Read Kambera 2 TIMUTIU 2 Bible Online

2 TIMUTIU 2 - Kambera bible

2 TIMUTIU 2

¹Oi Timutiu na ananggu! Màtawa nyumu kau kapànduku paraï ruku pa-namungu na pa-wuangu-ta, rukuna ba ta-pambulu dànya i Karitu Yehu.

²Da lii pa-ajaru àmangu da pambàda rongumu welingu lai nyungga la dangu tau, màta kau patanggu-nja da tau da paràka pa-monungu dàngu da ma-hakapu la pa-ajaru tau hawiangu.

³Mu-hambeta kariangu bàdi nyumu ba panjuri tuturu-na i Karitu Yehukau.

⁴Na haàtu panjuri na ma-talànga palaku-ya na waingera-na nda nahili inga-ahapa da pa-paloku la nduma wikina, nadu ba na-mbuhangu pa-pahàmu-ya na etina na ngora pabera-na.

⁵Na haàtu na tau na ma-parimbungu nda jia pangora-ana la pa-rimbungu, jàka nda nanunju-ha da kalara - kalaratu.

⁶Na mini tungu woka na ma-mbangatu la paràma, nyuna-maka duna na ma-kapingi ngalanja da ihi wokana.

⁷Pangàda-nja nuda da pa-jakaru-nggu, nadu i Miri napa nawua-manggau duna pamàka wàngu la pa-jàngapu-ya mbuu ndàbana.

⁸Namu-maya yiana: Na Lii Mànangu na pa-bobaru-nggu jia-mayaka na lii rukuna i Yehu Karitu, na wàla wuana i Ndautu; jiaya Nyuna-maka na Karitu na mambàda luri beli welingu la meti.

⁹Jiaya na ruku bobaru-nggunya na Lii Mànangu nuna-maka, hi ku-pàdangu mayila, hi lupa tungga nggili bàhi hama tuna na haàtu tau akatu. Tàka na puluna i Ala nda peku-ana la patunya nggili bàhi.

¹⁰Nunaya na pakiri-na hi ku-pajàrungu nyungga la pa-handepa ndàbaya, lumuna na pahàmu wàda da tau da pambàda pindina i Ala, ka pekunai duda pangala-nya na mànangu pawua-na rukuna i Karitu Yehu dàngu na ma-pakariangu bunjuku ma-palupangu.

¹¹Langatàka deningu-mana na pulungu yiana, “Jàka mbàda meti karia-madu-ndanyaka Nyuna, napa taluri karia-manyaka duna.

¹²Jàka ta-padaingu-madu la pa-pajàrungu, angu-manda-nyaka Nyuna la pa-pareta dànya Nyuna. Jàka ta-pahini-nyaka Nyuna, Nyunambu napa na-pahini-mandaka duna.

¹³Jàka nda ta-tuturu nyuta, Nyuna duna daingu tuturu-mana, nadu ba nda jia ndubaku-ana wikina,” ba wàna.

¹⁴Màtawa nyumu kau panamu-nja da tau, da rukuda yiada mbuu ndàbada. La hanggana i Ala, màta kau panaunja ka àmbu da-palumu wànya na rukuda da kareuku. Nuda nda ningua linguda, tàka manaü pariu raü-danja da tau da marongu-ha.

¹⁵Màta nyumu kau pamukarungu langata - tàka ka peku pajia-nanggau paraïna i Ala, ba ràka tau maràma lai Nyunakau. Parukangu-ma ka àmbu umakia la ngera paràma-mu, tàka màta kau ajaru patutu-manja da lii pa-ajaru da ma-deningu welingu lai Ala.

¹⁶Maraunja da pa-banjarungu da manda ningu lingungu dàngu da ma-pawawa-ya i Ala. Da pa-banjarungu tungu nu jia la pabonja-ya na akatu-na na tau-ma-a.

¹⁷Na lii pa-ajaru-da da tau nuda napa na-làmbatu hama tuna na hidu kawàngga làmbatu-ya. La hongada nyuda jia-mbuhaka i Himiniu ada i Piletu.

¹⁸Nyuda da-hiliru-ka welingu la lii pa-ajaru na ma-deningu, dàngu hi dapariu raüya na pawaida hawiangu da tau. Na paniida nyuda mbàda làpahu-naka duna na hadangu welingu la meti, wàda.

¹⁹Tàka na lata undungu na pa-pandoi-na i Ala nda peku-ana la pa-kàduku-nya. La pinuna ni-manyaka na pa-tulihu, “I Miri natanda-maya duna na tau na pamangu-na,” wàna, dàngu, “Na tau na mapanii ba manguna i Miriya nyuna, na-pànjangu-ka bàdi pawunda manjala,” wàna.

²⁰La hau uma na ma-bokulu ningu màtu - màtu kanaingu-na. Ninja da pa-pandoi welingu la àmahu bara jàka ndia àmahu rara, tàka ningu-mbudui pa-pandoi welingu la ai jàka ndia tana. Ninja da pàwangu la lii ma-kawàndi dàngu ninja da pawàngu la pa-paloku hau lodu - hau lodu.

²¹Na tau na ma-paili wikina welingu la ma-akatu-ka, na tau nuna napa pa-patanggu-nya lii ma-kawandi. Nyuna mangu paleha-ya dàngu malingu-ya la mirina. Nyuna pa-panapangu-ya la pa-paloku-ha da paràma - paràma mahàmu.

²²Maraunja da wai lejida da bidi tau. Parukangu-ma paluri nunjuya na pawuku-na i Ala, tuturu la lii pa-ajaru-na, dàngu mbuhanja da angunda patau, hamanai ka na-mànjaku na etimu. Tumu nuwa bau angunja nyuda da mawara pakarai pa-ndulangu lai Miri wàngu eti yahangu-da.

²³Àmbu kikungu-du la patayaku-da da tau nduba da manda nggàra papida. Bau pi-madunya nyumu nuda mbuu ndàbada jiaha da pa-pahànggangu wàngu.

²⁴Na tau na maràma ndumana i Miri nda nanggepi-a la pa-pahànggangu; nyuna na-hawewa bàdi hanggangu la tau mbuu ndàbana dàngu na-ajaru pa-hàmungu tau dàngu na-lerangu eti.

²⁵Na wàngu ma-malijangu bàdi ba na-ajaru-ya na tau na makàli pa-tidungu; mili àruki i Miri ka nawua-nja manggawangu ka peku pa-mbelingu-da welingu la njala - njalada dàngu ka datanda-ya na lii pa-ajaru na ma-deningu.

²⁶Ba wàngu patuna nu jia hi da-pàdangu wikida, hi da-pahàla welingu la kahili-na i Kambàliku, na mambàda tanawa-nja dàngu na ma-pambana-ha la patundu-nya na pambuha-na.