Read Kambera TITU 1 Bible Online

TITU 1 - Kambera bible

TITU 1

¹Dou i Titu na ananggu duku! Nyungga, Paulu, ku-tulihu-ya yiana na huratu ba atana i Ala dàngu pa-pahuru-na i Yehu Karitu-ka. Nyungga papindi-ka dàngu pa-paràhangu-ka la pandula-ha da tau papindi-na i Ala ka da-undungu la pawaida. Lupangu-mbu bàdi ku-kapipi-ha nyuda ka datanda-ya na lii papekangu ma-tubangu na pa-papeka-nanda na anggama-nda.

²Na lii pa-pekangu nuna pa-latangu-nanya la monungu ba tangala-nya napa na luri na ma-langatàka na ma-palupangu. I Ala mbàda ràndi mangilu-nanyaka nuna na luri ba ndedi na-pakiringu na rehi — tàka i Ala nda jia kambàliku-ana.

³Ba jia-yaka na rehina, na-paloha-nya paraïna i Ala na paràndi-na la lii languna. Na lii languna nuna na-pakata-ngganya nyungga, tàka nyungga hi ku-pakada-nya na hupu liina i Ala Ma-pamàna-nda.

⁴Oi Titu, nyumu ana langatàka-nggunggau, nadu nyuta ba angu pawainda lai Karitu. Ku-monungu ka nawua àru-kinggau kanyuru dàngu mapeku mahàmu paraïna i Ala na Amanda dàngu i Yehu Karitu na Hanganji Ma-pamàna-nda.

⁵Ku-bànjalu-kau la Kareta ka peku palundu-munya na mandedi lànyapu. Dàngumbu, ka peku wotumu tau ma-kapipi kabungguru la nimbihu paraingu. Dàngu kau namuha yiada da pa-paihi-nggunggau:

⁶Na tau ma-kapipi kabungguru, tau manda ningu nyurangu-maya bàdi; nyuna duna haàtu-ma-a bàdi papaha-na;[1] da anada mbàda pawai-daka lai Karitu hi nda jia-aha da patanda tau ba ana maànga-ha da manda rongu lii panaungu.

⁷Na ama bokulu kabungguru jiaya na tau na ma-paloku-ya na paràma-na i Ala, àmbu ningudu nyurana bàdi. Àmbu na-ngànjangu-du, àmbu narengga mbenidu, àmbu na kàli maüku, àmbu na kàli pa-lumungu dàngu àmbu ma-kabàlikungu àmahu-duya.

⁸Lupangu-ma ba nanggepi hàmu etiya na ariyaa la umana, nambuha-nya na mahàmu, na-ngalangu papàtu wikina, na-patutungu, na-yahangu dàngu na-àhalungu.

⁹Lupangu-ma ba nakata undunya na lii pa-pekangu pa-monungu, hama tuna na pambàda papekangu-ya. Jia ba tuna hi namàka papanau-nya na tau palata-nya la lii panaungu ma-tubangu, dàngu la pabowa-nja njalada da tau ma-ndubaku-ya.

¹⁰Ba nadangu-du na tau ma-mbuhangu pa-patula ngganggangu, ri - rihi da tau da ma-welingu la anggama Yahundi; nyuda da-panyonga wànya kambàliku-da na tau hawiangu.

¹¹Da tau tungu nu wunggu-manja bàdi da ngaruda, nadu ba da-pariu-raü hàlanya na kuru uma tau ba dawànya na lii papekangu manda ràkana. Dawunda-ya nuna ba himbu-danya utu manda ràka-ma-ana!

¹²Na haàtu wunangu wikida, ma-welingu la Kareta-mbuyai, napanii-ma, “Da tau Kareta da-kambàliku mànu, dàngu beri banda bohuha da mamalau mbulida dàngu mamayau,” wàna.

¹³Nggàraya na papanii-na na wunangu nuna na-patubangu-ma. Jia ba tuna lupangu-ma bau hàngga langatàka-nja; ka peku kata undu-danya na lii panaungu ma-tubangu

¹⁴dàngu ka àmbu dahili kata-dunjapa da analalu tau Yahundi jàka ndia da kalaratu pa-pandoi tau na ma-jukaru-nya na lii pa-pekangu ma-tubangu.

¹⁵Na-yahangu ndàbama duna la tau yahangu. Tàka la tau ma-iraku kanandingu-na dàngu manda pawai, nda ningua hau ma-yahangu, nadu na pangàdangu-da dàngu na wini etida ba na-iraku hàla!

¹⁶Da-panii nyuda ba datanda-ya i Ala, tàka hi pahini biada-nyai la paràma-da. Nyuda pa-mayitangu-ha, dàngu nda dabihu pa-karadaku; nyuda jiaha da tau da manda duluku la pawunda-ya jàka nggàraya na mahàmu.