Read Kambera 2 TIMUTIU 4 Bible Online

2 TIMUTIU 4 - Kambera bible

2 TIMUTIU 4

¹I Karitu Yehu napa hili nàmu belinya la pinu tana yiana la pa-patanda-nya ngerana na tau na maluri dàngu na mameti; dàngu napa hili nàmunya la pa-pareta ba Hanganji-ya. Jia ba tuna kukarai pambana-kau la hanggana i Ala dàngu i Karitu Yehu:

²Màtawa nyumu kau bobaru-ya nuna na lii welingu lai Ala dàngu kau pa-nuangu pa-dàhiku-ya na tau ka na-patingi-nya, jàka da-mbuhangu hi ndia. Màtawa nyumu kau pa-kawàndi-ya la eti tau, kau paita-nja da manjala dàngu kau pambana-ha. Bau ajaru-ya na tau kau wàngu lerangu eti ju - juamu.

³Nadu ba nàmunya na rehina ba nda nahilu bihu na tau pa-kataku-ya na lii pa-ajaru na ma-deningu. Tàka hauya duna napa nyuda datundu-maanya na pambuha wikida, dàngu ba da-pauhi-nja da ngguru dàngu la pa-ajaru-ya na hangia - hangia na mahàmu la kahilu-da ba darongu-ya.

⁴Napa dahulu-nja da kahilu-da parongu-ya na ma-deningu, tàka hi da-patalelingu kahilu-da la mawunda lii pangerangu.

⁵Jiapa ka tuna nu, màta nyumu kau roputu wikimu, jiapa ka nda nggikina. Pa-jàrungu-ma la mayila-mu, paloku-maya na wai ngeramu ba ma-bobaru Lii Mànangu-kau, dàngu palaku pahàmu-manya na wai ngeramu ba malumu-nya i Alakau.

⁶Jàka jiaya na ngera wikinggu nyungga, toma-nanyaka na rehinggu la pameti la pa-kameti maraku lai Ala. Tiangu-ki napa dunjaku-nggunyaka na pinu tana yiana.

⁷Mbàda tundungu-mangguka nyungga la pa-parimbu paha - hàmungu, dàngu kutoma-maka la rehi njàpuna. Daingu tuturu-manggu duku[3] lai Karitu lundu njàpuna.

⁸Tàka nàhu duku na wunda talunggu patia-nangga padua-ka. La Lodu Hupu Njàpuna, i Miri, na Hakimu na mamola napa nawua-ngganya na wundanggu, nadu nyungga ba kuluri pahàmu dànya i Ala. Tàka nda mehanggu nyungga-a napa makei pa-wuangu matungu nu, tàka mbuu ndàba mbuna na tau na ma-rinjungu panapa-ya na tàkana i Miri.

⁹Pamukarungu-ma jàka pekuna kau lu mai parenggangu lai nyungga,

¹⁰nadu i Ndemàhu ba na-dunjaku-nggaka nyungga, ba narihi mbuha-nyapa na pinu tana yiana. Nyuna hambàda-naka la Tehalunika. I Karekihi hambàda-naka la Nggalatia dàngu i Titu la Ndàlumatia.

¹¹Didi-makia-yaka i Lukahu na ma-ndàdiku dàngga. Lua papiti-ya i Màruku kai kariangu nàmu, nadu nyuna ba peku pambapa dànangga la paràma-nggu.

¹²Mbàda paràha-nggunyaka i Tihiku palua la Epihu.

¹³Jàka umai, ngàndiya na kalembi bokulu na pa-bànjalu-nggu la Tarua la umana i Kàrapu. Ngàndi-mbuha da mbukunggu, ri - rihi da mbuku da pa-pandoi welingu la karàta manulangu.

¹⁴I Alihandaru na matuku wudu ma - màtu-maka ma-akatu pawunda-na lai nyungga. Nyunaka i Miri napa ka natunya himbalu-na nunjuya na paruku-na.

¹⁵Nyumu wiki màta kau pananjarungu hanggangu lai nyuna, nadu nyuna ba lalu mbana ndubaku-nanya na lii pangàndi-nda.

¹⁶Ba jiaya na kawunga jakaru-nggunya na pa-kahiri wànggu wikinggu, nda ningu ndoku haàtu ma-karaha-ka; mbuu ndàbada da-dunjaku-ma-angga. Mili àru i Ala ka àmbu na-panjala-ha ba tudangga nu!

¹⁷Ba tuna i Miri karaha-nangga padua. Nyuna nawua-ngga kapàru hi lupa kumaka pa-bobaru palundu-nya nuna na Lii Mànangu, ka peku rongu-danya mbuu ndàbada da tau nda Yahundi. Tàka nyungga pahili-nggunyaka welingu la hanggàmaru meti.

¹⁸Tubangu-ma ba na-pahàla-ka napa i Miri welingu la nimbihu pawuku akatu hanggangu lai nyungga. Napa na-karia wàngga mànangu nyungga la ngia pa-hanganji-na la awangu. Màlawa ka pa-bokulu-ya Nyuna lundu nu - nu! Amingu.

¹⁹Malangu-da wàna wàmunya i Perikila dàngu i Àkuwila dàngu da kuru umana i Onihiporu.

²⁰I Eràtuhu na-ndàdiku la Korinitu, tàka i Torupimu ku-dunjaku mangu hidunya la Miletu.

²¹Pamukarungu kau mai nàmu ba ndedi na-urangu. I Embulu, i Pundihu, i Linuhu dàngu i Kalaundia malangu-na wàmunja wàdanggau; hamanai mbuu ndàbada da angu dedi hama pawainda.

²²Nyunaka i Miri ka na-karaha-kau. Nyunaka i Miri ka na-pakanyuru-kai angu dedi ba hapajia-kai! Na lii patembi-ma nyuma, Paulu