Read Kambera 1 TIMUTIU 6 Bible Online

1 TIMUTIU 6 - Kambera bible

1 TIMUTIU 6

¹Da tau Karitu da maata, màta ka da-pangàda-nja ba ràka patembi-ha da mirida, ka àmbu na-paruha-ya tau na tamuna i Ala dàngu na lii pa-ajaru-nda.

²Da tau ata da ma-miringu tau Karitu, àmbu da-pahalela-ha da mirida ba angunda pa-karitu-madu àmbu wàda. Tàka màtawa ka manaü hàmu-kinaipa ba da-lumungu mirida, nadu da mirida da palumu hàmuda ba hapajia-maha ba tau pawaiha dàngu pa-mbuhangu-maha. Mbuu ndàbada-ka yiada màta kau ajaru-wànja dàngu kau panau wànja.

³Nggamu na ma-ajaru wàngu mahili hauna welingu yiada-ka dàngu da manda namatu-ha da lii pa-ajaru da ma-deningu welingu la Mirinda i Yehu Karitu, dàngu la lii pa-ajaru la anggama-nda nyuta,

⁴nyuna tau ngambaya dàngu nda nggàra ndoku papina! Wai panyaki-mananya la pa-patayaku dàngu la pa-palumu wànja da kareuku jua hi nawuda-ya na-malara eti, na paihangu, na pa-pulungu, na-parimangu manda hàmu,

⁵dàngu na palumungu-da na manda njàpu ndoku. Na pangàdangu-da da tau nuda na-kabitangu-ka dàngu nda na-padeningu-apa. Ba dareki-ya peku wulu wàdanya na anggama.

⁶Tubangu-ma na anggama na-wuangu pautu bokulu wàngu nu jàka da-mànjaku eti wànja da maninja lai nyuda.

⁷Nadu ba nda ningudu ana ngga - nggàra pangàndi-nda la pinu tana yiana, dàngu nda ningumbui ngga - nggàra paluhu ngàndi-nda welingu la pinu tana!

⁸Jia-duya jàka ningu-duka pangangu dàngu papaki, ka jiaka-ka duna.

⁹Tàka na tau na ma-mbuhangu pawulu, na-panyonga-ya dàngu nahiru-ya paraï ma - màtu pa-matarungu manduba dàngu ma-paruha. Da pamata - pamatarungu nuda na-palàjaru-ya dàngu na-pahanggàmaru-ya na tau.

¹⁰Nadu paraï ruku matarungu àmahu ma - màtu akatu matumbu. Ninya hawiangu na tau na ma-kehangu àmahu hi lupa nda nanunju-ayapa na lii pa-ajaru Karitu, hàla ka pinjalu-nanjaka ma-handuka na ma-palàjaru-ha da etida.

¹¹Tàka nyumu dumu tau manguna i Alakau, jia-duya nyumu màta kau marau hàlanja nuda. Pamukarungu-ma màta ka tau-ma-padeningu-kau la matana i Ala, ma-paatangu wikina lai Ala, mapawai lai Karitu, ma-mbuhangu anguna patau, pa-torungu la mayila, dàngu kau màjangu la panggolu.

¹²Parukangu langata - tàkama la paluri hama tau Karitu, ka peku hanggau-munya na pawua juangu na luri langatàka dàngu na ma-palupangu. Nadu ba ndumana nuna-duka hi na-paaunggau i Ala ba jiaya napeka-mu la hangga tau dangu ba pawai-munyaka lai Karitu.

¹³Tàka nàhu, la hanggana i Ala na mawua-nya luri mbuu ndàbana na maninya, dàngu la hanggana i Karitu Yehu na ma-hakahii-nya na ma-deningu lai Putihu Pilatu, karai-nggunyaka yiana lai nyumu:

¹⁴Karadaku hàlanja da pareta bau wàngu pa-yahangu dàngu ba nda ningu nyuramu lupa la lodu mai belina na Mirinda i Yehu Karitu.

¹⁵Na maina napa pa-kawuku-ya la rehi ma-jàngapu paraïna i Ala wiki. Nyuna duna na ma-kuaha pa-mehangu; Nyuna na-bokulu, Hanganji-da da hanganji mbutada, dàngu Mirida da miri mbutada.

¹⁶Nyuna-a duna na panda kuaha-na paraïna na meti; Nyuna na luri daa la ma-handaraku na panda tara palihi-nya tau jiapa nda nggamuya. Ndedi ningua haàtu tau mambàda itaya jàka ndia ma-ngalangu paita-ya. Lai Nyuna hàlaya na wotungu dàngu na mbiha manyola lundu nu - nu! Amingu.

¹⁷Na ngerada da tau wulu la pinu tana yiana, màtawa kau kamahi-nja ka àmbu dangamba dàngu ka àmbu damonu-nja da pa-bànjalu-da da manda palupangu — hama tuna da pawulu-da. Nyuda damonu-nya i Ala bàdi na mawua hàla-ndanja mbuu ndàba-daka da ma-bundungu, ka peku lada-ndanja.

¹⁸Kamahi-nja ka da-paitangu hàmuda, ka nadangu na paloku-da mahàmu, ba da-màjangu etida, dàngu ba da-mbuhangu pa-wuangu la anguda.

¹⁹Nu ba tuda nu nyuda pa-uhingu-danya banda na pingida da banda hàmu ndumana la rehi na manàmu-nya. Nu ba tuda nu nyuda napa ngala-danyaka na luri pa-lupangu, ni na luri na ma-langatàka.

²⁰Nggàraya na pa-patanggungu-kau, mangga pahàmunya, Timutiu! Maraunja da pa-banjarungu da manda ningu lingungu dàngu la pa-palumu-nja da hangia - hangia “Papingu wànguya,” ba wàda ànga.

²¹Nadu ba nidunja da tau da mapeka-ya na pinguda, hi lupa da-hiliru welingu la lii pa-ajaru Karitu, na pawaida la wungana. Mili àru i Miri ka na-pakanyuru-kai Angu dedi. Na lii patembi-ma nyuma, Paulu