.

³Na parinju-nggu nyungga, nyumu màta ka engamu la Epihu, hama tuna na pambàda pa-ihiku-nggunggau ba jiaya na lakunggu la Makandonia. Nadu, la Epihu ninja ba tau mapira-ha da ma-wewaru-nja da lii pa-ajaru da manda deningu, tàka nyumu màta kau roputu-ha bàdi.

⁴Pekanja ka da-jiaka-wa bàdi pa-pabanjaru wànja da lii pangerangu dàngu na ruku dedi tau da manda ningu dirangu. Nuda mbuu ndàbada jiaha da mawuda-ya na pa-pahànggangu wàngu, dàngu nda na-pakabutuhu-aya na patanda wàndanya na pa-pakaka-na i Ala, làti duna ba mbulungu-ana jàka tawaiya Nyuna-a.

⁵Na pawuku-nggu nu la lii panaungu-nggu ka màtawa na mbuhangu ka naluhu welingu la eti yahangu dàngu eti dalu ma-matua, pa-kariangu pawai weli etinya i Miri, dàngu ba tuda nu hi peku mbuha-danya na anguda patau.

⁶Ninya hawiangu na tau ba nda tuna nuapa na lurina dàngu da-njàrangu ninguka la pa-pataya - pa-tayaku na manda ningu ndoku linguna.

⁷Nyuda ka manjadi ngguru anggama wàda, tàka nyuda wiki nda da-jàngapu-aya jàka nggàraya na papanii wàda hamanai da hangia - hangia da pa-kawàndi-da ba da-paluhu-ya.

⁸Tapi-manya na uku anggama ba nahàmu jàka patutu langatàka-nya la panunju-ya na pawàngu-ma duna.

⁹Nu ba tuna tanamu-duya bàdi hi kiri pandoi-ya na uku nda pa-pandumangu la tau hàmua duna, tàka pa-pandumangu-ha da mapangga-ya na uku, nu da tau akatu, ba hapajia-ha, da tau kabularu, da tau njala, da tau da manda ningu anggama-da, da tau pinu tana, hangganja da tau da ma-pameti amada jàka ndia inada, dàngu hapaela-naka na ma-pameti tau,

¹⁰hangganja da tau da ma-payora pakiu kaüngu, da ma-paangu dàngu hamada, da ma-panggora, da ma-kakòlulu, da ma-hakahii kambàliku, dàngu nggamu biaya na mawunda-ya na hangia - hangia na ma-ndubaku-ya na lii pa-ajaru na ma-deningu.

¹¹Na lii pa-ajaru nuna nimanya daa la Lii Mànangu na papawai ngerangga nyungga la pa-wewaru pakada-nya, nu na Lii Mànangu welingu lai Ala na ma-bokulu dàngu na ràka pa-wotungu.

¹²Ku-pamalangu-nya i Karitu na Mirinda. Nyuna na mambàda wuangga pa-àtalu wàngu la palumu-nya Nyuna, dàngu ba ku-paràkangu nyungga la pawai ngeranya nuna,

¹³jiapa-kadu àmangu nyungga ba kupulu-nya, ba ku-pamayila-ya dàngu ba ku-pa-kalana-ya Nyuna. Ba tuna i Ala namila-ngga eti, nadu la rehi nu ba ndedi kupawai, tàka hi nda kupinya jàka nggàraya na-paula-nggu.

¹⁴Tàka hi manaü mila-ma-anangga eti paraïna Mirinda. Nyuna nawua-ngga nyungga pamàka wàngu papawai lai Nyuna dàngu la pambuha-nya na angunda patau. Na màka tungu nu nawua hàla-manda nyuta mbuu ndàbanda mambàda pambulu dànya i Karitu Yehu.

¹⁵Na-deningu langatàka na kareuku yiana — jia ba tuna ràka-mana jàka ta-kataku-ya dàngu jàka tawai ndàbaya — : “I Karitu Yehu namai la pinu tana yiana la pa-pamàna-nya na tau na manjala,” ba wàna. Tàka nyungga-maka duku tau njala marihi akatu.

¹⁶Tàka jia pàkuyai ba ruku tunggu nu i Ala namila-ngga eti, ka pekuna i Karitu Yehu ba na-pawuwa hàlaya na lerangu etina hanggangu lai nyungga, tau marihi njala yia. Tàka yiana hau ngerangu-mayaka napa la tau mbuu ndàbana da mapawai lai Nyuna tàka hi da-ngalangu luri langatàka na ma-palupangu.

¹⁷I Ala, na ma-Hanganji la nggubulu rehika, ràka-mana ka tembiya dàngu ka wotu ma - mànunya, nadu ba Nyuna na ma-palupangu, na panda ngita dàngu na ma-pamehangu! Amingu.

¹⁸Oi Timutiu na ananggu! Na wai ngera yiana ku-pakata-nggaunya nyumu, rukuna ba pangàda-nya na liina i Ala na pa-patàka-da da wunangu la kabungguru na manggàna-kau nyumu. Màtawa na hupu ràndi nuna kau bàlanya la parukangu-mu na mahàmu.

¹⁹Parukangu-ma bau kata undunya na pawaimu na ma-deningu, dàngu wàngu eti dalu matua-mu. Ningu tau da manda wàrihu-ya na papàda eti daluda, hi lupa na-lujuru na pawaida.

²⁰La hongada nyuda jiaha i Himiniu dàngu i Alihandaru. Nu da tau madua mbàda huku-nggunjaka ba kuwua-ha lai Kambàliku, ka peku jiaka-da pa-paaka-nya i Ala.