Read Kambera 1 TIMUTIU 4 Bible Online

1 TIMUTIU 4 - Kambera bible

1 TIMUTIU 4

¹Na Ngahuna i Ala napanii paihiku-nya ba na-kandulingu hawiangu na tau la rehi - rehi na manàmu-nya, ba na-pahini-nya i Karitu. Nyuda napa datundu ninja da wàndi da ma-panjàrangu dàngu ba dakiku-nja da lii pa-ajaru-da da wàndi akatu,

²na pa-patàka-da wàngu ngaru tau kapilandu da ma-kakòlulu. Da eti daluda da tau tungu nu da-kapàtangu-ka.

³Da-ajaru-ya na tau la panda lalei la panda mangoma dàngu la panda ngangu pangangu tungu nu - tungu ni ba wàda. Làti duna ba pangangu pa-padika-na i Ala-maduha la panganja wàngu pa-malangungu lai Nyuna paraï da tau da mambàda pawai lai Karitu dàngu da mambàda tandaya na lii pa-ajaru na ma-deningu welingu lai Ala.

⁴Mbuu ndàbada da pa-padika-na i Ala dahàmu, dàngu nda ningua hangia manda hida ka wàndanya, jàka ta-kataku wa-madu-nyaka pa-malangungu lai Ala.

⁵Nadu na kanyuru welingu lai Ala dàngu na hamayangu jia-yaka na ma-pahida-ha da pangangu.

⁶Jàkau ajaru-madu-haka nuda mbuu ndàbada la angu dedi angu pawai, jiakau-ka nyumu napa malumu-nya i Karitu Yehu na maràma pa-hàmungu. Dàngu pa-katombuhu pangala-munyaka nyumu na wini etimu wàngu puluna i Ala na pawainda nyuta, dàngu wàngu lii papeka - papekangu mapa-deningu da panunju-mu lundu nàhu.

⁷Maraunja da lii pangerangu a - ànga da manda ningu lingungu. Pa-ndàmangu-wa wikimu la paluri la ngera lumungu.

⁸Na pa-ndàmangu wiki la ngera tolu, hawutu-a linguna, tàka na pa-ndàmangu wiki la ngera pangahu nalingu hàla la hangia - hangia, nadu ba ningu ràndingu-na ndumana na luri la rehi nàhu dàngu la rehi na manàmu-nya.

⁹Na ngerana nuna ma-deningu-ya dàngu ràka pa-kataku-ya dàngu ràka pawai ndàba-maya.

¹⁰Jia-mayaka na kirina hi ta-parukangu[6] dàngu hi taràma pa-mbangatungu, nadu ba monu hàmu-ndanyaka i Ala na maluri; Nyuna Mapa-mànangu-ya ndumana na tauka, ri - rihi-maka duna da tau da mapawai.

¹¹Papeka-wànjawa mbuu ndàbada nuda, paràha-nja ka danunju-ha.

¹²Àmbu pahiangu-du jiapa ka haàtu-na la pa-pangia wawakau nyumu ba ngaha pabidi minikau. Tàka hauya duna, màta nyumu ka ngerangu-kau ndumada da tau da mapawai nu la pa-banjarungu-mu dàngu la nggoda nggàduku-mu, la hurimu bau mbuhangu angumu dàngu la papawai lai Yehu Karitu, dàngu na lurimu na ma-yahangu.

¹³Ba talànga tuna nu, ka lupa kutàka napa, nyumu kau duruhungu-ma pambaha-nja na Huratu Matua da tau, kau titiru-ha dàngu kau ajaru-ha nyuda.

¹⁴Àmbu pambula-du pawànya na kanyuru welingu la Ngahuna i Ala na pa-wuangu-kau ba jiaya na pa-dambaku-danggau lima la katiku-mu paraï da liku uru la kabungguru, hamanai da wunangu ba da-patàka-nya na hupu liina i Ala na ngera wikimu nyumu.

¹⁵Paloku hàlaya nuna mbuu ndàbana ba wàngu weli etimu, ka peku ita hàla-nanya tau na kabutuhu-mu.

¹⁶Manggangu wikimu dàngu mangga-mbunya na lii pa-ajaru-mu. Màtawa kau tuturu la pa-paloku hàlaya nuna mbuu ndàbana, nadu ba wàngu patumu nu nyumu napa pamara-munya na wikimu nyumu hamanai da tau da marongu-kau.