Read Kambera TITU 2 Bible Online

TITU 2 - Kambera bible

TITU 2

¹Tàka nyumu dumu Titu, màtawa kau paniiya na lii papekangu pa-deningu.

²Panau-njawa da ma-kaweda mini, ka dapàtu wikida, ka da-manggàna dàngu ka da-pananjarungu ba tau paràka patembi-ha. Jiangu-mbu bàdi ba dakata undunya na lii papekangu ma-tubangu welingu lai Ala, ba da-pambuha hàmungu dàngu ba da-torungu la mayila-da.

³Màta ka tuna numbu bau panaunja da ma-kaweda kawini ka na-patangangu na huri lurida hama tuna na tau na ma-pambulu-nya na lurina lai Ala. Àmbu da-pulungu tau hawiangu, dàngu àmbu na-parajaku-ha pa-unungu ma-maüku. Lupangu-ma ba da-papekangu mahàmu-a,

⁴nu ba tuda nu ka da-kapipi-ha da bidi kawini la pa-mbuhangu leida, la pa-mbuhangu anada,

⁵la pa-manggàna, la pa-yahangu dàngu la panjadi ina kuru uma mahàmu, ma-karadakungu leida. Jàka tunaka nu nda ningua tau malapi-ya na puluna i Ala.

⁶Hamanai, upanau-mbunja bàdi da bidi mini ka da-manggàna.

⁷La mbuu ndàbana, màtawa kau pangita-nja ngerangu la huri hàmu. Jàkau pa-pekangu, lupangu-ma bau patutungu dàngu ka weli eti-mamu.

⁸Wànguwa kareuku manggàna, ka àmbu na-paaka-nggau tau, ka peku makia-da da papamu ba nda ningu manda hàmu papulu wàdanda.

⁹Da tau ata da-patundungu-ma bàdi la mirida, ka daliya na etina la ngga - nggàra bia mbutana. Àmbu da-patarangu-du,

¹⁰jàka ndia àmbu da-manganga-du. Màtawa ka da-pangitangu mànu huri hàmu dàngu tuturu-da, ka peku wotu-danya tau na lii pa-pekangu rukuna i Ala, Ma-pamàna-nda ba daita-ya na hurida.

¹¹Nadu ba mbàda pawuwa-mana-nyaka na pa-namungu-na i Ala la pa-pamàna-nya na tau mbuu ndàbana.

¹²Na pa-namungu-na i Ala nuna na-papeka-nda ka àmbu tahili luri ndubaku-duyapa na pambuha-na i Ala dàngu ka àmbu takiku-dunyapa na itirungu pinu tana. Nyuta na-papeka-nda paluri la pinu tana yiana ba wàngu pingunda papàtu wiki, pa-patutungu, dàngu pa-tuturu lai Ala.

¹³Nàhu ba nedi-ndanya na Lodu na pamonu-nda nu; la Lodu nuna napa naita-ya tau pinu tana na bunjuku-na i Yehu Karitu, na Ala Hupu Mabunjuku, na Hanganji Ma-pamàna-nda.[2]

¹⁴Nyuna mbàda meti lumu-nandaka ka peku pahàla-nanda welingu la akatu-nda mbuu ndàbada, dàngu hi na-panjadi-ta hau banjaru ma-pahàla welingu la njala hi tanjadi mangu wiki-maana, dàngu ma-maràna patuu mahàmu.

¹⁵Papeka wànjawa yiada, panau-njawa dàngu màtawa ka dawàngu pa-mahumbaru-nggau bau kanyangi-nja. Àmbu ningudu haàtu tau ma-pamuda-kau.