Read Kambera IMBARANI 1 Bible Online

IMBARANI 1 - Kambera bible

IMBARANI 1

¹La rehi la handàka-na ma - màtu ngarangia pawàna i Ala, ba napanii danja da boku la mangilu-nda la ngaruda da wunangu.

²Tàka nàhu la rehi malamiri panii-nanyaka lai nyuta la ngaru Anana. Rukuna yiana na Anana hi na-padika-nya na pa-nggubulu awangu mbuta-na paraïna i Ala. Dàngu mbàda kawuku-nanyaka i Ala ba na Anana yiana-maka manduma-nya mbuu ndàbana.

³Nyuna na ma-patapanjiru-ya na mangunju-na i Ala na maji - jilana; Nyuna jiaya na ninu maüna na hada wikina i Ala. Nyunambu na maopa wànya pulu mbiha mendina, hi kiri undungu-na mbutana na hanggubu awangu. Nu ba nahàla-ka pa-pahàla-ya na tau welingu la njalana-naka, ka mandapu-nanyaka la kanjàka pareta la awangu, ba na-mandapu dànya i Ala, Ma-kawaha na mahupu-jangga.

⁴Na mandapu-na i Ana na pangala-na welingu lai Ala nda hakudu hipu-naha da mandapu-da da papalewa, dàngu na tamuna na pawua-nanya paraïna i Ala nda hakudu hipu-naha la pa-mangarangu welingu la tamu na pawua-na i Ala la papalewa-ka.

⁵Ndedi ma na-handàkangu papanii tuna yia la haàtu papalewa i Ala, “Nyumu Ana-nggunggau; la lodu nàhuma bau Amangga Nyungga,” la pawàna. Ndedimbui na-handàkangu papanii tuna yia i Ala rukuda da papalewa, ka nggamuya-kadu: “Napa na-Amangga Nyungga, tàka hi kuana-nya Nyuna,” la pawàna.

⁶Tàka la rehi palewa-nanya na Ana kawungana yia la pinu tana, napanii i Ala, “Màtawa da papalewa-na i Ala mbuu ndàbada ka da-marubuku-nya i Ana,” wàna.

⁷Rukuda da papalewa, napanii i Ala, “I Ala natuha ngilu da papalewa-na, dàngu natuha roka epi da malumu-nya,” wàna.

⁸Tàka lai Ana napanii i Ala, “Na kanjàka hanganji-mu dou Ala, hanii-mana lundu nu - nu![1] Na pareta-mu[2] pareta mamola-ya.

⁹Nyumu mu-mbuhangu mamola, dàngu mu-paura-ya na ma-kaputingu; jia-duyaka i Ala, na Alamu, hi napindi-kau Nyumu hi nawua-nggau tembi maraku pambaha eti wàngu, marihi-nja da angumu,” wàna.

¹⁰Napanii-mbu i Ala, “Nyumu, dou Miri, la kawunga-na mu-padika-nya na tana, dàngu Nyumu wikima maruku limanya na awangu.

¹¹Nuda mbuu ndàbada napa da-molungu-ha, dàngu dambora hama tuna paki; tàka Nyumu dumu ndau panjilungu-a.

¹²Yiana na hanggubu awangu mu-palàpitu kalembi-nya napa, tàka hiu pahilu wànya hangia. Tàka Nyumu dumu ndau panjilungu-a napa, dàngu nda jia ningua hupu njàpuna na lurimu,” wànanya.

¹³Ndedima na-handàkangu i Ala papanii tuna yia la haàtu papalewa, “Mandapu-kau la kawana-nggu, ka lupa ku-panyàku-ha lai Nyumu da papa-muka,” nda wàna-a.

¹⁴Jàka tuna nu, ka nggàra-haka duda da papalewa? Nyuda jiaha da ngahu malumu-nya i Ala dàngu da pa-paràha-na pandula-ha da tau da manduma-nya na mànangu ngeru.